நாடாளுமன்ற மழைக்கால கூட்டத்தொடரின் இரண்டாவது வாரத்தின் முதல் நாளும் பரபரப்புடன் தொடங்கியது. கூட்டம் தொடங்கிய சில நிமிடங்களிலேயே எதிர்க்கட்சி எம்.பி.க்கள் அமளியில் ஈடுபட்டதால், மக்களவை மற்றும் மாநிலங்களவை ஆகிய இரு அவைகளின் நடவடிக்கைகளும் பகல் 12 மணி வரை ஒத்திவைக்கப்பட்டன.

கடந்த வாரம் முழுவதும் நீட் வினாத்தாள் கசிவு விவகாரம் மற்றும் மத்திய கல்வி அமைச்சர் தர்மேந்திர பிரதானின் ராஜிநாமாவை வலியுறுத்தி எதிர்க்கட்சிகள் தொடர்ந்து போராட்டத்தில் ஈடுபட்டதால் நாடாளுமன்றம் முடங்கியிருந்தது. இதற்கிடையில், மாணவர்கள் போராட்டத்தை முடிவுக்கு கொண்டுவரும் வகையில் மத்திய கல்வி அமைச்சர் தர்மேந்திர பிரதான் கடந்த சனிக்கிழமை தனது பதவியை ராஜிநாமா செய்வதாக அறிவித்ததாக தகவல்கள் வெளியாகின.

இதனைத் தொடர்ந்து, வினாத்தாள் கசிவு மற்றும் அரசு தேர்வுகளில் நடைபெறும் முறைகேடுகளைத் தடுக்கும் நோக்கில் கடுமையான தண்டனைகளை வகை செய்யும் சட்டத் திருத்த மசோதாவை மத்திய அரசு இன்று மக்களவையில் தாக்கல் செய்ய திட்டமிட்டுள்ளது.

இதையும் படிங்க: நாடாளுமன்றத்தில் இன்று வெடிக்கும் நீட் விவகாரம்!! திமுக, காங்கிரஸ் அதிரடி நோட்டீஸ்... மத்திய அரசுக்கு கடும் நெருக்கடி!

ஆனால், கூட்டத்தொடர் தொடங்கிய உடனேயே சிஜேபி தலைமையிலான மாணவர் போராட்டத்தின் போது காவல்துறையினர் மேற்கொண்டதாக கூறப்படும் நடவடிக்கையை கண்டித்து எதிர்க்கட்சி உறுப்பினர்கள் இரு அவைகளிலும் முழக்கமிட்டு போராட்டத்தில் ஈடுபட்டனர். இதனால் அவையில் கடும் அமளி ஏற்பட்டது. சபாநாயகர் மற்றும் அவைத் தலைவர்களின் வேண்டுகோளையும் மீறி உறுப்பினர்கள் தொடர்ந்து கோஷங்கள் எழுப்பியதால், இரு அவைகளின் நடவடிக்கைகளும் பகல் 12 மணி வரை ஒத்திவைக்கப்பட்டன.

இதற்கிடையில், மாணவர்கள் மீதான தாக்குதலுக்கு யார் அனுமதி அளித்தது என்று கேள்வி எழுப்பி மக்களவை எதிர்க்கட்சித் தலைவர் ராகுல் காந்தி, மத்திய உள்துறை அமைச்சர் அமித் ஷாவுக்கு கடிதம் எழுதியிருந்ததும் அரசியல் வட்டாரங்களில் கவனம் பெற்றுள்ளது. இதனால், நீட் விவகாரம் மற்றும் மாணவர் போராட்டம் தொடர்பான விவாதங்கள் வரும் நாட்களிலும் நாடாளுமன்றத்தில் கடும் மோதலை ஏற்படுத்தும் என எதிர்பார்க்கப்படுகிறது.

இதையும் படிங்க: நீட் வினாத்தாள் கசிவுக்கு முற்றுப்புள்ளி! கடும் சிறைத்தண்டனை, அதிக அபராதம்! வருகிறது புதிய சட்டம்!