சென்னை பட்டினப்பாக்கத்தில் சுமார் ரூ.1,200 கோடி மதிப்பில் புதிய தலைமைச் செயலகம் அமைக்க தமிழக அரசு திட்டமிட்டுள்ளது. இதற்கான முதல்கட்ட அனுமதியை வழங்கி அரசாணை வெளியிடப்பட்டுள்ள நிலையில், திட்டத்திற்கு மீனவர் அமைப்புகள் மட்டுமின்றி பல்வேறு அரசியல் கட்சிகளும் எதிர்ப்பு தெரிவித்து வரும் நிலையில், அதற்கான ஆணையை தமிழ்நாடு அரசு ரத்து செய்யவுள்ளதாக தகவல் வெளியாகியுள்ளது. 

தமிழக சட்டப்பேரவையில் கடந்த செப்டம்பர் 3-ஆம் தேதி முதலமைச்சர் விஜய், புதிய தலைமைச் செயலகம் அமைக்கப்படும் என்ற அறிவிப்பை வெளியிட்டார். இதைத் தொடர்ந்து, பட்டினப்பாக்கத்தில் உள்ள தமிழ்நாடு வீட்டு வசதி வாரியத்துக்குச் சொந்தமான நிலம் உள்ளிட்ட இடங்கள் பரிசீலிக்கப்பட்டு, இறுதியாக பட்டினப்பாக்கம் பகுதியில் உள்ள இடம் தேர்வு செய்யப்பட்டதாக தெரிவிக்கப்பட்டது.

அரசாணையின்படி, சுமார் 22 ஏக்கர் பரப்பளவில் 20 லட்சம் சதுர அடி அளவில் புதிய தலைமைச் செயலக வளாகம் அமைக்க திட்டமிடப்பட்டுள்ளது. இதற்காக கட்டடக் கலை நிபுணர்கள் அடங்கிய ஆலோசனைக் குழு உள்ளிட்ட தனித்தனி குழுக்கள் அமைக்கவும் நடவடிக்கை எடுக்கப்பட்டுள்ளது.

இதையும் படிங்க: ஆசிய பேட்மிண்டனில் வெண்கலம் வென்ற ஹரிஹரனுக்கு ₹30 லட்சம் ஊக்கத்தொகை! முதலமைச்சர் விஜய் வாழ்த்து!

ஏன் எதிர்ப்பு?

பட்டினப்பாக்கத்தில் தேர்வு செய்யப்பட்டுள்ள நிலம் தங்களது சமூகத்திற்காக பயன்படுத்தப்பட வேண்டிய இடம் என அப்பகுதி மீனவர்கள் தெரிவித்து வருகின்றனர்.

1958-ஆம் ஆண்டு இப்பகுதியில் வசித்த மீனவக் குடும்பங்கள் இடம்பெயர்க்கப்பட்டபோது, அவர்களுக்கு மாற்று வீடுகள் கட்டித் தரப்படும் என உறுதி அளிக்கப்பட்டதாகவும், பல ஆண்டுகள் கடந்தும் அந்த வாக்குறுதி முழுமையாக நிறைவேற்றப்படவில்லை என்றும் மீனவர்கள் குற்றம்சாட்டுகின்றனர். தற்போது அதே பகுதியில் புதிய தலைமைச் செயலகம் அமைக்க அரசு முடிவு செய்திருப்பதற்கு அவர்கள் எதிர்ப்பு தெரிவித்து வருகின்றனர்.

மேலும், புதிய தலைமைச் செயலகம் அமைக்கப்பட்டால் பாதுகாப்பு கட்டுப்பாடுகள் மற்றும் வாகனப் போக்குவரத்து அதிகரிப்பதால் தங்களது மீன்பிடித் தொழில் மற்றும் அன்றாட வாழ்வாதாரம் பாதிக்கப்படலாம் எனவும் மீனவர்கள் கவலை தெரிவிக்கின்றனர். முள்ளிக்குப்பம், முள்ளிமாநகர் உள்ளிட்ட பகுதிகளைச் சேர்ந்த சுமார் 1,200 முதல் 1,300 குடும்பங்கள் பாதிக்கப்படலாம் என மீனவர் தரப்பில் தெரிவிக்கப்பட்டுள்ளது.

மீனவர்கள் போராட்டம்:

திட்டத்திற்கு எதிராக மீனவர்கள் தொடர்ந்து ஆலோசனைக் கூட்டங்களை நடத்தி வருகின்றனர். மேலும், அரசாணையை ரத்து செய்ய வேண்டும் என வலியுறுத்தி செப்டம்பர் 29-ஆம் தேதி சென்னையில் மாபெரும் கண்டன ஆர்ப்பாட்டம் நடத்த உள்ளதாக முள்ளிக்குப்பம், முள்ளிமாநகர், மயிலை உள்ளிட்ட பகுதிகளின் மீனவ கிராம பஞ்சாயத்து சபைகள் அறிவித்துள்ளன.

புதிய தலைமைச் செயலகம் அமையவுள்ள பகுதியை மீனவர்களின் பாரம்பரிய குடியிருப்புப் பகுதியாக அறிவிக்க வேண்டும் என்றும், தங்களது கோரிக்கைகளுக்கு அரசு உரிய பதில் அளிக்க வேண்டும் என்றும் மீனவர் தரப்பில் வலியுறுத்தப்பட்டுள்ளது.

இதற்கு முன்பாக செப்டம்பர் 12-ஆம் தேதி பட்டினப்பாக்கம் லூப் ரோடு சந்திப்பு அருகே இந்திய கம்யூனிஸ்ட் கட்சியும் மீனவர்களுடன் இணைந்து போராட்டம் நடத்தியது. திட்டத்தை தற்போதைய இடத்தில் செயல்படுத்தாமல் மாற்று இடத்தைத் தேர்வு செய்ய வேண்டும் என்பது போராட்டக்காரர்களின் கோரிக்கையாக இருந்தது.

அரசியல் கட்சிகளின் எதிர்ப்பு: 

இந்தத் திட்டத்திற்கு திமுக, பாமக மற்றும் இடதுசாரிக் கட்சிகள் எதிர்ப்பு தெரிவித்துள்ளன. அதேபோல், ஆளும் தமிழக வெற்றிக் கழக அரசுக்கு ஆதரவு அளிக்கும் இடதுசாரிக் கட்சிகளும் திட்டத்தின் தற்போதைய இடத் தேர்வை மறுபரிசீலனை செய்ய வேண்டும் எனக் கோரியுள்ளன.

திமுக தலைவர் மு.க.ஸ்டாலின், பட்டினப்பாக்கத்தில் தலைமைச் செயலகம் அமைக்கும் முடிவை கைவிட்டு, மீனவர்களின் வாழ்விடங்களையும் வாழ்வாதாரத்தையும் பாதுகாக்க வேண்டும் என தெரிவித்துள்ளார். மேலும், அரசாணையை திரும்பப் பெறும் வரை மீனவர்களின் போராட்டத்திற்கு திமுக ஆதரவளிக்கும் என்றும் அவர் கூறியுள்ளார்.

பாமக தரப்பிலும், பட்டினப்பாக்கத்தில் தலைமைச் செயலகம் அமைக்கக் கூடாது என்றும், சென்னைக்கு வெளியே நிர்வாக நகரம் அமைப்பது குறித்து அரசு பரிசீலிக்க வேண்டும் என்றும் வலியுறுத்தப்பட்டுள்ளது. பட்டினப்பாக்கத்தில் திட்டம் அமைந்தால் மீனவர்களின் வாழ்வாதாரம் பாதிக்கப்படுவதுடன், போக்குவரத்து நெரிசலும் அதிகரிக்கும் என அக்கட்சி தரப்பில் தெரிவிக்கப்பட்டுள்ளது.

மார்க்சிஸ்ட் கம்யூனிஸ்ட் கட்சி, திட்டம் தொடர்பாக அனைத்துக் கட்சிக் கூட்டத்தை நடத்த வேண்டும் என்றும், தற்போதைய இடத்தில் எந்தப் பணியையும் தொடங்கக் கூடாது என்றும் வலியுறுத்தியுள்ளது. இந்திய கம்யூனிஸ்ட் கட்சி திட்டத்திற்கு எதிராக போராட்டமும் நடத்தியுள்ளது.

நீதிமன்றத்திலும் வழக்கு: 

இதனிடையே, பட்டினப்பாக்கத்தில் புதிய தலைமைச் செயலகம் அமைக்கும் திட்டத்துக்கு எதிராக சென்னை உயர் நீதிமன்றத்திலும் மனுக்கள் தாக்கல் செய்யப்பட்டுள்ளன.

திமுக முன்னாள் எம்எல்ஏ வேலு தாக்கல் செய்த மனுவில், அரசாணையை ரத்து செய்ய வேண்டும் என கோரப்பட்டுள்ளதுடன், சுற்றுச்சூழல் துறை, தமிழ்நாடு மாநில கடலோர மண்டல மேலாண்மை ஆணையம், மீன்வளத்துறை உள்ளிட்ட துறைகளின் ஒப்புதல்கள் தொடர்பான விவரங்கள் அரசாணையில் இடம்பெறவில்லை என்றும் வாதிடப்பட்டுள்ளது.

மற்றொரு மனுவிலும், திட்டத்தால் பொதுமக்களுக்கும் மீனவர் சமூகத்தினருக்கும் பாதிப்பு ஏற்படலாம் என்றும், சுற்றுச்சூழல் மற்றும் வாழ்வாதாரப் பிரச்சினைகள் உருவாகலாம் என்றும் குறிப்பிடப்பட்டுள்ளது.

அரசின் தரப்பில் என்ன நிலைப்பாடு?

இதற்கிடையே, திட்டம் தொடர்பாக இறுதி முடிவு இன்னும் எடுக்கப்படவில்லை என்றும், விரிவான திட்ட அறிக்கை உள்ளிட்ட அடுத்தகட்ட நடவடிக்கைகள் குறித்து பரிசீலனை நடைபெறுவதாகவும் அமைச்சர் ஆதவ் அர்ஜுனா தெரிவித்திருந்தார். 

தற்போதைய நிலையில்,  பட்டினப்பாக்கத்தில் புதிய தலைமைச் செயலகம் அமைப்பதற்கான அரசாணையை ரத்து செய்து ஆணை வெளியிட தவெக அரசு திட்டமிட்டுள்ளதாக தகவல் வெளியாகியுள்ளது. செப்டம்பர் 29-ஆம் தேதி அறிவிக்கப்பட்டுள்ள மீனவர்களின் கண்டன ஆர்ப்பாட்டத்தைத் தொடர்ந்து, இந்த விவகாரத்தில் தமிழக அரசின் அடுத்தகட்ட நடவடிக்கை முக்கியத்துவம் பெற்றுள்ளது.
 

இதையும் படிங்க: பாரிமுனை கதர் வாரிய கொலு கண்காட்சியில் முதல்வர் விஜய் சிலை! அமைச்சர் விஜய் பாலாஜி தொடங்கி வைத்தார்!