டெல்லியில் நடைபெற்ற பொதுக்கூட்டத்தில் பிரதமர் நரேந்திர மோடி, தனது 25 ஆண்டுகால அரசியல் பயணத்தை நினைவுகூர்ந்து, இந்த நீண்ட கால பொதுச்சேவைக்கு மக்களின் ஆதரவும் நம்பிக்கையுமே முக்கிய காரணம் என தெரிவித்துள்ளார்.
2001-ம் ஆண்டு இதே நாளில் குஜராத் முதல்வராக பதவியேற்றபோது, எதிர்காலத்தில் இவ்வளவு உயர்ந்த பொறுப்பை வகிப்பேன் என எதிர்பார்க்கவில்லை என்றும் அவர் குறிப்பிட்டார்.
25 ஆண்டுகளாக தொடர்ந்து பொது வாழ்க்கையில் இருப்பதற்கு மக்களின் ஆசீர்வாதமே காரணம் என தெரிவித்த மோடி, தான் தற்போது வகிக்கும் பொறுப்புக்கும் மக்களின் பங்களிப்பு மிக முக்கியமானது என்றார்.
இதையும் படிங்க: நாட்டு மக்களின் நல்வாழ்வுக்காக பிரார்த்தனை!! 25 ஆண்டு பொதுச்சேவை நிறைவு! பிரதமர் மோடி சிறப்பு வழிபாடு!
இந்த நாள் வெறும் கடந்த காலத்தை நினைவுகூருவதற்கான நாள் மட்டுமல்ல என்றும், எதிர்கால பணிகளுக்கான புதிய உறுதியை ஏற்படுத்தும் நாளாகவும் இதை பார்க்க வேண்டும் என்றும் கூறினார்.
தேர்தல்களில் மக்கள் மீண்டும் மீண்டும் தன்னை தேர்வு செய்து சேவை செய்வதற்கான வாய்ப்பை வழங்கியதாக குறிப்பிட்ட அவர், இந்திய ஜனநாயகம் மற்றும் அரசியலமைப்பின் மீது தனது ஆழ்ந்த மரியாதையையும் வெளிப்படுத்தினார்.
தன்னை ஆதரித்தவர்களின் நம்பிக்கையும், கட்சி தொண்டர்களின் கடின உழைப்பும் தனது மிகப்பெரிய பலமாக இருந்ததாகவும் அவர் கூறினார்.
இதற்கிடையே, டெல்லியில் உள்ள விநாயகர் கோவிலில் வழிபட்டதாக தெரிவித்த மோடி, இந்திய மக்கள் அனைவருக்காகவும் பிரார்த்தனை செய்ததாக கூறினார். நாட்டுக்காக மேலும் அதிக ஆற்றலுடன் பணியாற்றவும், மக்களுக்கு சேவை செய்யவும் தேவையான வலிமையை இறைவன் வழங்க வேண்டும் என்பதே தனது வேண்டுதல் என்றும் தெரிவித்தார்.
அரசியல் ஆதாயத்திற்காக சமூகத்தை ஓட்டு வங்கி அடிப்படையில் பிரிப்பது நாட்டின் முக்கியமான பிரச்னைகளில் ஒன்று என குறிப்பிட்ட பிரதமர், அரசின் நலத்திட்டங்கள் தகுதியான அனைத்து பயனாளிகளையும் சென்றடைய வேண்டும் என்றார்.
தனது இளமை காலத்திலிருந்தே கற்றுக்கொள்வதில் ஆர்வம் கொண்டிருந்ததாகவும், இன்றும் தன்னை வாழ்நாள் முழுவதும் கற்றுக்கொள்ளும் மாணவராகவே கருதுவதாகவும் மோடி தெரிவித்தார்.
இந்தியாவின் திறமை குறித்து உலகம் பேசும் காலம் வந்துள்ளதாக குறிப்பிட்ட அவர், இந்தியாவில் தயாரிக்கப்படும் விமானங்கள் உள்ளிட்ட உள்நாட்டு தொழில்நுட்ப வளர்ச்சிகள் நாட்டின் பெருமையை உயர்த்தும் என்றும் கூறினார். 2047-ம் ஆண்டுக்குள் இந்தியாவை வளர்ந்த நாடாக உருவாக்க அனைவரும் உறுதி ஏற்க வேண்டும் எனவும் பிரதமர் அழைப்பு விடுத்தார்.
இதையும் படிங்க: ரஷ்யா-உக்ரைன் போர்: களத்தில் இறங்கிய இந்தியா! புடின், ஜெலன்ஸ்கியுடன் அடுத்தடுத்து பேச்சு!