இந்தியப் பெருங்கடலின் அழகிய தீவு நாடான செஷல்ஸ், தனது 50-வது தேசிய தினத்தை வரும் ஜூன் 29-ம் தேதி பிரமாண்டமாகக் கொண்டாட உள்ளது. இந்த முக்கிய விழாவில் இந்தியப் பிரதமர் நரேந்திர மோடி சிறப்பு விருந்தினராகக் கலந்துகொள்ள இருக்கிறார். நாளை தொடங்கும் மூன்று நாள் அரசு முறைப் பயணத்தின்போது பிரதமர் மோடி செஷல்ஸ் செல்ல உள்ளார். 

இந்தியக் கடற்படையின் இரு போர்க் கப்பல்கள் மற்றும் பாதுகாப்புப் படையினர் தேசிய தின அணிவகுப்பு உள்ளிட்ட நிகழ்ச்சிகளில் பங்கேற்பார்கள். பயணத்தின்போது செஷல்ஸ் அதிபர் பேட்ரிக் உடன் இருதரப்பு உயர்மட்டப் பேச்சுவார்த்தை நடத்தவும், செஷல்ஸ் நாடாளுமன்றத்தில் உரையாற்றவும் திட்டமிடப்பட்டுள்ளது. மேலும், அங்கு வாழும் இந்திய வம்சாவளியினரைச் சந்தித்து அவர்களுடன் உரையாடவும் பிரதமர் திட்டமிட்டுள்ளார்.

இந்தியா-செஷல்ஸ் உறவுகள் வரலாற்று ரீதியாகவும், கலாசார ரீதியாகவும், மக்கள் தொடர்பு ரீதியாகவும் மிக நீண்டகாலம் கொண்டவை. இரு நாடுகளும் இந்தியப் பெருங்கடல் பிராந்தியத்தில் பாதுகாப்பு, பொருளாதார ஒத்துழைப்பு, சுற்றுலா மேம்பாடு, சுற்றுச்சூழல் பாதுகாப்பு உள்ளிட்ட பல்வேறு துறைகளில் நெருக்கமாக இணைந்து செயல்பட்டு வருகின்றன. பிரதமர் மோடியின் இந்தப் பயணம், ஏற்கெனவே வலுவான இருதரப்பு உறவுகளை மேலும் பலப்படுத்தி, புதிய ஒத்துழைப்புகளுக்கு வழிவகுக்கும் என மத்திய வெளியுறவு அமைச்சகம் தெரிவித்துள்ளது.

இதையும் படிங்க: NLC பங்கு விற்பனை முடிவை மறுபரிசீலனை செய்க..!! பிரதமர் மோடிக்கு முதல்வர் விஜய் கடிதம்..!!

செஷல்ஸில் வசிக்கும் இந்திய வம்சாவளியினர் பிரதமரின் வருகையை உற்சாகத்துடன் எதிர்பார்த்து வருகின்றனர். பல்வேறு நிகழ்ச்சிகளை ஏற்பாடு செய்து, தங்கள் பாரம்பரியத்தைப் பிரதமருடன் பகிர்ந்துகொள்ள தயாராகி வருகின்றனர். இது பிரதமர் மோடியின் செஷல்ஸ் நாட்டிற்கான இரண்டாவது பயணமாகும். முன்னதாக 2015-ம் ஆண்டு அவர் இந்நாட்டுக்கு விஜயம் செய்திருந்தார்.

இந்தப் பயணம் இந்தியப் பெருங்கடல் பிராந்தியத்தில் இந்தியாவின் உத்தியோகபூர்வ உறவுகளை வலுப்படுத்தும் முக்கிய நிகழ்வாகப் பார்க்கப்படுகிறது. செஷல்ஸ் போன்ற நட்பு நாடுகளுடனான தொடர்புகள், இந்தியாவின் ‘அண்டை நாடு முதல்’ கொள்கை மற்றும் இந்தியப் பெருங்கடல் பாதுகாப்பு உத்தியின் அங்கமாகவும் அமைகிறது.
 

இதையும் படிங்க: அலி கமேனி மறைவு: இறுதிச் சடங்கில் கலந்துகொள்ள பிரதமர் மோடிக்கு ஈரான் அழைப்பு..!!