புதுச்சேரி மாநில அரசு பொறுப்பேற்றதிலிருந்து உள்கட்டமைப்பு வளர்ச்சியில் குறிப்பிடத்தக்க முன்னேற்றங்களைச் செய்துள்ளதாக முதலமைச்சர் என். ரங்கசாமி தெரிவித்தார். இதுகுறித்து செய்தியாளர்களிடம் பேசிய அவர், அரசின் முயற்சிகளால் பல்வேறு துறைகளில் பணிகள் விரைவாக நடைபெற்று வருவதாகக் கூறினார்.

முதலமைச்சர் ரங்கசாமி கூறுகையில், "எங்கள் அரசு ஆட்சிப் பொறுப்பை ஏற்ற பிறகு, உள்கட்டமைப்பு தொடர்பான பல்வேறு திட்டங்களைச் செயல்படுத்தியுள்ளோம். பொதுப்பணித் துறை மற்றும் உள்ளாட்சி அமைப்புகள் மூலம் ஏராளமான பணிகள் மேற்கொள்ளப்பட்டுள்ளன. புதுவை மாநிலத்தின் உள்கட்டமைப்பை மேம்படுத்துவது, மக்களுக்கான நலத்திட்டங்களை திறம்பட அமல்படுத்துவது, தரமான கல்வி, மருத்துவ வசதிகள் மற்றும் அடிப்படைத் தேவைகளை உறுதிப்படுத்துவது ஆகியவையே அரசின் முதன்மை இலக்குகள்" என்றார்.

இதையும் படிங்க: பரபரக்கும் அரசியல் களம்..!! தவெகவில் ஐக்கியமான முன்னாள் ஐ.ஜி..!! யார் இந்த சந்திரன்..??

மக்களின் கோரிக்கைகளை ஏற்று, சட்டமன்ற உறுப்பினர்களின் வேண்டுகோள்களைப் பரிசீலித்து, சட்டசபைத் தேர்தலின்போது அளிக்கப்பட்ட அனைத்து வாக்குறுதிகளையும் அரசு நிறைவேற்றியுள்ளதாக அவர் சுட்டிக்காட்டினார். "ஒவ்வொரு சட்டமன்றத் தொகுதியிலும் சமமான அளவில் வளர்ச்சிப் பணிகள் மேற்கொள்ளப்பட்டுள்ளன. புதுவை மாநிலம் ஒட்டுமொத்தமாக வளர்ச்சி பெற வேண்டும் என்பதில் அரசு தீவிர கவனம் செலுத்தி வருகிறது" என்று அவர் வலியுறுத்தினார்.

மேலும், புதுவை, காரைக்கால், மாஹே, ஏனாம் ஆகிய நான்கு பிராந்தியங்களிலும் இன்னும் பல மக்கள் நலன் சார்ந்த திட்டங்கள் தொடங்கப்பட உள்ளதாக முதலமைச்சர் உறுதியளித்தார். "அரசு நல்லாட்சியை வழங்கி, மக்களின் குறைகளை கேட்டறிந்து அவற்றை உடனடியாகத் தீர்க்கும் வகையில் செயல்பட்டு வருகிறது. எந்தவித அரசு உதவியும் பெறாத குடும்பத் தலைவிகளுக்கு மாதந்தோறும் ரூ.1,000 உதவித் தொகை வழங்கப்பட்டு வருகிறது. இதை ரூ.2,500 ஆக உயர்த்தி வழங்குவதாக அரசு அறிவித்துள்ளது. இந்த உயர்த்தப்பட்ட தொகை வரும் 12-ம் தேதி அல்லது பொங்கல் பண்டிகைக்குப் பிறகு வழங்கப்படும்" என்று அவர் விளக்கினார்.

மஞ்சள் ரேஷன் அட்டை வைத்திருக்கும் குடும்பத் தலைவிகளுக்கும் இந்த உதவித் தொகை வழங்குவதற்கான நடவடிக்கைகள் மேற்கொள்ளப்படும் என்று ரங்கசாமி கூறினார். மேலும், முதியோர்கள் உட்பட பல்வேறு பிரிவினருக்கான உதவித் தொகையை ரூ.500 உயர்த்தி வழங்குவதாக அரசு அறிவித்துள்ளது. இந்த உயர்வும் விரைவில் அமல்படுத்தப்படும் என்று அவர் உறுதியளித்தார்.

பொங்கல் பண்டிகையை முன்னிட்டு, பொங்கல் தொகுப்புகள் வழங்கப்பட்டு வருவதாகக் குறிப்பிட்ட முதலமைச்சர், "பொங்கலுக்கு எந்த அளவுக்கு பரிசுத் தொகை வழங்க முடியுமோ, அவை அனைத்தும் வழங்கப்படும்" என்றார். போலி மருந்துகள் விவகாரம் தொடர்பாக வெளிப்படைத்தன்மையுடன் அறிக்கை வெளியிடப்படும் என்றும் அவர் தெரிவித்தார். இந்த அறிவிப்புகள் மக்களிடையே வரவேற்பைப் பெற்றுள்ளன. அரசின் இத்தகைய நடவடிக்கைகள் மாநிலத்தின் சமூக-பொருளாதார வளர்ச்சியை மேலும் வலுப்படுத்தும் என எதிர்பார்க்கப்படுகிறது.

இதையும் படிங்க: #BREAKING: “அந்த சிவப்பு கோடு இல்லையா? தொடவே வேண்டாம்!” - போலி மருந்துகளை துரத்தும் சுகாதாரத்துறை!