மக்களவை எதிர்க்கட்சித் தலைவரும், காங்கிரஸ் முன்னாள் தலைவருமான ராகுல் காந்தி தொடர்ந்து வெளிநாட்டுப் பயணங்களை மேற்கொண்டு வருவது பாஜகவின் கடும் விமர்சனத்துக்கு உள்ளாகியுள்ளது. தற்போது மீண்டும் ஒரு வெளிநாட்டுப் பயணத்தில் ஈடுபட்டுள்ள ராகுல் காந்தியை நோக்கி பாஜக “காணாமல் போன ராகுல் காந்தி”, “ராகுல் காந்தி எங்கே?”, “பாரீசில் ராகுல்” போன்ற போஸ்டர்கள் மூலம் கிண்டலும் தாக்குதலும் நடத்தி வருகிறது.

பாஜக தேசிய செய்தித் தொடர்பாளர் ஷேசாத் பூனவாலா இதுகுறித்து கூர்மையாக விமர்சித்தார். “லீடர் ஆஃப் ஒப்போசிஷன் (LoP) என்பதை ‘லீடர் ஆஃப் பர்யாடன்’ (சுற்றுலாத் தலைவர்) என மாற்ற வேண்டும்” என்று கூறினார். ராகுல் காந்தி வெளிநாட்டுப் பயணத்தை மட்டுமே தொடர்ந்து செய்து வருவதாகவும், நாட்டின் பிரதமர் நரேந்திர மோடி கடுமையாக உழைத்து நாட்டை முன்னேற்றும் பணியில் ஈடுபட்டுள்ளதாகவும் அவர் சுட்டிக்காட்டினார்.

பாஜக செய்தித் தொடர்பாளர் ஆர்.பி. சிங் மேலும் தகவல் தெரிவித்தார். “இது ராகுல் காந்தியின் 55-வது வெளிநாட்டுப் பயணம். பொதுத் தகவல்கள் மற்றும் ஆவணங்களின்படி அவர் 60 கோடி ரூபாய்க்கு மேல் செலவழித்துள்ளார். ஆனால் இந்தத் தொகைக்கு ஏற்ற வருமானத்தை அவர் காட்டவில்லை. வருமான வரியாகவும் போதிய தொகையைச் செலுத்தவில்லை. இந்தப் பணம் எங்கிருந்து வருகிறது? யார் இந்த செலவுகளை ஏற்கிறார்கள்?” என்று கேள்விகளை எழுப்பினார்.

இதையும் படிங்க: வீதிகளில் இருந்து நாடாளுமன்றம் வரை.. மக்களின் நம்பிக்கையே எனது பலம்..!! ராகுல் காந்தி உருக்கம்..!!

இந்த விமர்சனங்களுக்கு காங்கிரஸ் தரப்பில் உடனடி பதிலடி கொடுக்கப்பட்டது. மூத்த காங்கிரஸ் தலைவர் சல்மான் குர்ஷித் கூறுகையில், “ராகுல் காந்தி தமது நாட்டுக்கு மட்டும் தலைவர் அல்லர். பல நாடுகளில் அவரை தலைவராக மக்கள் பார்க்கின்றனர். ஏராளமான மக்கள் அவரை சந்திக்கவும், அவரது பேச்சுகளைக் கேட்கவும் ஆவலுடன் காத்திருக்கின்றனர். தொடர் அழைப்புகள் காரணமாக அவரால் ஒரு நாட்டில் இரண்டு, நான்கு அல்லது ஐந்து நாட்கள் மட்டுமே தங்க முடிகிறது. அதன் பின்னர் அடுத்த பயணத்துக்கு செல்ல வேண்டிய நிலை உள்ளது” என்றார்.

மேலும், “உலகில் உள்ள அனைவரும் பாஜகவின் கொள்கைகளுடன் உடன்பட வேண்டும் என்பதில்லை. மக்கள் இந்தியாவை வெவ்வேறு கண்ணோட்டங்களில் பார்க்கின்றனர். அதே பார்வையில் ராகுல் காந்தியையும் அவர்கள் மதிக்கின்றனர்” என்று சல்மான் குர்ஷித் தெரிவித்தார். இந்த சர்ச்சை இரு கட்சிகளுக்கும் இடையேயான அரசியல் மோதலை மேலும் தீவிரப்படுத்தியுள்ளது. 

எதிர்க்கட்சித் தலைவரின் பயணங்கள் நாட்டின் உருவகத்தை உயர்த்தும் வாய்ப்புகளாக காங்கிரஸ் கருதினாலும், பாஜக அவற்றை பொது நிதி மற்றும் பொறுப்புணர்வு சார்ந்த கேள்விகளாக முன்வைக்கிறது. ராகுல் காந்தியின் வெளிநாட்டுப் பயணங்கள் தொடர்பான செலவு விவரங்கள் மற்றும் நிதி ஆதாரங்கள் குறித்து முழுமையான வெளிப்படைத்தன்மை வேண்டும் என பாஜக வலியுறுத்தி வருகிறது.
 

இதையும் படிங்க: சிவராஜ் சிங் சவுகான் மகன் மீதான புகார்: மத்திய பிரதேச உயர் நீதிமன்றத்தில் ராகுல் காந்தி மனு தாக்கல்!