ராஜஸ்தான்: தன் தலையில் 10 கிலோ எடையுள்ள பால் கேன் மாட்டிக்கொண்டு இரண்டு மணி நேரம் தவித்த இளைஞர், இறுதியில் கிராமவாசிகளின் உதவியால் கேனை அகற்றி நிம்மதி அடைந்த சம்பவம் ராஜஸ்தானில் பெரும் பரபரப்பை ஏற்படுத்தியுள்ளது.

மாதோகர் கிராமத்தைச் சேர்ந்த கலுராம் ரெபரி என்பவர், பண்ணைக்குச் செல்லும் வழியில் இருசக்கர வாகனத்தில் பயணித்துக் கொண்டிருந்தார். வெயில் தாங்க முடியாமல், கையில் வைத்திருந்த 10 கிலோ எடையுள்ள காலி பால் கேனைத் தலையில் கவிழ்த்து வைத்தபடி சென்றார். ஆனால், அந்தக் கேன் அவரது தலையில் இறுக்கமாக மாட்டிக்கொண்டது. 

கேனை எடுக்க பல முயற்சிகள் செய்தும் அவரால் முடியவில்லை. பீதியடைந்த கலுராம், உடனடியாக உதவிக்கு அழைத்தார். செய்தியை அறிந்த கிராமவாசிகள் அவரை அருகிலுள்ள கிராமத்துக்கு அழைத்துச் சென்றனர். அங்கு அவரை ஒரு குறிப்பிட்ட நிலையில் படுக்க வைத்து, கட்டர் கொண்டு கேனின் மேல் பகுதியை கவனமாக வெட்டினர். சுமார் 2 மணி நேரம் போராட்டத்துக்குப் பிறகு, கேன் அவரது தலையிலிருந்து வெற்றிகரமாக அகற்றப்பட்டது.

இதையும் படிங்க: அமெரிக்க ராணுவ தளங்களை பந்தாடிய ஈரான்!! சீரமைக்க பல கோடி செலவாகும் என அமெரிக்கா புலம்பல்!

அதிர்ஷ்டவசமாக, இந்தச் சம்பவத்தில் கலுராம் ரெபரிக்கு எந்தக் காயமும் ஏற்படவில்லை. கேன் அகற்றப்பட்ட உடனேயே அவர் நிம்மதிப் பெருமூச்சு விட்டார். சம்பவத்தின் போது அவரது முகத்தில் தெரிந்த பீதியும், பின்னர் ஏற்பட்ட நிம்மதியும் வீடியோவில் தெளிவாகப் பதிவாகியுள்ளது.

இந்த வீடியோ தற்போது சமூக ஊடகங்களில் வைரலாகி வருகிறது. நெட்டிசன்கள் பலரும் இந்தச் சம்பவத்தை பார்த்து அதிர்ச்சியும், ஆச்சரியமும் தெரிவித்து வருகின்றனர். சிலர் “வெயிலில் இருந்து தப்பிக்க நினைத்த இடத்தில் இப்படி ஒரு சிக்கல்” என்றும், மற்றவர்கள் “கிராமவாசிகளின் உடனடி உதவி பாராட்டுக்குரியது” என்றும் கருத்து தெரிவித்துள்ளனர்.

இந்த விபத்து போன்ற சம்பவம், வெயில் காலத்தில் மக்கள் எடுக்கும் சிறு முயற்சிகள் கூட சில சமயங்களில் எதிர்பாராத பிரச்னைகளை ஏற்படுத்தும் என்பதை நினைவூட்டுகிறது. அதேசமயம், கிராமப்புறங்களில் இன்னும் கூட மக்கள் ஒருவருக்கு ஒருவர் உதவும் மனப்பான்மை இருப்பது ஆறுதலளிக்கிறது.

கலுராம் ரெபரி இப்போது நலமுடன் இருப்பதாகவும், இனிமேல் இத்தகைய முயற்சிகளை எடுக்காமல் இருப்பதாகவும் அவரது உறவினர்கள் தெரிவித்துள்ளனர்.

இதையும் படிங்க: துரோகி!! பாஜகவுக்கு தாவிய ஹர்பஜன் சிங்!! வீட்டு சுவற்றில் எதிர்ப்பை பதிவு செய்த போராட்டக்காரர்கள்!