சர்வதேச போர் பதற்றங்கள் அதிகரித்து வரும் நிலையில், ரிசர்வ் வங்கி இந்தியா (RBI) தனது முக்கிய வட்டி விகிதத்தில் எந்த மாற்றமும் செய்யாமல் நிலைநிறுத்தியுள்ளது. வங்கிகளுக்கு ரிசர்வ் வங்கி வழங்கும் குறுகிய காலக் கடன்களுக்கான ரெப்போ வட்டி விகிதம் தொடர்ந்து 5.25 சதவீதமாகவே இருக்கும் என ரிசர்வ் வங்கி கவர்னர் சஞ்சய் மல்ஹோத்ரா இன்று அறிவித்தார்.
இரு மாதங்களுக்கு ஒருமுறை நடைபெறும் நிதிக் கொள்கை குழு (MPC) கூட்டம் ஏப்ரல் 6 முதல் 8 வரை நடைபெற்றது. மூன்று நாள் ஆலோசனைக்குப் பிறகு இன்று முடிவுகள் அறிவிக்கப்பட்டன. உலக அளவில் ஏற்பட்டுள்ள பதற்றங்கள், குறிப்பாக மேற்கு ஆசியப் பகுதியில் நிலவும் போர் நிலைமை காரணமாக கச்சா எண்ணெய் விலை பெருமளவில் உயர்ந்துள்ளது. இது இந்தியாவின் இறக்குமதி செலவை அதிகரிக்கும் அபாயத்தை ஏற்படுத்தியுள்ளது. இதனால் பணவீக்க அழுத்தம் அதிகரிக்கும் என ரிசர்வ் வங்கி கருதுகிறது.
ரெப்போ வட்டி விகிதம் மாற்றப்படாமல் இருப்பது, வங்கிகளின் கடன் வழங்கும் விகிதங்கள் உடனடியாக மாறாது என்பதை குறிக்கிறது. வீட்டுக் கடன், வாகனக் கடன், தனிநபர் கடன் உள்ளிட்டவற்றின் மாதாந்திர தவணை (EMI) இப்போதைக்கு அதிகரிக்காது. இது சாதாரண மக்களுக்கு சற்று நிம்மதியை அளிக்கும். அதேசமயம், வைப்பு நிதி (FD) வட்டி விகிதங்களும் பெரிய அளவில் மாற்றம் அடையாது.
இதையும் படிங்க: அமைச்சர் மனைவிகளில் யாருக்கு சொத்து அதிகம்?!! வெளியானது டாப் 10 பட்டியல்!
ரிசர்வ் வங்கி இந்த ஆண்டுக்கான பொருளாதார வளர்ச்சி (GDP) 6.9 சதவீதமாக இருக்கும் என மதிப்பிட்டுள்ளது. பணவீக்கம் 4.6 சதவீத அளவில் இருக்கும் என எதிர்பார்க்கப்படுகிறது. இருப்பினும், ஹார்முஸ் ஜலசந்தி போன்ற முக்கிய பகுதிகளில் ஏற்படும் இடையூறுகள், எண்ணெய் விலை உயர்வு, ரூபாய் மதிப்பு குறைவு ஆகியவை பொருளாதாரத்துக்கு சவால்களை ஏற்படுத்தும் என கவர்னர் எச்சரித்துள்ளார்.
ரெப்போ வட்டி விகிதம் என்பது ரிசர்வ் வங்கி வங்கிகளுக்கு வழங்கும் கடனுக்கான வட்டி விகிதமாகும். இது குறைந்தால் வங்கிகள் குறைந்த வட்டியில் கடன் கொடுக்கும். அதிகரித்தால் வட்டி உயரும். தற்போது நடுநிலை (Neutral) அணுகுமுறையை ரிசர்வ் வங்கி தொடர்கிறது. அடுத்த கூட்டங்களில் பொருளாதார நிலவரத்தை கண்காணித்து முடிவெடுக்கப்படும்.
இந்த முடிவு பங்குச் சந்தை, தங்கம், அந்நிய செலாவணி உள்ளிட்டவற்றில் உடனடி பெரிய மாற்றத்தை ஏற்படுத்தாது என எதிர்பார்க்கப்படுகிறது. சர்வதேச சூழல் சீராக இல்லாத நிலையில், ரிசர்வ் வங்கியின் இந்த எச்சரிக்கையான அணுகுமுறை இந்தியப் பொருளாதாரத்தை பாதுகாக்க உதவும் என பொருளாதார வல்லுநர்கள் கருதுகின்றனர். தமிழகம் உள்ளிட்ட மாநிலங்களில் உள்ள தொழில், வியாபாரம், வீட்டுக் கடன் வாங்குபவர்கள் இந்த முடிவை உன்னிப்பாக கவனித்து வருகின்றனர்.
இதையும் படிங்க: கள்ளக்காதலனுடன் செல்வதாக அடம் பிடித்த மனைவி!! கணவன் விபரீத முடிவு!! போலீஸ் கண்முன்னே பயங்கரம்!