சென்னை: தமிழக அரசியலில் பெரும் மாற்றத்தை ஏற்படுத்தியுள்ளது அம்மா மக்கள் முன்னேற்றக் கழகம் (அமமுக) பொதுச்செயலாளர் டி.டி.வி. தினகரனின் தேசிய ஜனநாயக கூட்டணி (என்டிஏ) இணைப்பு. ஜனவரி 21, 2026 அன்று மத்திய அமைச்சர் பியூஷ் கோயல் முன்னிலையில் தினகரன் அதிகாரப்பூர்வமாக என்டிஏவில் இணைந்தார். அதிமுக பொதுச்செயலாளர் எடப்பாடி கே. பழனிசாமியுடன் முன்பு இருந்த மோதல்களை 'பங்காளி சண்டை' என்று கூறி ஒதுக்கிவிட்டு, ஜெயலலிதா ஆட்சியை மீட்டெடுக்கும் நோக்கில் இணைந்ததாக தினகரன் தெரிவித்தார்.
இந்த இணைப்பின் பின்னணியில் ஆர்எஸ்எஸ் (ராஷ்ட்ரீய ஸ்வயம்சேவக் சங்கம்) முக்கிய பங்கு வகித்துள்ளதாக பாஜக வட்டாரங்கள் தெரிவிக்கின்றன. 2021 சட்டமன்றத் தேர்தலின்போதே அதிமுக தலைவர் எடப்பாடி பழனிசாமியையும் தினகரனையும் இணைக்க மத்திய உள்துறை அமைச்சர் அமித் ஷா முயற்சி மேற்கொண்டார். ஆனால் பழனிசாமி ஒப்புக்கொள்ளாததால் கூட்டணி பலவீனமடைந்து ஆட்சியை இழந்ததாக கூறப்படுகிறது.
இதனால் 2026 சட்டமன்றத் தேர்தலுக்கான வியூகத்தை ஆர்எஸ்எஸ் திட்டமிட்டு, பாஜகவுடன் இணைந்து செயல்படுத்தியதாக பாஜக வட்டாரங்கள் தெரிவிக்கின்றன. இதன் ஒரு பகுதியாக கடந்த நவம்பர் 18-ஆம் தேதி டெல்லி ஆர்எஸ்எஸ் முக்கிய தலைவர்களில் ஒருவரான அருண்குமார் சென்னை வந்து பழனிசாமியை சந்தித்தார். பீஹாரில் எதிரெதிர் தரப்பில் இருந்த நிதிஷ் குமார் மற்றும் சிராக் பஸ்வானை ஒரே கூட்டணிக்குள் கொண்டு வந்த வெற்றிகரமான முயற்சியை எடுத்துரைத்து, தமிழகத்தில் அதே மாதிரி இணைப்பை ஏற்படுத்த வேண்டும் என்று வலியுறுத்தினார்.
இதையும் படிங்க: டெல்லியில் இருந்து வந்த உத்தரவு!! விஜயை டீலில் விட்ட டிடிவி!! திடீர் யூ டர்ன்னுக்கு இதுதான் காரணம்!
அதேபோல் தமிழக ஆர்எஸ்எஸ் தலைவர்கள் மூலம் தினகரனிடமும் இதே கருத்து பகிரப்பட்டது. இதனால் இரு தரப்பும் என்டிஏ கூட்டணிக்குள் இணைய ஒப்புக்கொண்டதாக பாஜக வட்டாரங்கள் கூறுகின்றன. இந்த இணைப்பு என்டிஏவுக்கு கூடுதல் வலிமை சேர்க்கும் என எதிர்பார்க்கப்படுகிறது. பாஜக தலைமையிலான கூட்டணியில் அதிமுக, பாமக (அன்புமணி), அமமுக உள்ளிட்ட கட்சிகள் இடம்பெற்றுள்ளன. தேமுதிகவுடனும் பேச்சுவார்த்தை நடைபெற்று வருகிறது.
தினகரன் இணைப்பால் தென்மாவட்டங்கள், தேவர்கள் வாக்குகள் உள்ளிட்டவை என்டிஏவுக்கு வலுப்பெறும் என்று அரசியல் வட்டாரங்கள் கருதுகின்றன. டிஎம்கே ஆட்சியை வீழ்த்துவதே இலக்கு என்று தினகரனும், அமித் ஷாவும் தெரிவித்துள்ளனர். வரும் ஜனவரி 23-ஆம் தேதி பிரதமர் மோடி தமிழகத்தில் நடத்தவுள்ள பிரமாண்ட பொதுக்கூட்டத்தில் இந்த கூட்டணி வலிமை மேலும் வெளிப்படும் என எதிர்பார்க்கப்படுகிறது.
இந்த அரசியல் இணைப்பு தமிழகத்தில் 2026 தேர்தல் களத்தை மாற்றி அமைக்கும் முக்கிய திருப்பமாக பார்க்கப்படுகிறது.
இதையும் படிங்க: கூட்டணியில் இணைந்த டிடிவி!! நேரில் சந்திக்க முரண்டு பிடிக்கும் எடப்பாடி! பரபரக்கும் அரசியல் பின்னணி!