வாக்காளர் பட்டியலில் சிறப்பு தீவிர திருத்தப் பணியை (SIR) எதிர்த்து திமுக, காங்கிரஸ், சிபிஐ(எம்) உள்ளிட்ட கூட்டணிகள் சுப்ரீம் கோர்ட்டில் தாக்கல் செய்த மனுக்களை விசாரித்தது. "தேர்தல் கமிஷன் போஸ்ட் ஆபீஸ் அல்ல! படிவம் 6-ஐ அப்படியே ஏற்க வேண்டும் என்றால், அது உண்மையானதா என சரிபார்க்க அதிகாரம் உண்டு" என்று கடுமையாகக் கூறி நீதிமன்றம் காட்டம்காட்டியது. 

ஆதார் அட்டை ஓட்டுரிமைக்கு சான்று இல்லை என்றும், அண்டை நாட்டு தொழிலாளர்கள் ஆதார் வைத்திருந்தால் அவர்களுக்கும் வாக்குரிமை தருவதா? என்றும் கேள்வி எழுப்பியது. பீகாரைத் தொடர்ந்து தமிழகம், கேரளா, மேற்கு வங்கம் உள்ளிட்ட 12 மாநிலங்களில் நடக்கும் SIR-ஐ எதிர்த்து வந்த வழக்குகளுக்கு தனித்தேதிகள் நிர்ணயித்துள்ளது.

நவம்பர் 4 அன்று தொடங்கிய இரண்டாவது கட்ட SIR, பீகாரில் பெரும் சர்ச்சையை ஏற்படுத்தியது. இப்போது அந்தமான், சத்தீஸ்கர், கோவா, குஜராத், கேரளா, லட்சத்தீவு, மத்திய பிரதேசம், புதுச்சேரி, ராஜஸ்தான், தமிழகம், உத்தர பிரதேசம், மேற்கு வங்கம் உள்ளிட்ட 12 இடங்களில் நடக்கிறது. டிசம்பர் 4 வரை வாக்காளர்கள் எஸ்ஐஆர் படிவங்களை (Form 6) சமர்ப்பிக்க வேண்டும் என்று தேர்தல் கமிஷன் அறிவுறுத்தியது. 

இதையும் படிங்க: 20 லட்சம் வாக்காளர்கள் எங்கே? SIR விவகாரம்!! திணறும் ஓட்டுச்சாவடி அலுவலர்கள்!

ஆனால், இந்தப் பணி 2026 தேர்தலுக்கு முன் வாக்காளர்களை நீக்கும் சதி என்று கூட்டணிகள் குற்றம் சாட்டினர். இதை எதிர்த்து திமுக தலைமையிலான தமிழக கூட்டணி, கேரளா, மேற்கு வங்க அரசுகள் சுப்ரீம் கோர்ட்டில் மனுக்கள் தாக்கல் செய்தன.

நவம்பர் 26 அன்று தலைமை நீதிபதி சூர்யகாந்த், நீதிபதி ஜாய்மாலா பக்சி அடங்கிய அமர்வு முன் விசாரணை நடந்தது. மனுதாரர்கள் சார்பில் மூத்த வழக்கறிஞர் கபில் சிபல் வாதிட்டார். "படிவம் 6-இல் தரப்படும் விவரங்களை தேர்தல் கமிஷன் அப்படியே ஏற்க வேண்டும். ஆதார் அட்டையை உரிய ஆவணமாக ஏற்க வேண்டும். அதன் அடிப்படையில் வாக்காளர் பட்டியலில் பெயர்கள் சேர்க்கப்பட வேண்டும்" என்று வாதிட்டார். 

இதற்கு நீதிமன்றம் பதிலடி கொடுத்தது. "படிவம் 6-இல் தரப்படும் விவரங்களை அப்படியே ஏற்க வேண்டும் என்கிறீர்கள். ஆனால், அதன் உண்மைத்தன்மையை ஆராய தேர்தல் கமிஷனுக்கு அதிகாரம் உண்டு. நீங்கள் தேர்தல் கமிஷனை போஸ்ட் ஆபீஸ் போல் நினைக்கிறீர்கள்" என்று கூறினர்.

நீதிபதிகள் மேலும், "ஆதார் எண் அரசின் நலத்திட்டங்களுக்கு உதவும் ஆவணம். அது குடியுரிமை சான்று அல்ல. அண்டை நாடுகளில் இருந்து நம் நாட்டிற்குள் புகுந்து கூலி வேலை செய்யும் தொழிலாளர்கள் ஆதார் அட்டை பெற்றிருந்தால், அவர்களுக்கும் ஓட்டுரிமை வழங்க முடியுமா?" என்று கேள்வி எழுப்பினர். 

"இந்த விவகாரத்தில் தேர்தல் கமிஷன் அதன் கடமையைச் செய்கிறது" என்று சுட்டிக்காட்டினர். மனுதாரர்கள் எழுப்பிய சந்தேகங்களுக்கு தேர்தல் கமிஷன் அறிக்கை தாக்கல் செய்ய உத்தரவிட்டனர். தமிழக மனுக்களுக்கான பதிலை டிசம்பர் 1-க்குள் தேர்தல் கமிஷன் தாக்கல் செய்ய வேண்டும். விசாரணை டிசம்பர் 4 அன்று நடக்கும். 

கேரளா மனுக்களை டிசம்பர் 2 அன்று விசாரிக்கும். மேற்கு வங்கத்தின் மனுக்களை டிசம்பர் 9 அன்று விசாரிக்கும் என்று நீதிமன்றம் உத்தரவிட்டது. "வாக்காளர் பட்டியலில் யாராவது நீக்கப்பட்டால், அவருக்கு முறையான நோட்டீஸ் அளிக்க வேண்டும்" என்றும் வலியுறுத்தியது.

இந்த விசாரணை, SIR-இன் சட்டப்பூர்வத்தை கேள்விக்குறியாக்கியுள்ளது. பீகாரில் SIR காரணமாக லட்சக்கணக்கான வாக்காளர்கள் நீக்கப்பட்டதாக கூட்டணிகள் கூறுகின்றன. தமிழகத்தில் டிசம்பர் 4 வரை படிவங்கள் சமர்ப்பிக்க வேண்டும் என்ற காலக்கெடு, புயல், வெள்ள சூழலில் குழப்பத்தை ஏற்படுத்தியுள்ளது. "இது வாக்காளர்களை அகற்றும் சதி" என்று திமுக குற்றம் சாட்டியது. தேர்தல் கமிஷன், "இது வாக்காளர் பட்டியலை சுத்தம் செய்யும் பணி" என்று பதிலளித்தது.

இந்த வழக்கு, 2026 தேர்தலுக்கு முன் வாக்காளர் உரிமைகளைப் பாதுகாக்கும் என எதிர்பார்க்கப்படுகிறது. வாக்காளர்கள், படிவம் 6-ஐ உடனடியாக சமர்ப்பிக்குமாறு அறிவுறுத்தப்படுகின்றனர். சுப்ரீம் கோர்ட்டின் அடுத்த விசாரணைக்கு பின் தெளிவு கிடைக்கும்.

இதையும் படிங்க: அதிரடியாய் மாறும் அரசியல் களம்!! விஜய் முன்னால் இருக்கும் 3 வாய்ப்புகள்! அரியணை ஏறுமா தவெக?!