நாம் தமிழர் கட்சியின் தலைமை ஒருங்கிணைப்பாளர் செந்தமிழன் சீமான், தேனி மாவட்டம் மேகமலை மற்றும் வருசநாடு பகுதிகளில் உள்ள 98 மலைக்கிராம மக்களை அவர்களின் வாழ்விடங்களிலிருந்து அப்புறப்படுத்தும் முயற்சியை கடுமையாகக் கண்டித்துள்ளார். பல தலைமுறைகளாக அங்கு வாழ்ந்து வரும் ஐயாயிரத்துக்கும் அதிகமான மக்களை வெளியேற்ற முயல்வது கொடுங்கோன்மை என்று அவர் குறிப்பிட்டார்.

தங்கள் மண்ணையும் வாழ்வாதாரத்தையும் காப்பதற்காக கடமலைக்குண்டில் தொடர் காத்திருப்புப் போராட்டத்தில் ஈடுபட்டுள்ள மக்களில் நேற்று பலர் மயங்கி விழுந்த செய்தி பெரும் வேதனையை ஏற்படுத்தியதாக அவர் தெரிவித்தார். வீடுகளை இழந்துவிடுவோமோ என்ற அச்சத்தில் மக்கள் வெயிலில் போராடும் நிலைக்குத் தள்ளப்பட்டிருப்பது ஆட்சியாளர்களுக்கு உறுத்தவில்லையா என்று கேள்வி எழுப்பிய சீமான், இவ்விவகாரம் நீதிமன்ற விசாரணையில் உள்ள நிலையில், மலைக்கிராம மக்களின் உண்மை நிலையை முழுமையாக முன்வைப்பதும், அவர்களுக்கு உள்ள சட்டப்பூர்வமான வழிவகைகளைப் பயன்படுத்துவதும் தமிழ்நாடு அரசின் கடமை என்று சீமான் கூறினார்.

மக்களின் கோரிக்கைப்படி சீராய்வு மனு தாக்கல் செய்வதற்கான வாய்ப்பை தமிழக அரசு உடனடியாக சட்ட ஆய்வு செய்ய வேண்டும் என்றும், வன உரிமைகள் தொடர்பான கோரிக்கைகள், பட்டா மற்றும் பிற ஆவணங்கள் மீது வெளிப்படையான விசாரணை நடத்தி, பாதிக்கப்படும் குடும்பங்களின் கருத்தைக் கேட்டு முடிவெடுத்து, தொன்றுதொட்டு வாழும் மக்களின் வாழ்விடங்களைப் பாதுகாக்க வேண்டும் என்றும் அவர் வலியுறுத்தினார்.

இதையும் படிங்க: மின் கணக்கீட்டில் குளறுபடியாகதா..? என்ன CM இது.? சீமான் கண்டனம்.!!

வீடுகளை விட்டு வெளியேறுமாறு மக்களை அச்சுறுத்துவதையும், அன்றாடப் போக்குவரத்து மற்றும் அடிப்படைத் தேவைகளுக்குத் தேவையற்ற இடையூறு ஏற்படுத்துவதையும் உடனடியாக நிறுத்த வேண்டும் என்று அவர் கோரினார். போராட்டத்தில் தங்கள் மண்ணில் வாழும் உரிமைக்காக அறவழியில் போராடும் மக்களுடன் நாம் தமிழர் கட்சி உறுதியாகத் துணைநிற்கும் என்றும் அவர் உறுதியளித்தார்.

இதையும் படிங்க: ஜீரோ கட்சியை பார்த்து ஹீரோ கட்சி பயப்படுகிறது! மதுராந்தகத்தில் சீமான் அதிரடி பேச்சு!!