கரப்பான் பூச்சி ஜனதா கட்சியின் தேசியத் தலைவர் அபிஜித் திப்கே கட்சிக்குள் எதேச்சதிகாரமாகவும் சர்வாதிகாரப் போக்குடனும் செயல்பட்டு வருவதாகக் கடுமையான குற்றச்சாட்டுகளை முன்வைத்து அக்கட்சியிலிருந்து அதிரடியாக வெளியேறிய மூத்த தலைவர் மணீஷ் பிரம்மபட், 'ஜனநாயக கரப்பான் கட்சி' என்ற புதிய அரசியல் கட்சியைத் தொடங்குவதாக அதிகாரப்பூர்வமாக அறிவித்துள்ளார்.
மஹாராஷ்டிரா மாநிலத்தைச் சேர்ந்த அரசியல் தலைவரான மணீஷ் பிரம்மபட், கரப்பான் பூச்சி ஜனதா கட்சியில் தீவிரமாகச் செயல்பட்டு வந்த நிலையில், கட்சியின் தலைமைப் பொறுப்பில் உள்ள அபிஜித் திப்கேவின் தன்னிச்சையான செயல்பாடுகள் மற்றும் முடிவுகளால் கட்சிக்குள் கடந்த சில மாதங்களாகவே உட்கட்சிப் பூசல் மற்றும் சலசலப்புகள் வெடித்து வந்தன. கட்சியின் விதிகளுக்குப் புறம்பாக நிர்வாகிகளை நடத்துவதாகவும், ஜனநாயக ரீதியிலான கருத்துகளுக்கு மதிப்பளிக்காமல் சர்வாதிகாரப் போக்கைத் திணிப்பதாகவும் தலைமை மீது தொடர் அதிருப்தி புகார்கள் கிளம்பின.
இந்நிலையில், மும்பையில் தனது ஆதரவாளர்களுடன் முக்கிய ஆலோசனைக் கூட்டத்தை நடத்திய மணீஷ் பிரம்மபட், கரப்பான் பூச்சி ஜனதா கட்சியிலிருந்து தனது ஆதரவுப் படையுடன் ஒட்டுமொத்தமாக விலகுவதாக அதிரடியாக அறிவித்தார். தொடர்ந்து செய்தியாளர்கள் மத்தியில் பேசிய அவர், "கட்சியின் அடிப்படை விழுமியங்களையும் தொண்டர்களின் உழைப்பையும் மதிக்காமல் தன்னிச்சையாக முடிவுகளை எடுத்து சர்வாதிகாரியாக உருவெடுத்துள்ள அபிஜித் திப்கேவின் பிடியிலிருந்து உண்மையான ஜனநாயகக் கொள்கைகளை மீட்டெடுக்கும் நோக்கில், 'ஜனநாயக கரப்பான் கட்சி' (Democratic Cockroach Party) என்ற புதிய அமைப்பைத் தொடங்கி களப்பணியாற்ற உள்ளோம்" என்று முழங்கினார்.
இதையும் படிங்க: மதுரை பாண்டி முனீஸ்வரர் கோயில் விவகாரம்... நிர்வாகத்தை கவனிக்க ஓய்வு பெற்ற நீதிபதியை நியமிக்க உச்ச நீதிமன்றம் முடிவு!
மஹாராஷ்டிரா மாநிலத்தின் அரசியல் களத்தில், தலைமைக்கு எதிரான அதிருப்தியில் தனிக் கட்சியைத் தொடங்கி செயல்படப் போவதாக மணீஷ் பிரம்மபட் விடுத்துள்ள இந்த அறிவிப்பு உள்ளூர் அரசியல் அரங்கில் பெரும் பரபரப்பையும் சலசலப்பையும் ஏற்படுத்தியுள்ளதுடன், அடுத்தகட்டமாகத் தேர்தல் ஆணையத்தில் கட்சியைப் பதிவு செய்து மாநிலம் தழுவிய அளவில் நிர்வாகிகளை நியமிக்கத் திட்டமிட்டுள்ளதாகவும் தகவல்கள் வெளியாகியுள்ளன.
இதையும் படிங்க: விருதுநகர் பட்டாசு ஆலை விபத்து... தலா ரூ.4 லட்சம் நிவாரணம்! முதலமைச்சர் ச. ஜோசப் விஜய் அறிவிப்பு!