தமிழக மீனவர்கள் சர்வதேச கடல் எல்லையைத் தாண்டி இலங்கை கடல் எல்லைக்குள் மீன்பிடிக்க வந்தால், அவர்களது விசைப்படகுகள் மீது வெடிகுண்டுகள் வீசப்படும் என இலங்கை மீனவர்கள் எச்சரிக்கை விடுக்கும் ஆடியோ சமூக வலைதளங்களில் வெளியாகி பெரும் பரபரப்பை ஏற்படுத்தியுள்ளது.

தமிழக மீனவர்களின் படகுகளால் தங்களது பல லட்சம் ரூபாய் மதிப்பிலான மீன்பிடி வலைகள் சேதமடைவதாகக் குற்றம்சாட்டி இலங்கை மீனவர்கள் விடுத்துள்ள இந்தப் பகிரங்க மிரட்டல், தமிழகக் கடலோரப் பகுதி மீனவர்கள் மத்தியில் பெரும் அச்சத்தை ஏற்படுத்தியுள்ளது.

இலங்கை மீனவர் வெளியிட்டதாகக் கூறப்படும் ஆடியோ:

வணக்கம் சார். நாங்கள் இலங்கையிலிருந்து பேசுகிறோம். என்ன பிரச்சினை என்றால், இன்று கடலுக்குச் சென்ற படகில் இருந்த 15 லட்சம் ரூபாய் மதிப்பிலான பொருட்களைத் துண்டு துண்டாக வெட்டிச் சேதப்படுத்திவிட்டார்கள்.

இதையும் படிங்க: இராணுவம் எதற்கு..? இந்திய, தமிழக அரசுகள் துணை நிற்காதா.? ஈழத் தமிழர்களுக்காக குரல் கொடுத்த வேல்முருகன்.!!

உங்களுடைய இழுவைப் படகுகள் வந்து சத்தம் போட்டு, அருகில் நின்று டார்ச் அடித்துப் பார்த்துவிட்டு, விளக்கை அணைத்துவிட்டு, அவர்கள் சிரித்துக்கொண்டே சென்றுவிடுகிறார்கள்.

இனி எங்களால் இதையெல்லாம் பொறுத்துக்கொண்டிருக்க முடியாது. நாங்கள் யாழ்ப்பாணம், மன்னார் என அனைத்து இடங்களிலிருந்தும் இரண்டு இன்ஜின்கள் பொருத்தப்பட்ட ஏராளமான படகுகளுடன், ஆயிரத்துக்கும் மேற்பட்ட படகுகளைத் தயார் நிலையில் வைத்திருக்கிறோம்.

வெடிமருந்துகளுடன் வருகிறோம். உங்களுடைய ஒரு படகைக்கூட விட்டுவைக்க மாட்டோம். அடிக்கிற அடியில், எல்லாவற்றையும் தாண்டிக் கடலில் மீன்கள்தான் அந்தப் படகுகளைத் தின்னும். இப்போதுதான் மீன்கள் அவற்றைத் தின்னும். அந்த அளவுக்குத்தான் இனி நாங்கள் செய்யப்போகிறோம்” என கடுமையான எச்சரிக்கை விடுக்கப்பட்டுள்ளது. 

இருதரப்பு மீனவர்களிடையேயான சிக்கலுக்கு காரணம் என்ன? 

இலங்கை – தமிழக மீனவர்களிடையே நீண்டகாலமாக நீடித்து வரும் பிரச்சினைகளுக்கு முக்கியக் காரணமாக இருப்பது, மீன்பிடி எல்லை தொடர்பான மோதல்கள், பாரம்பரிய மீன்பிடி உரிமைகள் மற்றும் மீன்பிடி முறைகளால் ஏற்படும் பாதிப்புகள் ஆகியவையாகும். இரு தரப்பு மீனவர்களின் வாழ்வாதாரம், பாதுகாப்பு மற்றும் கடல் வளங்களைப் பாதுகாப்பது தொடர்பாக இந்தப் பிரச்சினை தொடர்ந்து நீடித்து வருகிறது.

தமிழக மீனவர்கள் பயன்படுத்தும் விசைப்படகுகள் மற்றும் இழுவை வலைகளால் தங்களது மீன்பிடி வலைகள் சேதமடைவதாக இலங்கை மீனவர்கள் குற்றம்சாட்டுகின்றனர். குறிப்பாக, கடலின் அடிப்பகுதியில் உள்ள மீன்வளங்களைச் சேதப்படுத்தும் இழுவை மீன்பிடி முறையால் கடல் வளங்கள் குறைவதுடன், பாரம்பரிய மீன்பிடி முறைகளைப் பயன்படுத்தும் இலங்கை மீனவர்களின் வாழ்வாதாரமும் பாதிக்கப்படுவதாகக் கூறப்படுகிறது. இதனால் இரு தரப்பு மீனவர்களிடையே மோதல்கள் அதிகரித்து வருகின்றன.

பாக் ஜலசந்தி பகுதியில் அதிகப்படியான மீன்பிடி மற்றும் கடலின் அடிப்பகுதியைச் சேதப்படுத்தும் மீன்பிடி முறைகளால் மீன்வளம் குறைந்து வருவதாகக் கூறப்படுகிறது. இதனால் தமிழக மீனவர்கள் அதிக தொலைவு சென்று மீன்பிடிக்க வேண்டிய நிலை ஏற்படுகிறது. அதேசமயம், இலங்கை மீனவர்களும் தங்களது பாரம்பரிய மீன்பிடிப் பகுதிகளில் மீன்வளம் குறைவதால் பாதிக்கப்படுகின்றனர். இதனால் இரு தரப்பு மீனவர்களிடையே போட்டியும் மோதலும் அதிகரிக்கின்றன.

இதையும் படிங்க: மாணவர்களுக்கு குஷியான செய்தி... குழந்தைகள் தினத்தன்று சி.எம்.விஜய் செய்யப்போகும் தரமான சம்பவம்... எங்கே? எப்போது?