சென்னை: தமிழக சட்டசபை தேர்தல் 2026-க்கு இன்னும் சில மாதங்களே உள்ள நிலையில், திமுக தலைமை அதிரடி திட்டங்களை வகுத்து வருகிறது. கூட்டணியில் தேமுதிகவை சேர்த்து வலுவான நிலையில் உள்ள திமுக, 200 தொகுதிகளில் வெற்றி பெற வேண்டும் என்ற இலக்கை நிர்ணயித்துள்ளது.
இதனால், தற்போதைய அமைச்சர்களுக்கு செக் வைக்கும் வகையில், அவர்களை அதிமுக முன்னாள் அமைச்சர்கள் போட்டியிடும் தொகுதிகளில் களமிறக்க முதல்வர் ஸ்டாலின் திட்டமிட்டுள்ளதாக திமுக வட்டாரங்கள் தெரிவிக்கின்றன.
திமுகவின் உள் வட்டார தகவல்களின்படி, உளவுத்துறை அறிக்கையில் பல அமைச்சர்கள் தங்கள் மாவட்ட அதிமுக முன்னாள் அமைச்சர்களுடன் நெருக்கமாக இருப்பது சுட்டிக்காட்டப்பட்டுள்ளது. இது குறித்து முதல்வரின் குடும்ப ஆலோசனையில் விவாதிக்கப்பட்டது.
இதையும் படிங்க: இதமட்டும் பண்ணிடாதீங்க! ஓட்டு பூரா விஜய்க்கு போயிரும்! திமுகவுக்கு திருமாவளவன் கொடுத்த வார்னிங்!
"பல அமைச்சர்கள் எதிர்க்கட்சி முன்னாள் அமைச்சர்களுடன் நெருக்கம் காட்டுவதால், அவர்கள் போட்டியிடும் தொகுதிகளில் பலமில்லாத வேட்பாளர்களை பரிந்துரைக்க வாய்ப்புள்ளது" என்று பேசப்பட்டுள்ளது. இதை தவிர்க்க, ஜெயலலிதா பாணியை பின்பற்ற ஸ்டாலின் தரப்பு முடிவு செய்துள்ளது.
உதாரணமாக, 2016 தேர்தலில் திண்டுக்கல் நத்தம் தொகுதியில் போட்டியிட்ட அதிமுகவின் நத்தம் விஸ்வநாதனை, திமுக முன்னாள் அமைச்சர் ஐ.பெரியசாமி போட்டியிட்ட ஆத்தூர் தொகுதியில் ஜெயலலிதா களமிறக்கினார். அங்கு விஸ்வநாதன் தோற்றாலும், பெரியசாமிக்கு கடும் சவால் கொடுத்தார்.
இதேபோல், தற்போதைய சிட்டிங் அமைச்சர்களை அவர்கள் வழக்கமான தொகுதிகளில் போட்டியிட விடாமல், அதிமுக முன்னாள் அமைச்சர்கள் போட்டியிடும் தொகுதிகளில் களமிறக்க திட்டமிடப்பட்டுள்ளது. பணபலம், அனுபவம் உள்ள இரு தரப்பினரும் கடும் போட்டியில் ஈடுபடுவதால், அமைச்சர்கள் தீவிரமாக பணியாற்றி வெற்றி பெற வேண்டிய கட்டாயம் ஏற்படும் என்று ஸ்டாலின் தரப்பு கருதுகிறது.
இந்த திட்டம் அமைச்சர்களுக்கு செக் வைக்கும் வகையில் இருப்பதால், திமுகவில் உள்ளேயே சலசலப்பு ஏற்பட்டுள்ளது. 200 தொகுதிகளில் வெற்றி இலக்கு அடைய இது உதவும் என நம்பப்படுகிறது. திமுக கூட்டணி தற்போது பலமாக இருப்பதால், இந்த உத்தி எதிர்க்கட்சிகளுக்கு சவாலாக அமையும் என்று அரசியல் வட்டாரங்கள் கூறுகின்றன.
இதையும் படிங்க: கூட்டணி தாவ முடியாது?! காங்கிரசுக்கு செக் வைத்த திமுக!! பாஜக கொடுத்த டீல்!! தவெக அடுத்த மூவ்!