நவம்பர் 15 முதல் டாஸ்மாக் ஊழியர்களுக்கு புதிய சீருடை: ஆண்டுக்கு ரூ.6,000 படி
சென்னை: தமிழ்நாடு முழுவதும் உள்ள டாஸ்மாக் சில்லறை மதுபானக் கடைகளில் பணியாற்றும் ஊழியர்களுக்கு புதிய சீருடை விதிமுறை அமலுக்கு வர உள்ளது. வரும் நவம்பர் 15-ம் தேதி முதல் கடை வேலை நேரத்தில் ஊழியர்கள் கட்டாயம் குறிப்பிட்ட வண்ண சீருடைகளை அணிய வேண்டும் என்று அரசு மற்றும் டாஸ்மாக் நிர்வாகம் உத்தரவிட்டுள்ளது.
தமிழகத்தில் தற்போது 4,048 டாஸ்மாக் சில்லறை மதுபானக் கடைகள் செயல்பட்டு வருகின்றன. இவற்றில் மேற்பார்வையாளர்கள், விற்பனையாளர்கள் மற்றும் உதவி விற்பனையாளர்கள் என மொத்தம் 22,877 ஊழியர்கள் பணியாற்றி வருவதாக மதுவிலக்கு மற்றும் ஆயத்தீர்வுத் துறையின் 2026-27 கொள்கைக் குறிப்பில் தெரிவிக்கப்பட்டுள்ளது.
இதையும் படிங்க: டாஸ்மாக் கடைகளில் இனி ரூ.500க்கு மேல் கேஷ் கூடாது? கூடுதல் விலைக்கு மது விற்பனைக்கு செக்! புதிய விதி!
புதிய விதிமுறையின்படி, கடை மேற்பார்வையாளர்கள் லைட் ப்ளூ நிற சட்டையும், நேவி ப்ளூ நிற பேண்ட்டும் அணிய வேண்டும். விற்பனையாளர்கள் மற்றும் உதவி விற்பனையாளர்கள் பிரவுன் நிற சட்டையும், அடர் சாம்பல் நிற பேண்ட்டும் அணிய வேண்டும். அனைத்து சீருடை சட்டைகளிலும் இடதுபுற நெஞ்சுப் பகுதியில் டாஸ்மாக் நிறுவனத்தின் இலச்சினை இடம்பெற வேண்டும் என அறிவுறுத்தப்பட்டுள்ளது.
சீருடைக்கான துணியின் தரம் மற்றும் நிறம் மாநிலம் முழுவதும் ஒரே மாதிரியாக இருக்க வேண்டும் என்பதற்காக, ஊழியர்கள் தங்கள் மாவட்டத் தலைநகரங்களில் உள்ள கோ-ஆப்டெக்ஸ் விற்பனையகங்களில் மட்டுமே துணியை வாங்க வேண்டும். இதற்கான துணியை அக்டோபர் 31-ம் தேதிக்குள் வாங்கி, நவம்பர் 10-ம் தேதிக்குள் சீருடையை தைத்து முடிக்க வேண்டும் என காலக்கெடு நிர்ணயிக்கப்பட்டுள்ளது.
ஒவ்வொரு ஊழியருக்கும் ஆண்டுக்கு 3 செட் சீருடைகள் வழங்கப்பட உள்ளன. இதற்காக ஆண்டுதோறும் ரூ.6,000 சீருடைப் படியாக வழங்க அரசு ஒப்புதல் அளித்துள்ளது. ஒரு செட்டுக்கு ரூ.2,000 என்ற அடிப்படையில் இந்தத் தொகை வழங்கப்படும்.
நவம்பர் 15 முதல் சீருடை அணிவது கட்டாயமாகும். இதனை மாவட்ட மேலாளர்கள் கண்காணிக்க உள்ளனர். சீருடைப் படியை பெற்றும் விதிமுறைகளை பின்பற்றாமல் இருப்பவர்கள் மீது நடவடிக்கை எடுக்கப்படும் என்றும், தேவையான சூழலில் வழங்கப்பட்ட தொகை திரும்பப் பெறப்படும் என்றும் நிர்வாகம் எச்சரித்துள்ளது.
இதையும் படிங்க: கிருஷ்ணகிரியில் அதிர்ச்சி... காலி மதுபாட்டிலை திருப்பி கொடுக்கும்போது நடந்த விபரீதம்...!