தலைமை செயலக வளாகத்தில் அமைச்சர்கள், எம்.எல்.ஏ.க்கள் மற்றும் அதிகாரிகளின் வாகனங்கள் நிறுத்துவதற்கே இடம் இல்லாத நிலை ஏற்பட்டுள்ளது. இதனால் பல ஆண்டுகளாக புதிய சட்டசபை கட்டிடம் குறித்து பேசப்பட்டு வருகிறது. 2011-ல் தி.மு.க. ஆட்சியில் அண்ணா சாலையில் புதிய தலைமை செயலகம் கட்டப்பட்டது.

ஆனால் அ.தி.மு.க. ஆட்சி வந்ததும் அது அரசு பல்நோக்கு மருத்துவமனையாக மாற்றப்பட்டது. கொரோனா காலத்தில் வாலாஜா சாலையில் உள்ள கலைவாணர் அரங்கத்தில் தற்காலிக சட்டசபை இயங்கியது. பின்னர் மீண்டும் ஜார்ஜ் கோட்டைக்கு சட்டசபை மாற்றப்பட்டது.

தற்போது த.வெ.க. அரசு பொறுப்பேற்ற பிறகு இட நெருக்கடி மேலும் அதிகரித்துள்ளது. இந்தச் சூழலில், கிழக்கு கடற்கரை சாலை முட்டுக்காட்டில் தி.மு.க. ஆட்சியில் 525 கோடி ரூபாய் மதிப்பில் தொடங்கப்பட்ட கலைஞர் பன்னாட்டு அரங்கத்தை புதிய சட்டசபை வளாகமாகப் பயன்படுத்த அரசு திட்டமிட்டுள்ளது. 5,000 இருக்கைகள் கொண்ட பெரிய மாநாட்டு கூடம், 10,000 பேர் கொள்ளளவு கொண்ட கண்காட்சி அரங்கம் உள்ளிட்ட நவீன வசதிகள் இங்கு அமைய உள்ளன.

இதையும் படிங்க: உங்க அப்பாவ காணோம்? உதயநிதி ஸ்டாலினை பங்கமாக கலாய்த்து முதல்வர் விஜய் சொன்ன குட்டி ஸ்டோரி!

இந்த ஆண்டு டிசம்பருக்குள் கட்டுமானப் பணிகள் முடிவடையும் என எதிர்பார்க்கப்படுகிறது. பொதுப்பணித்துறை அமைச்சர் ஆதவ் அர்ஜுனா நேற்று முன்தினம் இடத்தை நேரில் ஆய்வு செய்தார். கட்டுமானப் பணிகளை விரைந்து முடிக்க அதிகாரிகளுக்கு உத்தரவிட்டார். முதலமைச்சர் விஜய் எடுக்கும் இறுதி முடிவின் அடிப்படையில், அடுத்தாண்டு ஜனவரியில் கவர்னர் உரையுடன் புதிய சட்டசபையில் கூட்டம் நடைபெற வாய்ப்பு உள்ளதாக பொதுப்பணித்துறை வட்டாரங்கள் தெரிவிக்கின்றன.

இந்த மாற்றம் நடைபெற்றால், ஜார்ஜ் கோட்டையின் பாரம்பரியத்தைப் பாதுகாக்கும் வகையில் சட்டசபை செயல்பாடுகள் முட்டுக்காட்டுக்கு மாற்றப்படும் என எதிர்பார்க்கப்படுகிறது. இந்த முடிவு தமிழக அரசியல் மற்றும் நிர்வாக வட்டாரத்தில் பெரும் எதிர்பார்ப்பை ஏற்படுத்தியுள்ளது.

இதையும் படிங்க: முதல்வர் விஜய்யின் தனிச் செயலராக ஜெகதீஷ் பழனிசாமி நியமனம்..!! யார் இவர்..??