மகாத்மா காந்தி தேசிய ஊரக வேலை உறுதித் திட்டத்திற்கு (MGNREGA) மாற்றாக மத்திய அரசு கொண்டுவந்த விக்சித் பாரத் – கேரண்டி ஃபார் ரோஜ்கர் அண்ட் ஆஜீவிகா மிஷன் (கிராமின்) அல்லது விபி ஜி ராம் ஜி (VB-G RAM G) திட்டம் ஜூலை 1, 2026 முதல் நாடு முழுவதும் அமலுக்கு வந்தது. ஆனால் அதன் முதல் மாதத்திலேயே ஊரக வேலைவாய்ப்பு உருவாக்கத்தில் பெரும் சரிவு ஏற்பட்டுள்ளதாக அதிகாரப்பூர்வ தரவுகள் வெளிப்படுத்துகின்றன.

ஜூலை 2026-ல் விபி ஜி ராம் ஜி திட்டத்தின் கீழ் மொத்தம் 7.67 கோடி மனித வேலைநாட்கள் (person-days) மட்டுமே உருவாக்கப்பட்டுள்ளன. இது கடந்த ஆண்டு அதே மாதத்தில் MGNREGA-வின் கீழ் பதிவான 15.33 கோடி வேலைநாட்களுடன் ஒப்பிடும்போது 49.94 சதவீதம் குறைவு. அதேபோல், வேலை பெற்ற குடும்பங்களின் எண்ணிக்கையும் 68.94 லட்சமாகக் குறைந்துள்ளது. இது முந்தைய ஆண்டின் 1.42 கோடி குடும்பங்களுடன் ஒப்பிடும்போது சுமார் 51.45 சதவீதம் சரிவு ஆகும். 

கடந்த ஐந்து ஆண்டுகளிலேயே இந்த அளவு மிகக் குறைவானது என்றும் தரவுகள் சுட்டிக்காட்டுகின்றன. புதிய சட்டம் ஒவ்வொரு கிராமப்புற குடும்பத்திற்கும் ஆண்டுக்கு 125 நாட்கள் வேலை உறுதி அளிக்கிறது (முன்பு 100 நாட்கள்). மகாத்மா காந்தியின் பெயர் நீக்கப்பட்டு, மத்திய-மாநில நிதிப் பங்கீடு பெரும்பாலான மாநிலங்களுக்கு 60:40 என மாற்றப்பட்டுள்ளது. மொத்த நிதி ஒதுக்கீடு சுமார் ரூ.1.52 லட்சம் கோடியாக உயர்த்தப்பட்டுள்ளது. நிலுவையில் உள்ள பணிகள் தடையின்றித் தொடரும் என்று அரசு உறுதியளித்திருந்தது.

இதையும் படிங்க: ஆகஸ்ட் 17ல் 100 நாள் நிறைவு! விஜய் அரசு செய்தது என்ன? அதிகாரிகளுக்கு பறந்த முக்கிய உத்தரவு!

நாடாளுமன்றத்தில் அரசு அளித்த பதிலில், ஜூலை 22 வரை வேலை கோரிய 99.5 சதவீதத்திற்கும் மேற்பட்டவர்களுக்கு வேலை வழங்கப்பட்டதாகவும், 5.2 கோடிக்கும் அதிகமான வேலைநாட்கள் உருவாக்கப்பட்டதாகவும் தெரிவிக்கப்பட்டது. ஆனால் மாத இறுதித் தரவுகள், மாதத்தின் பிற்பகுதியில் வேலைவாய்ப்பு உருவாக்கம் மேலும் மந்தமடைந்ததைக் காட்டுகின்றன. ஊரக வளர்ச்சி அமைச்சகம் இந்த சரிவை மறுத்து, தோராயமாக 9 கோடி வேலைநாட்கள் உருவாக்கப்பட்டதாகவும், மாற்றம் தடையின்றி நடைபெற்றதாகவும் கூறியுள்ளது.

எதிர்க்கட்சிகள் பெயர் நீக்கம் மற்றும் நிதிச்சுமை அதிகரிப்பு குறித்து தொடர்ந்து விமர்சித்து வருகின்றன. இந்த வீழ்ச்சி திட்ட மாற்றத்தால் ஏற்பட்ட தற்காலிகத் தேக்கமா அல்லது கிராமப்புற வேலைவாய்ப்பில் பொதுவான மந்தநிலையா என்பது வரும் மாதங்களின் தரவுகளிலிருந்தே தெளிவாகும்.

இதையும் படிங்க: தவெக கவுன்சிலர் மீது தண்ணீர் பாட்டில் வீச்சு... விசிலடித்ததால் கடுப்பான உறுப்பினர்கள்..! நெல்லை மாமன்ற கூட்டத்தில் பரபரப்பு.!