2026 சட்டமன்றத் தேர்தலில் சென்னையின் மிக முக்கியமான தொகுதிகளில் ஒன்றான மயிலாப்பூர் தொகுதியை கைப்பற்றுவதில் திமுக-அதிமுக கூட்டணிகளுக்குள் கடும் போட்டி நிலவுகிறது. நீதிக்கட்சி காலம் தொட்டு தேர்தல் சரித்திரம் கொண்ட இத்தொகுதி, தற்போது அரசியல் கூட்டணிகளுக்குள் பெரும் இழுபறியை ஏற்படுத்தியுள்ளது.

1952 முதல் 1967 வரை 4 தேர்தல்களும், அதன்பிறகு 11 தேர்தல்களும் நடைபெற்றுள்ளன. கடந்த 11 தேர்தல்களில் அதிமுக 6 முறையும், திமுக 4 முறையும், பாஜக ஒரு முறையும் (2001) வெற்றி பெற்றுள்ளன. கடைசியாக 2021-ல் திமுகவின் தா.வேலு வெற்றி பெற்றார்.

தற்போது திமுக கூட்டணியில் திமுக - மக்கள் நீதி மய்யம் இடையேயும், அதிமுக கூட்டணியில் அதிமுக - பாஜக இடையேயும் மயிலாப்பூர் தொகுதிக்கான இழுபறி தீவிரமடைந்துள்ளது.

இதையும் படிங்க: 21 கூட்டணி கட்சிகளுடன் களமிறங்கும் திமுக! வாக்கு சிதறலை தடுக்க மெகா வியூகம்!! ஸ்டாலின் ஃபார்முலா!

பாஜக தரப்பில் மூத்த தலைவர் தமிழிசை சௌந்தரராஜன் மயிலாப்பூரை விரும்புவதாக தகவல்கள் வெளியாகியுள்ளன. பிராமணர்கள் அதிகம் வசிக்கும் தொகுதி என்பதால், பாஜகவுக்கு ஏற்கனவே இரட்டை இலக்க வாக்கு சதவீதம் உள்ளது. விருகம்பாக்கம், வேளச்சேரி ஆகியவற்றை விட மயிலாப்பூரே சிறந்த தொகுதி என்று அவர் கருதுவதாக கூறப்படுகிறது.

ஆனால் அதிமுக தரப்பில் முன்னாள் அமைச்சர் பா.வளர்மதி இத்தொகுதியை கேட்டுள்ளார். 1984-ல் இதே தொகுதியில் வெற்றி பெற்ற அனுபவம் கொண்டவர் என்பதால், ஆயிரம்விளக்கு தொகுதி வேண்டாம் என்று வலியுறுத்தி வருகிறார். மேலும் முன்னாள் அமைச்சர் ஜெயக்குமாரின் மகன் ஜெயவர்தனன், நிர்மலா பெரியசாமி, வைகைச்செல்வன், மாவட்ட செயலாளர் அசோக் ஆகியோரும் மயிலாப்பூரை கோரி வருகின்றனர்.

திமுக அணியில் தற்போதைய எம்எல்ஏ தா.வேலு மீண்டும் போட்டியிட விரும்புகிறார். ஆழ்வார்பேட்டை இத்தொகுதியில் வருவதால் மக்கள் நீதி மய்யம் இத்தொகுதியை கேட்டு வருகிறது. ஆனால் திமுக தலைமை அதற்கு இடம் கொடுக்க மறுத்து, ஒருவேளை வாய்ப்பு அளித்தாலும் உதயசூரியன் சின்னத்தில்தான் போட்டியிட வேண்டும் என்று மக்கள் நீதி மய்யத்துக்கு செக் வைத்துள்ளது.

பிராமணர் ஆதிக்கம், நகர்ப்புற செல்வந்தர்கள், பாரம்பரிய வாக்கு வங்கி ஆகியவை மயிலாப்பூரை மிக முக்கிய தொகுதியாக மாற்றியுள்ளன. 2026 தேர்தலில் இத்தொகுதி எந்த கூட்டணிக்கு கிடைக்கும் என்பது கூட்டணி பேச்சுவார்த்தைகளை பெரிதும் பாதிக்கும் என்று அரசியல் வட்டாரங்கள் கருதுகின்றன. திமுகவா? அதிமுகவா? பாஜகவா? என்ற எதிர்பார்ப்பு இப்போதே உச்சத்தில் உள்ளது.

இதையும் படிங்க: கோவையை குறிவைக்கும் திமுக! களத்தில் செந்தில்பாலாஜி! அதிமுக கோட்டையை அசைத்து பார்க்கும் ஸ்கெட்ச்!