அதிமுக – பாஜக கூட்டணி, திமுகவை தோற்கடித்து ஆட்சியை கைப்பற்ற வேண்டும் என்ற நோக்கில் தீவிரமாக செயல்பட்டு வருகிறது. ஆனால் அதிமுக உள்கட்சி பிரச்சனைகள், தலைமைப் போட்டிகள், மற்றும் பல்வேறு சிக்கல்கள் காரணமாக கட்சியின் நிலைமை சற்றே தளர்வாக உள்ளது. இதற்கிடையில் திமுகவின் அரசியல் நடவடிக்கைகளும் அதிமுகவின் பாதையை சிக்கலாக்கியுள்ளன.

இந்த சூழ்நிலையில் தூத்துக்குடி மாவட்டத்தில் நடைபெற்ற பொதுக்கூட்டத்தில் அதிமுக முன்னாள் அமைச்சர் கடம்பூர் ராஜூ, மக்கள் முன் உரையாற்றினார். அவர் தனது உரையில், தேர்தல் வெற்றி குறித்து மிகுந்த நம்பிக்கையுடன் பேசினார். “இரட்டை இலை சின்னத்தை பார்த்தவுடன் மக்கள் தயக்கமின்றி வாக்களிக்க வேண்டும். அந்த வாக்கின் பலனாக தேர்தல் முடிந்ததும் ஒவ்வொரு குடும்பத்திற்கும் ரூ.10,000 வழங்கப்படும். எடப்பாடி பழனிசாமி மீண்டும் முதல்வராகுவது உறுதி. இந்த தேர்தல் வெறும் சடங்குதான். மக்கள் திமுகவிற்கு வாக்களிக்க மாட்டார்கள். ஸ்டாலின் பேசும் உரைகள் மக்களுக்கு புரியவில்லை. பூஜ்ஜியம் + பூஜ்ஜியம் = பூஜ்ஜியம் என்று அவர் சொல்வது போல, நாங்கள் 2 பூஜ்ஜியங்களை சேர்த்து 200 தொகுதிகளை வெல்லப்போகிறோம். இரட்டை இலை சின்னம் 200க்கும் மேற்பட்ட தொகுதிகளில் வெற்றியை உறுதி செய்யும்” என்றார்.

 மேலும், திமுகவின் ஆட்சியை கடுமையாக விமர்சித்தார். “திமுக ஒருமுறை ஆட்சிக்கு வந்தாலே மக்களிடம் வெறுப்பை சம்பாதித்துவிடும். அவர்கள் அளித்த வாக்குறுதிகள் நிறைவேற்றப்படவில்லை. 100 நாள் வேலை திட்டத்தை 125 நாளாக மாற்றுவோம் என்றனர். ஆனால் கிராமங்களில் 50 நாட்களுக்குக் கூட வேலை கிடைப்பதில்லை. மக்களை ஏமாற்றும் அரசியல் தான் திமுக செய்கிறது. அதற்கு மாறாக எடப்பாடி பழனிசாமி அளிக்கும் வாக்குறுதிகள் அனைத்தும் நிறைவேற்றப்படும். எனவே மக்கள் இரட்டை இலை சின்னத்தை பார்த்தவுடன் வாக்களிக்க வேண்டும். தேர்தல் முடிந்ததும் ஒவ்வொரு குடும்பத்திற்கும் ரூ.10,000 வழங்கப்படும்” என்று வலியுறுத்தினார்.

இதையும் படிங்க: ஆவினை விட 55% அதிக விலை..! தனியார் பால் நிறுவனங்களுக்கு திமுக அரசு துணை போவதாக அன்புமணி புகார்!

கடம்பூர் ராஜூ தனது உரையில், அதிமுக 200க்கும் மேற்பட்ட தொகுதிகளில் வெற்றி பெற்று ஆட்சியமைக்கும், திமுக வாக்குறுதிகளை நிறைவேற்றவில்லை, மக்கள் அதிமுகவையே தேர்வு செய்வார்கள் என்று உறுதியுடன் கூறியுள்ளார்.

இதையும் படிங்க: குடையோட வெளில போங்க.. மார்ச் 4ம் தேதி வரை மழை இருக்காம்..!! வானிலை அப்டேட்..!!