சென்னை, அக்டோபர் 29: தனியார் பள்ளிகளுக்கு அரசு அனுமதிகளைப் பெற்றுத் தருவதாகக் கூறி ரூ.100 கோடிக்கும் மேல் வசூலித்ததாகக் கூறப்படும் வழக்கில் கைது செய்யப்பட்டு புழல் சிறையில் அடைக்கப்பட்டுள்ள திமுக முன்னாள் அமைச்சர் அன்பில் மகேஷ் பொய்யாமொழியின் ஜாமீன் மனு மீதான விசாரணை இன்று காலை ஊழல் தடுப்பு பிரிவு சிறப்பு நீதிமன்றத்தில் நடைபெற்றது.

நீதிபதிகள் இந்த வழக்கை வரும் நவம்பர் 2ஆம் தேதிக்கு ஒத்திவைத்தனர். இதனால் அடுத்த சில நாட்கள் அவர் புழல் சிறையில் தொடர்ந்து இருக்க வேண்டிய நிலை ஏற்பட்டுள்ளது.

முன்னதாக அக்டோபர் 26ஆம் தேதி சென்னை உயர்நீதிமன்றம் அவரது முன்ஜாமீன் மனுவைத் தள்ளுபடி செய்ததைத் தொடர்ந்து சென்னை மத்திய குற்றப்பிரிவு போலீசார் அவரைக் கைது செய்தனர். சிறப்பு நீதிமன்றம் அவரை நவம்பர் 6ஆம் தேதி வரை நீதிமன்றக் காவலில் அடைக்க உத்தரவிட்டது.

இதையும் படிங்க: பணி மாறுதலுக்காக அன்பில் மகேஷுக்கு லஞ்சம் கொடுத்தேன்! ஆடியோ வைரலானதும் பல்டி அடித்த திமுக நிர்வாகி!

அதன் பிறகு அவர் ஜாமீன் கோரி சிறப்பு நீதிமன்றத்தில் மனு தாக்கல் செய்தார். அந்த மனுவில் தனக்கு கணைய அழற்சி (pancreatitis) பாதிப்பு இருப்பதாகவும், தொடர் மருத்துவக் கண்காணிப்பு தேவைப்படுவதாகவும் குறிப்பிட்டு, உடல்நிலையைக் கருத்தில் கொண்டு ஜாமீன் வழங்க வேண்டும் எனக் கோரியிருந்தார்.

விசாரணைக்கு முழு ஒத்துழைப்பு அளித்துள்ளதாகவும், ஆதாரங்களைப் பாதிக்கவோ சாட்சிகளைச் செல்வாக்கு செலுத்தவோ மாட்டேன் எனவும் தெரிவித்திருந்தார்.

இன்று காலை 11 மணியளவில் நடைபெற்ற விசாரணையில் நீதிமன்றம் வழக்கை நவம்பர் 2ஆம் தேதிக்கு ஒத்திவைத்தது. அதேநேரம் அன்பில் மகேஷை ஐந்து நாட்கள் காவலில் எடுத்து விசாரிக்கக் கோரி போலீசார் தாக்கல் செய்த மனுவும் அதே நாளில் விசாரணைக்கு வரும் எனத் தெரிவிக்கப்பட்டுள்ளது.

இதனால் உடனடியாக ஜாமீன் கிடைக்காத சூழல் ஏற்பட்டு, அடுத்த நான்கு நாட்கள் அவர் புழல் சிறையில் தொடர்ந்து அடைக்கப்பட வேண்டிய நிலை உருவாகியுள்ளது.
 

இதையும் படிங்க: ஐந்து தொகுதி இடைத்தேர்தல்! அன்பில் மகேஷ் கைதால் திமுகவுக்கு பின்னடைவு! தவெக கையில் அஸ்திரம்!