தமிழக அரசியலில் தனித்த அடையாளத்தை உருவாக்க முயன்று வரும் அண்ணாமலையின் ‘வீ த லீடர்ஸ்’ அமைப்பில், இளைஞர்கள் மத்தியில் அதிருப்தி ஏற்பட்டுள்ளதாகக் கூறப்படுகிறது. ஆரம்பத்தில் அண்ணாமலைக்கு ஆதரவாகச் செயல்பட்ட இளைஞர்கள், தற்போது தங்களுக்கு உரிய அங்கீகாரம் கிடைப்பதில்லை எனக் குற்றம்சாட்டுவதாக வெளியாகியுள்ள தகவல் அரசியல் வட்டாரத்தில் கவனத்தை ஈர்த்துள்ளது.

தமிழக பாஜகவின் முன்னாள் தலைவரான அண்ணாமலை, அக்கட்சியில் இருந்து விலகிய பின்னர் ‘வீ த லீடர்ஸ்’ என்ற அமைப்பை முன்னெடுத்து வருகிறார். குறிப்பாக, இளைஞர்களை அரசியல் களத்தில் ஈடுபடுத்துவதற்கான முயற்சிகளில் அவர் கவனம் செலுத்தி வருவதாகக் கூறப்படுகிறது. இந்த நிலையில், அமைப்பின் உள்பகுதியில் அதிருப்தி உருவாகியுள்ளதாகத் தகவல்கள் வெளியாகியுள்ளன.

அமைப்பில் உள்ளதாகக் கூறப்படும் சில இளைஞர்கள் தெரிவிப்பதாவது, தமிழக பாஜகவில் அண்ணாமலைக்கு எதிராகச் சூழல் நிலவியபோது, அவருக்கு ஆதரவாக சமூக வலைதளங்களில் பிரசாரம் செய்ததுடன், சுவரொட்டிகள் ஒட்டுவது உள்ளிட்ட களப்பணிகளிலும் ஈடுபட்டனர். ஆனால், புதிய அமைப்பு தொடங்கப்பட்ட பிறகு, ஆரம்ப காலத்தில் இணைந்த தன்னார்வலர்களுக்கு முக்கியத்துவம் குறைந்துவிட்டதாக அவர்கள் கருதுகின்றனர்.

இதையும் படிங்க: அரசியல் சமூக மாற்றத்திற்கான கருவி: 21 லட்சம் தலைவர்கள் இணைந்ததாக அண்ணாமலை பெருமிதம்!

மேலும், புதிதாகப் பொறுப்பேற்ற சில நிர்வாகிகள் தனித்தனி ஆதரவுக் குழுக்களை உருவாக்குவதாகவும், அரசியல் அனுபவம் கொண்ட பழைய நிர்வாகிகளுக்கே நிகழ்ச்சிகளில் முன்னுரிமை வழங்கப்படுவதாகவும் அவர்கள் புகார் தெரிவிப்பதாகக் கூறப்படுகிறது. கோவையில் நடைபெற்ற ‘டாக்டர் அப்துல் கலாம் எத்திக்ஸ் அண்ட் பாலிடிக்ஸ் சென்டர்’ தொடக்க விழாவிலும் இளைஞர்கள் புறக்கணிக்கப்பட்டதாக அவர்கள் குற்றம்சாட்டியுள்ளனர்.

இந்த அதிருப்திக்குத் தீர்வு காண அண்ணாமலை நேரடியாகத் தலையிட்டு, இளைஞர்களின் கருத்துகளைக் கேட்டறிய வேண்டும் என்றும், அமைப்பின் முக்கிய முடிவுகளில் அவர்களுக்கும் உரிய பங்களிப்பு வழங்கப்பட வேண்டும் என்றும் கோரிக்கை எழுந்துள்ளது.

இதற்கிடையே, ‘வீ த லீடர்ஸ்’ அமைப்புக்கும் தமிழக பாஜகவுக்கும் இடையிலான விமர்சனங்களும் கவனத்தைப் பெற்றுள்ளன. அண்ணாமலை ஆதரவாளர்கள் சிலர் பாஜக நிர்வாகிகளை விமர்சிப்பதாகவும், அதற்குப் பதிலடியாக பாஜகவினரும் கருத்துகளைத் தெரிவிப்பதாகவும் அந்த அமைப்பு வட்டாரங்கள் கூறுகின்றன. தமிழக பாஜக தலைவர் நயினார் நாகேந்திரன் உள்ளிட்ட நிர்வாகிகள் குறித்த விமர்சனங்களும் இந்த விவாதத்தில் இடம்பெறுவதாகத் தகவல்கள் தெரிவிக்கின்றன.

திமுக, அதிமுக, தவெக உள்ளிட்ட கட்சிகளுக்கு மாற்றான அரசியல் தளத்தை உருவாக்குவதே அண்ணாமலையின் நோக்கம் எனக் கூறப்படும் நிலையில், பாஜகவுடனான மோதலே முன்னிலைப்படுத்தப்படுவது அந்த முயற்சியைப் பாதிக்கலாம் என்ற கருத்தும் எழுந்துள்ளது.

இளைஞர்களின் அதிருப்தி குறித்த புகார்களுக்கு அண்ணாமலை தரப்பில் அதிகாரப்பூர்வ விளக்கம் வெளியாகிறதா என்பதும், அமைப்பின் அடுத்தகட்ட நகர்வுகள் எவ்வாறு அமைகின்றன என்பதும் அரசியல் வட்டாரத்தில் எதிர்பார்ப்பை ஏற்படுத்தியுள்ளது.

இதையும் படிங்க: வீ தி லீடர்ஸ் வேட்பாளர்கள் தயார்! எப்போது அறிவித்தாலும் உள்ளாட்சித் தேர்தலில் போட்டி உறுதி! அண்ணாமலை அதிரடி!