தமிழ்நாடு தொழில்துறை வேலைவாய்ப்பில் இந்திய அளவில் முதலிடம் பெற்றதாக மத்திய அரசின் 2023-24 ஆண்டுக்கான வருடாந்திர தொழில் கணக்கெடுப்பு (ASI) அறிக்கை தெரிவித்துள்ளது. இந்த அறிக்கையின்படி, நாட்டின் மொத்த உற்பத்தித்துறை வேலைவாய்ப்பில் தமிழ்நாடு 15% பங்களிப்புடன் முதலிடம் வகிக்கிறது. இதனை முதலமைச்சர் மு.க.ஸ்டாலின் மற்றும் திமுக அரசு பெருமையுடன் பகிர்ந்து, திராவிட மாடல் ஆட்சியின் வெற்றியாகக் கூறியது.

இந்நிலையில், தமிழ்நாடு பாஜக தலைவர் கே.அண்ணாமலை, இன்று (ஆகஸ்ட் 28) எக்ஸ் தளத்தில் இந்தச் செய்தி குறித்து விமர்சனம் வெளியிட்டார். கடந்த கால சாதனைகளுக்கு பேட்ச்வொர்க் செய்து தொழில்துறை வேலைவாய்ப்பில் தமிழகம் முதலிடம் என முதலமைச்சர் மு.க ஸ்டாலின் பெருமைப்படுகிறார், கடந்த நிதி ஆண்டுடன் ஒப்பிடுகையில் தமிழ்நாட்டில் வேலை வாய்ப்பு விகிதம் உயரவில்லை என்று விமர்சித்துள்ள அண்ணாமலை, முதலமைச்சர் ஸ்டாலினுக்கு நினைவூட்டும் விதமாக, 2020-21 ஆண்டில் தமிழ்நாடு 15% பங்களிப்புடன் முதலிடத்தில் இருந்ததாகவும், இது புதிய சாதனை அல்ல என்றும் அவர் சுட்டிக்காட்டினார். 

இதையும் படிங்க: அடுத்த முதல்வர் இபிஎஸ்! வாங்க உழைக்கலாம்.. பூத் கமிட்டி மாநாட்டில் அண்ணாமலை சூளுரை..!

உ.பி.யில் வேலைவாய்ப்புப் பங்கு 1.2% ஆகவும், மகாராஷ்டிராவில் 0.7% ஆகவும் அதிகரித்துள்ளது. இதற்கிடையில், 2020-21 ஆம் ஆண்டைப் போலவே 2023-24 ஆம் ஆண்டிலும் தமிழ்நாட்டில் வேலைவாய்ப்புப் பங்கு அப்படியே உள்ளது. துபாயிலிருந்து வழங்கப்பட்ட ₹6000 கோடி முதலீடு என்ன ஆனது? கடந்த 4 ஆண்டுகளில் தொழில்துறை தொழில்முனைவோர் குறிப்பாணை மூலம் பெறப்பட்ட முதலீடுகளில் தமிழ்நாட்டின் நிலை என்னவென்று முதல்வருக்குத் தெரியுமா? என்று அண்ணாமலை கேள்வி எழுப்பியுள்ளார். 

மேலும், திமுக அரசின் மின் கட்டண உயர்வு, பொருளாதாரச் சுமை ஆகியவை தொழில்துறையைப் பாதிக்கின்றனவெனக் குற்றம்சாட்டினார். மத்திய அரசின் முயற்சிகளுக்கு மாநில அரசு ஒத்துழைப்பு அளிக்க வேண்டுமெனவும் அவர் வலியுறுத்தினார்.

தமிழ்நாட்டில் கடந்த சில ஆண்டுகளில் உயர்த்தப்பட்ட மின் கட்டணத்தை தளர்த்தி தொழில் நிறுவனங்களுக்கு நிவாரணம் வழங்க வேண்டும் என அமெரிக்கா வரி விதிப்பை எதிர்கொள்ளும் வகையில் மத்திய அரசு மேற்கொள்ளும் நடவடிக்கையை சுட்டிக்காட்டி அண்ணாமலை வலியுறுத்தியுள்ளார். அண்ணாமலையின் இந்த விமர்சனம், திமுக அரசின் பொருளாதாரக் கொள்கைகளை கேள்விக்கு உட்படுத்துவதாக அமைந்துள்ளது. 

தமிழ்நாட்டின் தொழில்துறை வளர்ச்சியை மத்திய அரசின் ஆதரவுடன் திமுக தனது சாதனையாகக் காட்டுவதாக அவர் மறைமுகமாக விமர்சித்தார். இது, எதிர்க்கட்சியான பாஜகவுக்கும் ஆளும் திமுகவுக்கும் இடையேயான அரசியல் மோதலை மேலும் தீவிரப்படுத்தியுள்ளது.

திமுகவோ, தொழில்துறை வளர்ச்சியில் தமிழ்நாடு தொடர்ந்து முன்னணியில் உள்ளதாகவும், இது மாநில அரசின் தொலைநோக்கு திட்டங்களின் வெற்றி எனவும் பதிலளித்துள்ளது. இந்த விவாதம், 2026 சட்டமன்றத் தேர்தலை முன்னிட்டு அரசியல் களத்தில் பரபரப்பை ஏற்படுத்தியுள்ளது. 

இதையும் படிங்க: வெற்றி வியூகம் வகுக்க நெல்லை வரும் அமித் ஷா!! சூடுபிடிக்கும் தமிழக தேர்தல் களம்!!