ஐபிஎல் திருவிழாவிற்கு முன்பாகத் தனது ரசிகர்களுக்கு ஒரு மெகா விருந்தினை அளிக்கச் சென்னை சூப்பர் கிங்ஸ் (CSK) நிர்வாகம் தயாராகிவிட்டது. மார்ச் 22 (ஞாயிற்றுக்கிழமை) மாலை, சென்னை எம்.ஏ. சிதம்பரம் மைதானத்தில் 'ROAR'26' என்ற பெயரில் முன் எப்போதும் இல்லாத ஒரு பிரம்மாண்ட ரசிகர் திருவிழா நடைபெற உள்ளது.

சிஎஸ்கே-வின் பொற்கால நாயகர்களான சின்னத் தல சுரேஷ் ரெய்னா, மேத்யூ ஹைடன், முரளி விஜய் மற்றும் எஸ். பத்ரிநாத் உள்ளிட்ட ஓல்ட் கார்டு வீரர்கள் மீண்டும் சேப்பாக்கம் மண்ணில் காலடி எடுத்து வைக்கின்றனர். இவர்கள் தற்போதைய சிஎஸ்கே அணியுடன் பல அதிரடிப் போட்டிகளில் மோதுவது ரசிகர்களுக்குப் பெரும் விருந்தாக அமையப்போகிறது.

இந்த மெகா கொண்டாட்டத்தின் ஒரு பகுதியாக, ஆஸ்கர் நாயகன் ஏ.ஆர். ரஹ்மான் நேரலையில் இசை நிகழ்ச்சி நடத்த உள்ளார். சேப்பாக்கம் மைதானம் முழுவதும் இசை மற்றும் விளக்குகளால் ஒளிரும் இந்தத் தருணம், ரசிகர்களுக்கு மறக்க முடியாத அனுபவத்தைத் தரும்.

இதையும் படிங்க: கூடுதல் மண்ணெண்ணெய் முதல் மின்சார மானியம் வரை! சிலிண்டர் தட்டுப்பாட்டை சமாளிக்க தமிழக அரசு போட்ட மாஸ்டர் பிளான்!

இந்த விழாவைக் காண விரும்பும் ரசிகர்கள் நாளை (மார்ச் 15) முதல் சிஎஸ்கே-வின் அதிகாரப்பூர்வ செயலி (CSK App), இணையதளம் (www.chennaisuperkings.com) மற்றும் 'டிஸ்ட்ரிக்ட்' (District.in) ஆகிய தளங்களில் டிக்கெட்டுகளை முன்பதிவு செய்யலாம். அதிகாரப்பூர்வமற்ற தளங்களில் டிக்கெட் வாங்கி ஏமாற வேண்டாம் எனவும் நிர்வாகம் எச்சரித்துள்ளது.

சிஎஸ்கே-வின் கடந்த காலச் சாதனைகளையும், வருங்கால நம்பிக்கையையும் கொண்டாடும் விதமாகத் திட்டமிடப்பட்டுள்ள இந்த நிகழ்விற்கு, ரசிகர்கள் தங்கள் 'மஞ்சள்' சீருடையுடன் வந்து வரலாற்றைச் சாட்சியாக இருக்குமாறு அழைப்பு விடுக்கப்பட்டுள்ளது.

கிரிக்கெட்டும், இசையும் கைகோர்க்கும் இந்த 'ROAR'26' திருவிழா, ஐபிஎல் 2026-க்கான ஒரு மாபெரும் முன்னோட்டமாக அமையும் என்பதில் சந்தேகமில்லை.

இதையும் படிங்க: உளவுத்துறை டிஜிபியாக பாலநாகதேவி நியமனம்..! தமிழ்நாடு அரசு முக்கிய உத்தரவு ..!!!