தமிழக அரசியலில் பரபரப்பை ஏற்படுத்தியுள்ள ஒரு முக்கிய நிகழ்வாக, பாஜக மாநில செய்தி தொடர்பாளர் ஏ.என்.ஏஸ். பிரசாத் அவரது பதவியிலிருந்து உடனடியாக விடுவிக்கப்பட்டுள்ளார். தமிழக வெற்றிக் கழகம் (த.வெ.க.) தலைவர் விஜய்யை அ.தி.மு.க.-பாஜக கூட்டணியில் இணைய அழைப்பு விடுத்த அவரது அறிக்கை காரணமாக இந்த நடவடிக்கை எடுக்கப்பட்டுள்ளது.

த.வெ.க. தலைவர் விஜய் அடிக்கடி "தி.மு.க.வை ஆட்சிக்கு வர விடாமல் தடுப்பதே என் லட்சியம்" என்று கூறி வருகிறார். இதை அடிப்படையாகக் கொண்டு, பிரசாத் "அது உண்மையானால், அவர் அ.தி.மு.க.-பாஜக (என்.டி.ஏ.) கூட்டணியில் இணைய வேண்டும்" என்று அறிக்கை வெளியிட்டிருந்தார். 

இது தி.மு.க. எதிர்ப்பு வாக்குகள் பிரியாமல் தடுக்க உதவும் என்றும் வலியுறுத்தியிருந்தார். ஆனால், பாஜக மாநில தலைவர் நயினார் நாகேந்திரன் "த.வெ.க. உடன் எந்த பேச்சுவார்த்தையும் நடக்கவில்லை" என்று தெளிவுபடுத்தியிருந்த நிலையில், பிரசாத்தின் கருத்து கட்சி நிலைப்பாட்டுக்கு எதிரானதாகக் கருதப்பட்டது.

இதையும் படிங்க: விஜய் உடன் நல்ல நட்பு உள்ளது! அவருக்கு உறுதுணையாக இருப்போம்! அமித்ஷாவிடம் ரங்கசாமி வாதம்!! பாஜக அப்செட்!

இதனால் சர்ச்சை எழுந்த சில மணி நேரங்களிலேயே, நயினார் நாகேந்திரன் இரவோடு இரவாக அறிவிப்பு வெளியிட்டார். "தமிழக பாஜக மாநில செய்தி தொடர்பாளர் ஏ.என்.ஏஸ். பிரசாத் இப்போதே அந்த பொறுப்பிலிருந்து விடுவிக்கப்படுகிறார். 

மேலும், சட்டமன்ற தேர்தல் மாநில பணிக்குழுவில் அவருக்கு ஒதுக்கப்பட்ட ஊடகத் துறை பொறுப்பிலிருந்தும் உடனடியாக விடுவிக்கப்படுகிறார்" என்று தெரிவித்தார். இது 2026 சட்டமன்ற தேர்தல் முன் பாஜகவில் ஏற்பட்டுள்ள உள் பதற்றத்தை வெளிப்படுத்துகிறது.

இதற்கிடையே, இதே கருத்தை தொடர்ந்து வலியுறுத்தி வரும் பாஜக மூத்த தலைவர் தமிழிசை சௌந்தரராஜனுக்கு ஏன் எந்த நடவடிக்கையும் இல்லை என்று பிரசாத் ஆதரவாளர்கள் கேள்வி எழுப்பி கொந்தளித்து வருகின்றனர். 

சமூக வலைதளங்களில் "ஒரே கருத்துக்கு வித்தியாசமான தண்டனை ஏன்?" என்ற விவாதம் தீவிரமடைந்துள்ளது. த.வெ.க. உடன் கூட்டணி வதந்திகள், விஜய்யை சி.பி.ஐ. விசாரணைக்கு அழைத்தது போன்றவை அரசியல் வட்டாரத்தில் பேசுபொருளாகியுள்ளன.

தமிழகத்தில் 2026 சட்டமன்ற தேர்தல் நெருங்கி வரும் நிலையில், பாஜக-அ.தி.மு.க. கூட்டணி உறுதியாக இருந்தாலும், த.வெ.க.வை அணுகும் முயற்சிகள் அல்லது அழைப்புகள் கட்சிக்குள் பிளவை ஏற்படுத்தியுள்ளதாக தெரிகிறது. இந்த சம்பவம் தமிழக அரசியலில் புதிய திருப்பத்தை ஏற்படுத்தும் என எதிர்பார்க்கப்படுகிறது.

இதையும் படிங்க: விஜய் உடன் கைகோர்த்த ரங்கசாமி! தவெக உடன் கூட்டணி! என்.ஆர்.காங்கிரஸ் முடிவால் பாஜக அதிர்ச்சி!