மத்திய மற்றும் மாநில அரசுகள் நடத்தும் அரசு விழாக்கள், அதிகாரப்பூர்வ நிகழ்ச்சிகள் மற்றும் பொதுநிகழ்வுகளில் மாநிலப் பாடல், தேசியப் பாடல் 'வந்தே மாதரம்' மற்றும் தேசிய கீதம் 'ஜன கண மன' பாடப்பட வேண்டிய வரிசை மற்றும் நடைமுறைகள் குறித்து மத்திய உள்துறை அமைச்சகம் புதிய வழிகாட்டுதல்களை வெளியிட்டுள்ளது. தேசிய சின்னங்கள் மற்றும் தேசியப் பாடல்களுக்கு உரிய மரியாதை அனைத்து நிகழ்வுகளிலும் ஒரே மாதிரியாக பின்பற்றப்பட வேண்டும் என்பதே இந்த புதிய உத்தரவின் முக்கிய நோக்கமாகும்.

புதிய வழிகாட்டுதலின்படி, மாநிலப் பாடல் பாடப்படும் நடைமுறை உள்ள மாநிலங்களில், அரசு விழாக்கள் தொடங்கும்போது முதலில் மாநிலப் பாடலே பாடப்பட வேண்டும் என்று தெரிவிக்கப்பட்டுள்ளது. அதன் பின்னர் தேசியப் பாடலான 'வந்தே மாதரம்' மற்றும் தேசிய கீதமான 'ஜன கண மன' ஆகியவை இடைவெளி இல்லாமல் தொடர்ச்சியாக பாடப்பட வேண்டும் என்றும் மத்திய உள்துறை அமைச்சகம் வலியுறுத்தியுள்ளது.

மேலும், மாநிலப் பாடல் மற்றும் தேசிய கீதத்திற்கு இடையில் வேறு எந்த பாடலும் இடம்பெறக் கூடாது என்று தெளிவாக அறிவுறுத்தப்பட்டுள்ளது. இதன் மூலம் அரசு நிகழ்ச்சிகளில் பாடல்களின் வரிசை குறித்து நிலவி வந்த குழப்பங்களுக்கு முற்றுப்புள்ளி வைக்கப்படும் என அதிகாரிகள் தெரிவிக்கின்றனர்.

இதையும் படிங்க: முதலில் தமிழ்த்தாய் வாழ்த்து!! மு.க.ஸ்டாலின் முட்டி மோதியதை சைலண்டாக சாதித்த விஜய்!!

தேசியப் பாடல் மற்றும் தேசிய கீதம் பாடப்படும் போது, அவற்றின் அசல் வரிகள், சரியான ராகம் மற்றும் துல்லியமான உச்சரிப்பை கட்டாயமாக பின்பற்ற வேண்டும் என்றும் அறிவுறுத்தப்பட்டுள்ளது. பாடல்களின் அங்கீகரிக்கப்பட்ட வரிகள் மற்றும் உச்சரிப்பு தொடர்பான அதிகாரப்பூர்வ வழிகாட்டுதல்கள் உள்துறை அமைச்சகத்தின் இணையதளத்தில் வெளியிடப்பட்டுள்ளதாகவும் குறிப்பிடப்பட்டுள்ளது.

இந்த புதிய நடைமுறைகளை அனைத்து மாநில அரசுகளும், யூனியன் பிரதேச நிர்வாகங்களும், மத்திய அமைச்சகங்களும், அரசு துறைகளும், கல்வி நிறுவனங்களும் மற்றும் பொதுத்துறை நிறுவனங்களும் தவறாமல் செயல்படுத்த வேண்டும் என்று மத்திய உள்துறை அமைச்சகம் கடிதம் மூலம் அறிவுறுத்தியுள்ளது. இதனை முழுமையாக அமல்படுத்த தேவையான நடவடிக்கைகளை மேற்கொள்ளுமாறும் மாநில தலைமைச் செயலாளர்களுக்கு உத்தரவிடப்பட்டுள்ளது.

நாடு முழுவதும் அரசு விழாக்களில் ஒரே மாதிரியான நடைமுறையை உருவாக்கும் வகையில் இந்த புதிய வழிகாட்டுதல்கள் முக்கியமானதாகக் கருதப்படுகின்றன. தேசிய சின்னங்கள் மற்றும் தேசியப் பாடல்களுக்கு உரிய மரியாதை வழங்கப்படுவதை உறுதி செய்வதோடு, அனைத்து அரசு நிகழ்ச்சிகளிலும் ஒரே விதிமுறையை நடைமுறைப்படுத்த இந்த நடவடிக்கை உதவும் என்று எதிர்பார்க்கப்படுகிறது.

இதையும் படிங்க: டெல்லி செங்கோட்டைக்கு வெடிகுண்டு மிரட்டல்!! பதறிப்போன போலீஸ்! பரபரப்பானது தலைநகரம்!