தமிழக முதலமைச்சர் சி. ஜோசப் விஜய் இன்று புதுக்கோட்டையில் நடைபெறும் பல்வேறு அரசு நிகழ்ச்சிகளில் பங்கேற்க சென்னையில் இருந்து தனி விமானம் மூலம் திருச்சிக்கு புறப்பட்டுச் சென்றார். திருச்சி விமான நிலையத்தில் இருந்து சாலை மார்க்கமாக புதுக்கோட்டை வரும் முதலமைச்சர், புதிய பேருந்து நிலையத்தை திறந்து வைத்து, அரசு விழாவில் பங்கேற்று ரூ.100 கோடிக்கும் அதிகமான மதிப்பிலான நலத்திட்ட உதவிகளை வழங்க உள்ளார்.

முதலமைச்சரின் வருகையை முன்னிட்டு புதுக்கோட்டை மாவட்டம் முழுவதும் பாதுகாப்பு மற்றும் முன்னேற்பாட்டுப் பணிகள் தீவிரப்படுத்தப்பட்டுள்ளன. குறிப்பாக, புதுக்கோட்டை புதிய பேருந்து நிலையம், கலைஞர் கருணாநிதி மாவட்ட விளையாட்டு மைதானத்தில் அமைக்கப்பட்டுள்ள உள்விளையாட்டு அரங்கம் ஆகியவற்றின் திறப்பு விழாவுக்கான இறுதிக்கட்டப் பணிகள் முழுவீச்சில் நடைபெற்று வருகின்றன.

புதிய பேருந்து நிலையம் திறப்பு... ரூ.100 கோடிக்கு மேல் நலத்திட்ட உதவிகள்!

முதலமைச்சர் விஜய் இன்று பிற்பகல் 12 மணி முதல் 12.20 மணிக்குள் புதுக்கோட்டை புதிய பேருந்து நிலையத்தை திறந்து வைக்கிறார். தொடர்ந்து, 12.30 மணிக்கு புதுக்கோட்டை ஆயுதப்படை மைதானத்தில் நடைபெறும் அரசு விழாவில் பங்கேற்கிறார்.

இதையும் படிங்க: 15 பதக்கங்களைக் குவித்த தமிழக வீரர்கள்! பாரா ஆசிய விளையாட்டில் சாதனை… முதலமைச்சர் விஜய் வாழ்த்து!

இந்த விழாவில் ரேஷன் அட்டைதாரர்களுக்கான நலத்திட்ட உதவிகள், பயனாளிகளுக்கு பட்டா வழங்குதல் உள்ளிட்ட பல்வேறு நலத்திட்ட உதவிகளை வழங்குகிறார். இதற்காக ரூ.100 கோடிக்கும் அதிகமான மதிப்பிலான திட்டங்கள் தயாராக உள்ளன. மேலும், புதுக்கோட்டை மாவட்டத்தின் பல்வேறு சட்டமன்றத் தொகுதிகளில் புதிய அரசு கட்டடங்களுக்கான அடிக்கல் நாட்டு விழாவும் நடைபெறுகிறது. ஏற்கெனவே கட்டி முடிக்கப்பட்டுள்ள அரசு கட்டடங்களை முதலமைச்சர் காணொலிக் காட்சி வாயிலாக திறந்து வைக்கிறார்.

கே.கே.சி. மைதானத்தில் அமைக்கப்பட்டுள்ள விளையாட்டு அரங்கத்தையும் முதலமைச்சர் திறந்து வைக்கிறார். இதன் மூலம் பேருந்து நிலையம், விளையாட்டு வசதிகள் மற்றும் பல்வேறு அரசு கட்டமைப்புத் திட்டங்கள் ஒரே நாள் நிகழ்ச்சி நிரலில் இடம்பெற்றுள்ளன.

5 கி.மீ. தூரத்திற்கு பேரிகார்டுகள்... சாலையோரம் பாதுகாப்பு ஏற்பாடுகள்!

முதலமைச்சரின் வருகையை முன்னிட்டு திருச்சி - ராமேஸ்வரம் தேசிய நெடுஞ்சாலையில் இருந்து புதுக்கோட்டை நகருக்குள் வரும் வழித்தடத்தில் விரிவான பாதுகாப்பு ஏற்பாடுகள் செய்யப்பட்டுள்ளன.

கட்டியாவயல் பகுதியில் தொடங்கி அரசு விருந்தினர் மாளிகை வரையிலான சுமார் 5 கிலோமீட்டர் தூரத்திற்கு சாலையின் இருபுறங்களிலும் பேரிகார்டுகள் அமைக்கப்பட்டுள்ளன. முதலமைச்சர் பயணிக்கும் வழித்தடத்தில் பொதுமக்கள் வரவேற்பு அளிப்பதற்கான ஏற்பாடுகளும் செய்யப்பட்டுள்ளன.

திருச்சியில் இருந்து புதுக்கோட்டை வரும் வழியில் மாத்தூர் ரவுண்டானா, மண்டையூர், லட்சுமணப்பட்டி சுங்கச்சாவடி, கீரனூர் பிரிவு சாலை, நார்த்தாமலை உள்ளிட்ட பகுதிகளில் முதலமைச்சருக்கு வரவேற்பு அளிக்க ஏற்பாடுகள் செய்யப்பட்டுள்ளன.

முதலமைச்சர் பயணிக்கும் சாலை விராலிமலை சட்டமன்றத் தொகுதிக்கு உட்பட்ட பகுதியில் அமைந்துள்ளதால், அங்கு இடைத்தேர்தல் நடைபெற உள்ள அரசியல் சூழலிலும் இந்தப் பயணம் கவனம் பெற்றுள்ளது. வழித்தடத்தில் பொதுமக்களை சந்தித்து அவர்களிடம் கோரிக்கை மனுக்களை முதலமைச்சர் பெறுவதற்கான வாய்ப்பும் உள்ளது.

4,500 போலீசார் பாதுகாப்பு... 13 மதுக்கடைகள் இன்று மூடல்!

முதலமைச்சரின் வருகையை முன்னிட்டு பாதுகாப்புப் பணிக்காக பல்வேறு மாவட்டங்களில் இருந்து சுமார் 4,500 போலீசார் புதுக்கோட்டைக்கு வரவழைக்கப்பட்டுள்ளனர். அவர்கள் முதலமைச்சர் செல்லும் வழித்தடம், புதிய பேருந்து நிலையம், அரசு விழா நடைபெறும் ஆயுதப்படை மைதானம், அரசு விருந்தினர் மாளிகை உள்ளிட்ட முக்கிய இடங்களில் பாதுகாப்புப் பணியில் ஈடுபடுகின்றனர்.

மேலும், முதலமைச்சர் பயணிக்கும் சாலையை ஒட்டிய பகுதிகள் மற்றும் புதுக்கோட்டை மாநகராட்சிக்கு உட்பட்ட பகுதிகளில் உள்ள 13 மதுக்கடைகள் இன்று ஒரு நாள் மூடப்பட்டுள்ளன.

மாவட்டம் முழுவதும் இன்று ஒரு நாள் ட்ரோன்கள் பயன்படுத்தவும் மாவட்ட நிர்வாகம் தடை விதித்துள்ளது. முதலமைச்சர் பங்கேற்கும் நிகழ்ச்சிகள் நடைபெறும் இடங்கள் அனைத்தும் காவல்துறையின் கட்டுப்பாட்டுக்குள் கொண்டுவரப்பட்டுள்ளன.

மதிய உணவுக்குப் பிறகு 2.45 மணிக்கு சென்னைக்கு புறப்படுகிறார்!

இன்றைய நிகழ்ச்சி நிரலின்படி, பிற்பகல் 1.15 மணியளவில் அரசு விழா நிறைவடைகிறது. அதன்பிறகு முதலமைச்சர் புதுக்கோட்டை அரசு விருந்தினர் மாளிகைக்குச் சென்று 1.30 மணியளவில் ஓய்வெடுக்கிறார். மதிய உணவை முடித்துக்கொண்டு சரியாக பிற்பகல் 2.45 மணிக்கு புதுக்கோட்டையில் இருந்து திருச்சி விமான நிலையத்திற்குப் புறப்படுகிறார்.

அங்கிருந்து தனி விமானம் மூலம் மீண்டும் சென்னைக்குச் செல்லும் வகையில் பயணத் திட்டம் தயாரிக்கப்பட்டுள்ளது.

புதிய பேருந்து நிலையம் திறப்பு, உள்விளையாட்டு அரங்கம் திறப்பு, ரூ.100 கோடிக்கும் அதிகமான நலத்திட்ட உதவிகள், புதிய அரசு கட்டடங்களுக்கு அடிக்கல் நாட்டுதல் என ஒரே நாளில் பல்வேறு நிகழ்ச்சிகளில் முதலமைச்சர் பங்கேற்க உள்ளதால் புதுக்கோட்டை மாவட்டம் முழுவதும் விழாக்கோலம் பூண்டுள்ளது.

இதையும் படிங்க: முதல்வரின் புதுக்கோட்டை விசிட்..! அரசு நிகழ்ச்சிப் பணிகள் தீவிரம்..! எகிறும் எதிர்பார்ப்பு..!!