தமிழகத்தில் விஜய் (Vijay) தலைமையிலான தமிழக வெற்றிக் கழக அரசின் அமைச்சரவை விரிவாக்கம் அரசியல் வட்டாரங்களில் பரபரப்பை ஏற்படுத்தியுள்ள நிலையில், கூட்டணி கட்சியான இந்திய தேசிய காங்கிரஸ் (Indian National Congress)க்கு ஒதுக்கப்பட உள்ள துறைகள் குறித்த தகவல்கள் தற்போது வெளியாகியுள்ளன.

அதன்படி, கிள்ளியூர் தொகுதி எம்.எல்.ஏ ராஜேஷ்குமாருக்கு சுற்றுலாத்துறையும், மேலூர் தொகுதி எம்.எல்.ஏ பெ. விஸ்வநாதனுக்கு உயர்கல்வித்துறையும் வழங்கப்படலாம் என அரசியல் வட்டாரங்களில் பேசப்படுகிறது.

கடந்த மே 10ஆம் தேதி முதலமைச்சராக விஜய் பதவியேற்றபோது, செங்கோட்டையன், புஸ்சி ஆனந்த், ஆதவ் அர்ஜுனா உள்ளிட்ட 9 அமைச்சர்களும் உடன் பதவியேற்றனர். பின்னர், கடந்த 16ஆம் தேதி அமைச்சர்களுக்கான துறைகள் ஒதுக்கப்பட்டன.

இதையும் படிங்க: கொங்கு மண்டலத்தை குறி வைக்கும் விஜய்!! தவெக அமைச்சரவையில் 8 பேருக்கு பதவி! அதிரடி திட்டம்!

ஆனால் வேளாண்மை, வனத்துறை, வருவாய், வீட்டுவசதி, உயர்கல்வி, கூட்டுறவு மற்றும் குறு, சிறு மற்றும் நடுத்தர தொழில்கள் போன்ற பல முக்கிய துறைகள் காலியாகவே இருந்தன. இதனால் விரைவில் அமைச்சரவை விரிவாக்கம் நடைபெறும் என்ற எதிர்பார்ப்பு உருவாகியது.

இந்த சூழலில், ஆட்சி அமைக்க ஆதரவு வழங்கிய காங்கிரஸ், விசிக மற்றும் இந்திய யூனியன் முஸ்லிம் லீக் போன்ற கூட்டணி கட்சிகளுக்கும் அமைச்சரவையில் இடமளிக்க வேண்டும் என்ற நிலைப்பாட்டில் விஜய் இருந்ததாக கூறப்படுகிறது. அதன்படி, காங்கிரஸ் சார்பில் வெற்றி பெற்ற மேலூர் தொகுதி எம்.எல்.ஏ விஸ்வநாதன் மற்றும் கிள்ளியூர் தொகுதி எம்.எல்.ஏ ராஜேஷ்குமார் ஆகியோர் அமைச்சரவையில் இடம்பெறுவது உறுதியாகியுள்ளது.

குமரி மாவட்டத்தைச் சேர்ந்த ராஜேஷ்குமார் சட்டப்படிப்பு முடித்தவர் என்பதாலும், சுற்றுலா வளர்ச்சிக்கு ஏற்ற மாவட்டத்தை பிரதிநிதித்துவப்படுத்துவதாலும் அவருக்கு சுற்றுலாத்துறை வழங்கப்படலாம் என கூறப்படுகிறது. அதேபோல், முன்னாள் எம்பியாக நாடாளுமன்ற அனுபவம் கொண்ட விஸ்வநாதனுக்கு உயர்கல்வித்துறை வழங்கப்படும் என தகவல் வெளியாகியுள்ளது.

இதுகுறித்து செய்தியாளர்களிடம் பேசிய காங்கிரஸ் மேலிட பொறுப்பாளர் கிரிஷ் சோடங்கர், “எந்த துறையை கொடுத்தாலும் மகிழ்ச்சியுடன் ஏற்றுக்கொள்வோம்” என தெரிவித்துள்ளார். அதே சமயம் விசிக மற்றும் ஐயுஎம்எல் கட்சிகள் அமைச்சரவையில் இணைவது குறித்து விரைவில் முடிவு அறிவிக்க உள்ளதாக கூறப்படுகிறது.

இதையும் படிங்க: சென்னையில் மட்டும் 7 அமைச்சர்கள்!! தலைநகரில் தனிகவனம் செலுத்தும் விஜய்! பின்னணி இதோ!