வாக்குப்பதிவு இயந்திரங்களுக்கு (EVM) மாற்றாக வாக்குச்சீட்டு முறையிலேயே (Ballot Paper) தேர்தல்களை நடத்த வேண்டும் என்று காங்கிரஸ் உள்ளிட்ட எதிர்க்கட்சிகள் தொடர்ந்து கோரிக்கை வைத்து வரும் சூழலில், நான்கு முக்கிய மாநிலங்களில் வாக்குச்சீட்டு முறையில் நடைபெற்ற 28 சட்ட மேலவை (MLC) தொகுதிகளுக்கான தேர்தல்களில் காங்கிரஸ் கட்சி ஒரு இடத்தைக் கூட வெல்லாமல் படுதோல்வி அடைந்ததைச் சுட்டிக்காட்டி பிரதமர் நரேந்திர மோடி தனது எக்ஸ் (X) தளத்தில் கிண்டலாகப் பதிவிட்டுள்ளார்.  

 உத்தரப் பிரதேசம், மகாராஷ்டிரா, பீகார் மற்றும் காங்கிரஸ் ஆளும் கர்நாடகா ஆகிய நான்கு பெரிய மாநிலங்களில் பட்டதாரிகள் மற்றும் ஆசிரியர்கள் தொகுதிகள் உள்ளிட்ட 28 சட்ட மேலவை இடங்களுக்கு அண்மையில் தேர்தல் நடைபெற்றது. சட்ட மேலவைக்கான இத்தேர்தல்கள் வாக்குச்சீட்டு முறையைப் பயன்படுத்தியே நடத்தப்பட்டன.   

இதையும் படிங்க: ஒருபக்கம் SIR போராட்டம்.. மறுபக்கம் வியட்நாமில் ராகுலா? கிண்டலடிக்கும் பாஜக.. காங்கிரஸ் பதிலடி!!

இந்தத் தேர்தல் முடிவுகள் வெளியானதைத் தொடர்ந்து, தனது அதிகாரப்பூர்வ சமூக வலைதளப் பக்கத்தில் பதிவிட்டுள்ள பிரதமர் நரேந்திர மோடி, "உத்தரப் பிரதேசம், மகாராஷ்டிரா, பீகார் மற்றும் கர்நாடகா ஆகிய 4 பெரிய மாநிலங்களில் 28 தொகுதிகளுக்கு எம்.எல்.சி தேர்தல் வாக்குச்சீட்டு முறையில்தான் நடந்தது. 

காங்கிரஸ் கட்சி எத்தனை இடங்களை வென்றது என்று நினைக்கிறீர்கள்?" எனக் கேள்வி எழுப்பி, காங்கிரஸ் கட்சி பூஜ்ஜிய இடங்களில் சுருண்டதை மறைமுகமாகக் கிண்டல் செய்துள்ளார்.   

தேர்தல்களில் தோல்வியடையும் போதெல்லாம் மின்னணு வாக்குப்பதிவு இயந்திரங்களில் முறைகேடு நடப்பதாகக் குற்றம்சாட்டி, பழைய வாக்குச்சீட்டு முறையைக் கொண்டுவர வேண்டும் என காங்கிரஸ் கட்சி தொடர்ச்சியாகப் பிரசாரம் செய்து வரும் நிலையில், அதே வாக்குச்சீட்டு முறையில் நடைபெற்ற 28 இடங்களிலும் அக்கட்சி ஒரு தொகுதியைக் கூட வெல்ல முடியாமல் போனதைச் சுட்டிக்காட்டியுள்ள பிரதமரின் இந்த விமர்சனம், தேசிய அரசியல் அரங்கில் பெரும் விவாதத்தை ஏற்படுத்தியுள்ளது.

இதையும் படிங்க: தோற்றால் தேர்தல் ஆணையம் மீது பழியா?': ராகுல் காந்தியை கடுமையாக சாடிய அமித் ஷா!