சென்னை: தமிழக சட்டசபைத் தேர்தலில் 28 தொகுதிகளில் போட்டியிடும் காங்கிரஸ் கட்சி, தனது தேர்தல் அறிக்கையை வெளியிட்டுள்ளது. “தமிழகத்தை முன்னேற்றுவோம்” என்ற தலைப்பில் 36 பக்கங்கள் கொண்ட இந்த அறிக்கையை கர்நாடக துணை முதல்வர் டி.கே. சிவக்குமார் வெளியிட்டார்.
காங்கிரஸ் வெளியிட்டுள்ள முக்கிய வாக்குறுதிகள் வருமாறு: மாநில அரசு துறைகளில் உள்ள 3 லட்சம் காலி பணியிடங்களை விரைவில் நிரப்ப நடவடிக்கை எடுக்கப்படும். ரேஷன் அட்டை வைத்திருப்பவர்களுக்கு மாதம் ரூ.2,000 நிதியுதவி வழங்கப்படும். காவல்துறையில் 40,000 பணியிடங்கள் நிரப்பப்படும். நிலமற்ற விவசாயிகளுக்கு ஆண்டுக்கு ரூ.6,000 உதவித் தொகை வழங்கப்படும். முதியோர் மற்றும் மாற்றுத்திறனாளிகளுக்கு மாதம் ரூ.2,000 பென்சன் உறுதி செய்யப்படும்.
கல்வி துறையில் 6 மண்டலங்களிலும் தனிச் சிறப்பு பள்ளிகள் உருவாக்கப்படும். அரசு பள்ளிகளில் செயற்கை நுண்ணறிவு (AI) தொழில்நுட்ப உதவியுடன் கற்றல் முறை அறிமுகப்படுத்தப்படும். ஆசிரியர்களுக்கு AI பயிற்சி அளிக்கப்படும். 38 மாவட்டங்களிலும் மனநல மருத்துவமனைகள் அமைக்கப்படும். மனநல முதலுதவிக்கு 10,000க்கும் மேற்பட்ட சுகாதாரப் பணியாளர்கள் பயிற்றுவிக்கப்படுவார்கள்.
இதையும் படிங்க: அதிருப்தியில் அண்ணாமலை?! தேர்தல் முடிவில் எதிரொலிக்கும்! பாஜக தேசிய தலைவர் உடைத்த உண்மை!!
சுகாதாரத் துறையில் ஆரம்ப சுகாதார மையங்களின் உள்கட்டமைப்பு பலப்படுத்தப்படும். 2030ஆம் ஆண்டுக்குள் ரேபிஸ் மரணங்கள் இல்லாத தமிழகம் உருவாக்கப்படும். அனைத்து ரேஷன் கடைகளிலும் தரமான அரிசி வழங்கப்படும். விவசாயப் பொருட்களை சந்தைப்படுத்துவதற்கு தனி வாரியம் அமைக்கப்படும். பாசனக் கால்வாய்கள் மீட்டெடுக்கப்பட்டு நவீனமயமாக்கப்படும்.
தமிழகத்தை உலகளாவிய ஆன்மிக சுற்றுலா மையமாக மாற்ற நடவடிக்கை எடுக்கப்படும். முக்கிய நகரங்களில் 24 மணி நேரமும் சுத்தமான குடிநீர் வழங்கப்படும். குறைந்த விலையில் வீடுகள் கட்டித்தரப்படும். விரைவாக நிலப்பட்டா வழங்கப்படும். இரு மொழிக் கொள்கையை தமிழகத்தில் பின்பற்றப்படும்.
காங்கிரஸ் கட்சியின் இந்த வாக்குறுதிகள் தமிழக அரசியல் களத்தில் பெரும் கவனத்தை ஈர்த்துள்ளன. தேர்தல் அறிக்கை வெளியீட்டு விழாவில் பங்கேற்ற தலைவர்கள், இந்த வாக்குறுதிகள் தமிழகத்தின் வளர்ச்சியை துரிதப்படுத்தும் என்று நம்பிக்கை தெரிவித்தனர்.
இதையும் படிங்க: நெல்லை அபார்ட்மெண்டில் சிக்கியதா ரூ.200 கோடி?! அரசியல் கட்சியினர் பதுக்கிய பணம்?! போலீஸ் கப்சிப்!