டெல்லியில் போராட்டம் நடத்துவதற்காக ஒதுக்கப்பட்டிருந்த இடங்களின் பட்டியலில் இருந்து நீக்கப்பட்டுள்ள ஜந்தர் மந்தர் சாலை, வரலாற்று முக்கியத்துவம் வாய்ந்த பல போராட்டங்கள் நடைபெற்ற இடமாகும். அதன் வரலாற்றுப் பின்னணி குறித்து பார்க்கலாம். 

ஜந்தர் மந்தர் சாலை என்பது வெறும் போராட்டக் களம் மட்டுமல்ல; இந்திய வானியல் வரலாற்றின் முக்கியமான இடமாகவும் திகழ்கிறது. ஜெய்ப்பூர் மகாராஜா சவாய் ஜெய் சிங்கால் 18ஆம் நூற்றாண்டில் வானியல் ஆய்வுகள் மற்றும் நேரத்தைக் கணக்கிடுவதற்காக 1724ஆம் ஆண்டு கட்டப்பட்டதே ஜந்தர் மந்தர்.

சமஸ்கிருத மொழியில் ‘ஜந்தர்’ என்றால் கருவி என்றும், ‘மந்தர்’ என்றால் கணக்கீடு என்றும் பொருள். இங்கு அமைந்துள்ள சாம்ராட் யந்திரா, ஜெயபிரகாஷ் யந்திரா, ராம் யந்திரா ஆகிய கருவிகள், நவீனத் தொலைநோக்கிகள் பயன்பாட்டுக்கு வருவதற்கு முன்பே சூரியன் மற்றும் கோள்களின் நிழல்களை அடிப்படையாகக் கொண்டு நேரத்தைக் கணக்கிடப் பயன்படுத்தப்பட்டன.

இதையும் படிங்க: டெல்லி போராட்டத்திற்கு செக்...! ஜந்தர் மந்திரில் போராட தடை..! காவல்துறை அறிவிப்பு..!

இவ்வளவு முக்கியத்துவம் வாய்ந்த இந்தப் பகுதி, 1993ஆம் ஆண்டில் தான் ஜனநாயகப் போராட்டங்களுக்கான முக்கியக் களமாக மாறியது. அதுவரை போராட்டங்கள் நடைபெறும் இடமாக இருந்த டெல்லி போட் கிளப் பகுதியில், 1988ஆம் ஆண்டு மகேந்திர சிங் திகாயத் தலைமையில் லட்சக்கணக்கான விவசாயிகள் திரண்டு நடத்திய மாபெரும் போராட்டத்தால் தலைநகரமே ஸ்தம்பித்தது.

இதையடுத்து, அங்கு போராட்டங்கள் நடத்தத் தடை விதிக்கப்பட்டு, 1993ஆம் ஆண்டு நாடாளுமன்றத்துக்கு அருகே உள்ள ஜந்தர் மந்தர் சாலை போராட்டங்களுக்கான இடமாகத் தேர்வு செய்யப்பட்டது.

டெல்லியின் மையப்பகுதியில் அமைந்துள்ளதால், நாட்டின் முக்கியப் பிரச்சினைகளை எதிரொலிக்கும் போராட்டங்களின் மையமாக ஜந்தர் மந்தர் சாலை உருவெடுத்தது.

பாலியல் வன்கொடுமையால் பாதிக்கப்பட்ட நிர்பயாவுக்கு நீதி கோரி நடைபெற்ற போராட்டம், அண்ணா ஹசாரே தலைமையிலான ஊழல் எதிர்ப்பு இயக்கத்தின் போராட்டம், மல்யுத்த வீராங்கனைகளின் போராட்டம், ராணுவ வீரர்களுக்கு ‘ஒரே பதவி, ஒரே ஓய்வூதியம்’ திட்டத்தை வலியுறுத்தி நடத்தப்பட்ட போராட்டம் உள்ளிட்ட பல முக்கியப் போராட்டங்கள் இங்கு நடைபெற்றுள்ளன.

வரலாற்றுச் சிறப்புமிக்க இந்த இடத்தில் போராட்டங்கள் நடைபெறுவதால் காற்று மாசுபாடு மற்றும் ஒளி மாசுபாடு ஏற்படுவதாகப் புகார்கள் எழுந்தன. இதையடுத்து, உச்சநீதிமன்றத்தின் வழிகாட்டுதலின்படி, குறைந்த எண்ணிக்கையிலானோர் பங்கேற்கும் போராட்டங்களுக்கு மட்டுமே அனுமதி வழங்கப்பட்டு வந்தது.

இந்நிலையில், டெல்லியில் போராட்டங்களை நடத்துவதற்கான மாற்று இடங்களை ஆராய மத்திய உள்துறை அமைச்சகம் ஒரு குழுவை அமைத்திருந்தது. அந்தக் குழு அளித்த பரிந்துரைகளின் அடிப்படையில், போராட்டங்கள் நடத்துவதற்கான இடங்களின் பட்டியலில் இருந்து ஜந்தர் மந்தர் நீக்கப்பட்டுள்ளது.

அதற்குப் பதிலாக, ராம்லீலா மைதானம், புராரி மைதானம் மற்றும் கிழக்கு டெல்லியில் உள்ள சிபிடி மைதானம் ஆகிய மூன்று இடங்கள் போராட்டங்கள் நடத்துவதற்கான இடங்களாக அறிவிக்கப்பட்டுள்ளன.

இந்த மூன்று இடங்களிலும் போராட்டங்கள் மற்றும் ஆர்ப்பாட்டங்கள் நடத்துவதற்கான புதிய வழிகாட்டு நெறிமுறைகள் விரைவில் அறிவிக்கப்படும் என்று டெல்லி காவல்துறை ஆணையர் அனுராக் குமார் தெரிவித்துள்ளார்.

தொன்மையான வரலாற்றுச் சின்னமாகத் திகழ்ந்த ஜந்தர் மந்தர் பகுதி, கடந்த மூன்று தசாப்தங்களாக நாட்டில் நடைபெற்ற ஜனநாயகப் போராட்டங்களின் தடமாகவும், பல தலைமுறைகளின் ஜனநாயகக் குரல் ஒலித்த இடமாகவும் வரலாற்றில் இடம்பிடித்துள்ளது.

இதையும் படிங்க: உச்சக்கட்ட பரபரப்பு...!! - விடிந்ததுமே தலைகீழாக மாறிய டெல்லி... இன்று மாலை 4 மணி வரை அதிரடி கட்டுப்பாடு அறிவிப்பு...!