சென்னை: தி.மு.க முன்னாள் அமைச்சர் ஈ.வி.வேலு உடல்நிலை சரியில்லை எனக் காரணம் காட்டி, இன்று (ஜூலை 3) லஞ்ச ஒழிப்புத்துறை போலீஸ் விசாரணைக்கு ஆஜராகவில்லை. இது அரசியல் வட்டாரத்தில் பரபரப்பை ஏற்படுத்தியுள்ளது.

கடந்த தி.மு.க ஆட்சியில் பொதுப்பணிகள், நெடுஞ்சாலை மற்றும் சிறு துறைமுகங்கள் துறை அமைச்சராகப் பொறுப்பு வகித்தவர் ஈ.வி.வேலு. தற்போது திருவண்ணாமலை தொகுதி எம்.எல்.ஏ.வாக உள்ளார். அவர் அமைச்சராக இருந்தபோது, கரூரில் சாலை அமைக்காமலேயே சங்கரானந்த் எனும் நிறுவனத்துக்கு 3.23 கோடி ரூபாய் ஒதுக்கீடு செய்ததாகக் குற்றச்சாட்டு எழுந்தது.

இந்த விவகாரம் தொடர்பாக லஞ்ச ஒழிப்புத்துறை போலீசார் வழக்குப் பதிவு செய்துள்ளனர். ஈ.வி.வேலு, நெடுஞ்சாலைத் துறை பொறியாளர்கள் 9 பேர் மற்றும் சங்கரானந்த் நிறுவனத்தின் நிர்வாகி சங்கர் ஆனந்த் உள்ளிட்ட 11 பேர் மீது வழக்கு தொடரப்பட்டுள்ளது. 

இதையும் படிங்க: டெண்டர் முறைகேடு! ரூ.1,800 கோடி ஒப்பந்த பாக்கி முடக்கம்!! அதிரடி காட்டிய முதல்வர் விஜய்!

கடந்த ஜூன் 26-ம் தேதி வேலுவின் இல்லம், அவருக்கு சொந்தமான கல்வி நிறுவனங்கள் உள்ளிட்ட 40 இடங்களில் லஞ்ச ஒழிப்புத்துறை அதிகாரிகள் அதிரடி சோதனை நடத்தினர். இதில் 40 லட்சம் ரூபாய் பணம் மற்றும் முக்கிய ஆவணங்கள் பறிமுதல் செய்யப்பட்டன.

இந்த வழக்கில் விசாரணைக்கு இன்று நேரில் ஆஜராகுமாறு ஈ.வி.வேலுவுக்கு சம்மன் அனுப்பப்பட்டிருந்தது. ஆனால் அவர் உடல்நிலை காரணமாக விசாரணைக்கு வரவில்லை. அவரது வழக்கறிஞர் தரப்பில், திங்கட்கிழமை அல்லது வேறு சில நாட்களில் ஆஜராக அனுமதி கோரப்பட்டுள்ளதாகத் தகவல் வெளியாகியுள்ளது.

இந்த விவகாரம் தி.மு.கவுக்குள் பதற்றத்தை ஏற்படுத்தியுள்ளது. எதிர்க்கட்சிகள் இதைப் பயன்படுத்தி அரசுக்கு எதிராகக் கிளப்பிவிட முயற்சிப்பதாகவும் அரசியல் நோக்கர்கள் கருதுகின்றனர். முன்னாள் அமைச்சர் மீதான குற்றச்சாட்டு மற்றும் சோதனை நடவடிக்கைகள் தமிழ்நாட்டு அரசியலில் பெரும் பேச்சாக மாறியுள்ளன.

லஞ்ச ஒழிப்புத்துறை போலீசார் விரைவில் அடுத்தகட்ட நடவடிக்கையை மேற்கொள்ள உள்ளதாகத் தெரிகிறது. ஈ.வி.வேலு எப்போது விசாரணைக்கு ஆஜராகப் போகிறார் என்பதைப் பொறுத்தே வழக்கின் முன்னேற்றம் அமையும் என எதிர்பார்க்கப்படுகிறது. 

இதையும் படிங்க: டெண்டர் இல்லாமல் ரூ.1.35கோடிக்கு அட்வான்ஸ்? வாய்மொழி உத்தரவுக்கு வாரி வழங்கிய திமுக! முறைகேடு அம்பலம்?