பீஹார் தேர்தல் பிரசாரத்தில், தமிழகத்தில் வாழும் பீஹாரிகளை தி.மு.க. அரசு தவறாக நடத்துவதாக பிரதமர் நரேந்திர மோடி கூறியதற்கு தி.மு.க. தலைவர்கள் கடும் எதிர்ப்பு தெரிவித்திருக்கும் நிலையில், அந்த கருத்துக்கு வலு சேர்க்கும் வகையில் தி.மு.க. அமைச்சர் கே.என். நேரு அதிரடியாக பேசியுள்ளார். 

இது தி.மு.க. கட்சியினரிடையே குழப்பத்தை ஏற்படுத்தியுள்ளது. திருச்சியில் நடந்த கட்சி ஆலோசனை கூட்டத்தில் நேரு கூறியது, பீஹாரிகள் உள்ளிட்ட வட இந்திய தொழிலாளர்களை வாக்காளர் பட்டியலில் சேர்க்க வேண்டாம் என்பதாக இருந்தது. இந்த பேச்சு, கட்சியின் உள் விவகாரங்களை கிளறி, சமூக ஊடகங்களில் பெரும் பரபரப்பை ஏற்படுத்தியுள்ளது.

பீஹார் தேர்தல் பிரசாரத்தில் பிரதமர் மோடி, "தமிழகத்தில் உழைக்கும் பீஹாரின் கடின உழைப்பாளிகளை தி.மு.க. அரசு அவமானப்படுத்துகிறது" என்று கூறியது தி.மு.க. தலைவர்களை ஆத்திரப்படுத்தியது. முதலமைச்சர் மு.க. ஸ்டாலின் உள்ளிட்ட தலைவர்கள், "இது தவறான குற்றச்சாட்டு. தமிழகம் அனைவருக்கும் வாய்ப்பு தரும் நிலம்" என்று பதிலடி கொடுத்தனர். 

இதையும் படிங்க: உண்ணாவிரத போராட்டம் வாபஸ்! தீர்வு கிடைத்தது! தருமபுரம் ஆதினம் கோபம் தணிந்தது!

ஆனால், அந்த விவாதத்தின் நடுவே திருச்சி மத்திய மற்றும் வடக்கு மாவட்ட தி.மு.க. சார்பில் நடந்த 'என் வாக்குச்சாவடி; வெற்றி வாக்குச்சாவடி' என்ற தலைப்பிலான ஆலோசனை கூட்டத்தில் அமைச்சர் கே.என். நேரு பேசியது பெரும் அதிர்ச்சியை ஏற்படுத்தியுள்ளது.

அமைச்சர் நேரு பேசியதாவது: "பீஹாரிகள் உள்ளிட்ட வட மாநிலத்தவர்கள், தமிழகத்தில் வேலைக்காக வந்து மூன்று மாதங்கள் ஒரே இடத்தில் தங்கியிருந்தால் மட்டுமே அவர்களை வாக்காளர் பட்டியலில் சேர்க்கலாம். ஆனால், அவர்கள் இடம் மாறி தொழிலுக்காக சுற்றி வழிந்து கொண்டே இருப்பார்கள். எனவே, அவர்களை வாக்காளர் பட்டியலில் சேர்க்க வேண்டாம். இதை கட்சி நிர்வாகிகள் அதிகாரிகளிடம் தெரிவித்து ஆட்சேபனை செய்யுங்கள்." இந்த வார்த்தைகள், பிரதமர் மோடியின் குற்றச்சாட்டுக்கு தானாகவே ஆதாரமாக மாறியுள்ளன.

மேலும், நேரு, "முஸ்லிம் சமூகத்தினரின் ஓட்டுகள் ஒன்று கூட வாக்காளர் பட்டியலில் இருந்து விடுபடாமல் பார்த்துக் கொள்ளுங்கள். தேர்தல் அலுவலர்கள் தி.மு.க.வுக்கு ஓட்டளிப்போரை தவிர்க்க திட்டமிட்டால், அதை உடனடியாக தடுத்து நிறுத்துங்கள். ஒரே நேரத்தில் 100 அல்லது 200 வாக்காளர்களை மொத்தமாக சேர்ப்பதை எதிர்த்து போராடுங்கள்" என்றும் அறிவுறுத்தினார். 

இந்த பேச்சு, தேர்தல் தயாரிப்புகளைப் பற்றிய உள்நோக்கமான விவாதமாக இருந்தாலும், பீஹாரி தொழிலாளர்கள் குறித்த பகுதி சமூக ஊடகங்களில் வைரலாகி, பாஜகவினர் இதை தங்கள் ஆதாரமாக பயன்படுத்தத் தொடங்கியுள்ளனர்.

இந்த பேச்சால் தி.மு.க. கட்சியினர் குழப்பத்தில் ஆழ்த்தப்பட்டுள்ளனர். "பீஹாரிகளை வாக்காளர் பட்டியலில் சேர்க்கலாமா? கூடாதா?" என்ற கேள்வி கட்சி உள்ளுக்குள்ள பரவியுள்ளது. சிலர், "இது தேர்தல் உத்தியாக இருக்கலாம்" என்று சொல்ல, மற்றவர்கள் "இது கட்சியின் உள் ஐடியாலஜி மோதல்களை வெளிப்படுத்துகிறது" என்று விமர்சிக்கின்றனர். பாஜக தலைவர்கள் இதை "தி.மு.க.வின் உண்மை முகம்" என்று விளம்பரப்படுத்தி வருகின்றனர்.

தமிழகத்தில் லட்சக்கணக்கான வட இந்திய தொழிலாளர்கள் வேலை செய்கின்றனர். அவர்களின் உரிமைகள் பாதுகாக்கப்பட வேண்டும் என்று சமூக ஆர்வலர்கள் கூறுகின்றனர். ஆனால், தேர்தல் அரசியலில் இது புதிய சர்ச்சையாக மாறியுள்ளது. தி.மு.க. இந்த விவகாரத்தில் என்ன நிலைப்பாட்டை எடுக்கும் என்பது அனைவரும் காத்திருக்கின்றனர். இந்த சம்பவம், அடுத்த தமிழக சட்டமன்றத் தேர்தலில் பெரும் பாதிப்பை ஏற்படுத்தலாம் என்று அரசியல் கட்சிகள் கருதுகின்றன.

இதையும் படிங்க: மகளை களமிறக்க ராமதாஸ் மாஸ்டர் ப்ளான்!! தருமபுரியில் போட்டி! திமுக கூட்டணிக்கு தூது! அன்புமணி அப்செட்!