தமிழகச் சட்டமன்றத் தேர்தலில் பாட்டாளி மக்கள் கட்சியின் நிறுவனர் டாக்டர் ராமதாஸ் தலைமையிலான அணிக்குத் தேர்தல் ஆணையம் 'கேஸ் சிலிண்டர்' (Gas Cylinder) சின்னத்தை ஒதுக்கியுள்ளது. தனது ஆதரவு பெற்ற 30 வேட்பாளர்கள் இச்சின்னத்தில் போட்டியிடுவார்கள் என்றும், அவர்களுக்கு மக்கள் ஆதரவு அளிக்க வேண்டும் என்றும் அவர் அதிகாரப்பூர்வமாக அறிவித்துள்ளார்.
பாமகவில் ஏற்பட்ட பிளவைத் தொடர்ந்து, சின்னம் தொடர்பான சட்டப் போராட்டத்தில் நீதிமன்றம் அன்புமனி ராமதாஸ் தரப்பிற்கே 'மாம்பழம்' சின்னத்தை வழங்கியது. இதனால், டாக்டர் ராமதாஸ் தலைமையிலான பாமக (S. ராமதாஸ்) அணிக்குத் தற்போது 'சிலிண்டர்' சின்னம் ஒதுக்கப்பட்டுள்ளது.
தமிழகம் முழுவதும் எனது ஆதரவு பெற்றுப் போட்டியிடும் 30 வேட்பாளர்களுக்கும் சிலிண்டர் சின்னம் ஒதுக்கப்பட்டுள்ளது. பொதுமக்கள் மற்றும் பாட்டாளி சொந்தங்கள் அனைவரும் வரும் ஏப்ரல் 23-ஆம் தேதி சிலிண்டர் சின்னத்தில் வாக்களித்து எமது வேட்பாளர்களை வெற்றி பெறச் செய்ய வேண்டும்" என ராமதாஸ் வேண்டுகோள் விடுத்துள்ளார்.
இதையும் படிங்க: ஸ்டாலினை புதைக்கலாம்.. என் திட்டங்களை முடியாது! எடப்பாடி பழனிசாமிக்கு முதலமைச்சர் மு.க.ஸ்டாலின் சவால்!
டாக்டர் ராமதாஸ் தலைமையிலான அணி, வி.கே. சசிகலாவின் 'அகில இந்திய புரட்சித் தலைவர் மக்கள் முன்னேற்றக் கழகம்' (AIPTMMK) உடன் கூட்டணி அமைத்துப் போட்டியிடுகிறது. இந்தக் கூட்டணியின் ஒரு பகுதியாகப் பாமக (ராமதாஸ் அணி) 37 தொகுதிகளில் களம் காண்கிறது. இதில் முதற்கட்டமாக 30 வேட்பாளர்களுக்குச் சிலிண்டர் சின்னம் உறுதி செய்யப்பட்டுள்ளது.
சமையல் எரிவாயு விலை உயர்வு ஒரு முக்கிய அரசியல் பிரச்சனையாக உள்ள சூழலில், தங்களுக்குச் சிலிண்டர் சின்னம் கிடைத்திருப்பது சாதகமான அம்சமாக அமையும் என ராமதாஸ் தரப்பு கருதுகிறது. சமானிய மக்களின் வாழ்வாதாரத்தைப் பிரதிபலிக்கும் வகையில் இந்தச் சின்னத்தைப் பயன்படுத்தித் தீவிரப் பிரச்சாரம் மேற்கொள்ள அவர்கள் திட்டமிட்டுள்ளனர்.
தமிழகத் தேர்தல் களம் சூடுபிடித்துள்ள நிலையில், மாம்பழம் மற்றும் சிலிண்டர் என இருவேறு சின்னங்களில் பாமகவின் இரு அணிகளும் களம் காண்பது தொண்டர்களிடையே ஒருவித குழப்பத்தையும், அதேசமயம் புதுமையான போட்டியையும் உருவாக்கியுள்ளது.
இதையும் படிங்க: தமிழக தேர்தல் 2026: வேட்புமனுவை திரும்ப பெற இன்றே கடைசி! மாலை 3 மணிக்கு இறுதி பட்டியல்!