தமிழகத்தில் சட்டம் ஒழுங்கு சீர்குலைந்து குற்றச் சம்பவங்கள் தொடர்ந்து நடைபெற்று வருவதை ஆளும் தவெக அரசு முதலில் ஏற்றுக்கொண்டால்தான் அதற்குத் தீர்வு காண முடியும் என்றும், இதற்கு ஒரே தீர்வு முதலமைச்சர் விஜய் வீட்டுக்குப் போவதும், அதிமுக பொதுச்செயலாளர் எடப்பாடி பழனிசாமி செயிண்ட் ஜார்ஜ் கோட்டைக்குச் செல்வதும்தான் என்றும் அதிமுக முன்னாள் அமைச்சர் ஆர்.பி.உதயகுமார் காட்டமாகக் கூறியுள்ளார்.

மதுரையில் இன்று செய்தியாளர்களைச் சந்தித்த முன்னாள் அமைச்சர் ஆர்.பி.உதயகுமார் மாநிலத்தில் நாள்தோறும் பல்வேறு குற்றச் சம்பவங்கள் அரங்கேறி வருகின்றன. எந்தவொரு நிர்வாகத்திலும் முதலில் குற்றம் நடக்கிறது என்பதை வெளிப்படையாக ஒப்புக்கொண்டால்தான் அதற்கான முறையான தீர்வை நோக்கி நகர முடியும். 

ஆனால், தற்போதைய தவெக அரசு எந்தக் குற்றத்தையும், நிர்வாகத் தவறுகளையும் ஒப்புக்கொள்ளவே தயாராக இல்லை. ஆளும் அரசே எதையும் ஏற்றுக்கொள்ளாத சூழலில், என்ன பேசி என்ன பயன் கிடைக்கப் போகிறது? இதற்கு ஒரே ஒரு தீர்வுதான் உண்டு; முதலமைச்சர் விஜய் வீட்டுக்குப் போக வேண்டும், மக்கள் நலன் காக்க அதிமுக பொதுச்செயலாளர் எடப்பாடி பழனிசாமி மீண்டும் தலைமைச் செயலகக் கோட்டைக்குச் செல்ல வேண்டும்.

இதையும் படிங்க: ஜெயிலர் 2-வை டார்கெட் செய்யும் விர்ச்சுவல் வாரியர்ஸ்!! களத்தில் இறங்கிய ரூட் மீடியா.. வருத்தத்தில் அதிமுக மாஜி!

அதேபோல், ஆறுகளில் ரசாயனக் கழிவுகள் கலந்து வெள்ளைத் தீவு போல நச்சு நுரை பொங்கி வழியும் விவகாரத்தில், மக்கள் பயன்படுத்தும் சோப்பு மற்றும் ஷாம்புகளில் இருந்து வெளியேறும் பாஸ்பரஸ் ஆற்றில் கலப்பதால்தான் இந்த நுரை ஏற்படுகிறது என்று அமைச்சர் ராஜீவ் ஒரு வினோதமான விளக்கத்தை அளித்துள்ளார். ஒரு பொறுப்புள்ள துறை அமைச்சர் இத்தகைய ஒரு காரணத்தைக் கூறியிருப்பதை, வருங்காலச் சந்ததியினர் தெரிந்துகொள்ளும் வகையில் வரலாற்றில் பொன் எழுத்துக்களால் பொறித்து வைக்க வேண்டும்" என்று அவர் மிகக் கடுமையாகக் கிண்டலடித்தார்.

இதையும் படிங்க: குற்றங்களை இரும்பு கரம் கொண்டு அடக்குவோம்! உயர்கல்வித்துறை ஊழல் குறித்து அமைச்சர் தகவல்!