அணு ஆயுத ஒப்பந்தத்தில் ஏற்பட்ட முரண்பாடுகளால் அமெரிக்காவும் இஸ்ரேலும் ஈரான் மீது தொடர்ந்து போர் நடத்தி வருகின்றன. இந்தப் போர் இரு வாரங்களை எட்டியுள்ளது. போரின் முதல் நாளிலேயே (பிப்ரவரி 28, 2026) அமெரிக்கா-இஸ்ரேல் கூட்டு வான்வழித் தாக்குதலில் ஈரானின் நீண்டகால உச்ச தலைவர் அயதுல்லா அலி கமேனி கொல்லப்பட்டார். அவருடன் அவரது குடும்ப உறுப்பினர்கள் பலரும் உயிரிழந்தனர்.

இதைத் தொடர்ந்து, அலி கமேனியின் மகன் மொஜ்தபா கமேனி (வயது 56) புதிய உச்ச தலைவராக நியமிக்கப்பட்டார். ஆனால், இதே தாக்குதலில் மொஜ்தபாவும் கடுமையாக காயமடைந்ததாக தகவல்கள் வெளியாகியுள்ளன. 

பிரிட்டிஷ் தப்ளாய்ட் 'தி சன்' நாளிதழ் தனது ஆதாரங்களை மேற்கோள் காட்டி, மொஜ்தபா கமேனி ஒரு காலை இழந்துள்ளதாகவும், வயிறு மற்றும் கல்லீரல் பகுதிகளில் பெரும் சேதம் ஏற்பட்டுள்ளதாகவும், தற்போது கோமா நிலையில் இருப்பதாகவும் பகீர் செய்தி வெளியிட்டுள்ளது.

இதையும் படிங்க: தொடரும் போர் பதற்றம்!! ஈரான் புதிய ஆட்சியர் நிலை என்ன? அந்நாட்டு அதிபர் பரபரப்பு அப்டேட்!

டெஹ்ரானில் உள்ள சினா பல்கலைக்கழக மருத்துவமனையில் மிக கடுமையான பாதுகாப்புடன் அவருக்கு சிகிச்சை அளிக்கப்பட்டு வருவதாகவும், ஈரானின் சுகாதார அமைச்சரும் மூத்த அறுவை சிகிச்சை நிபுணருமான முகமது ரேசா ஜபர்காந்தி இந்த சிகிச்சையை மேற்பார்வையிடுவதாகவும் 'தி சன்' தெரிவித்துள்ளது.

மொஜ்தபா கமேனி பொறுப்பேற்ற பிறகு, அமெரிக்காவுக்கு எதிரான போரில் பின்வாங்க மாட்டோம் என்று அறிக்கை ஒன்றை ஈரான் அரசு தொலைக்காட்சி ஒளிபரப்பியது. ஆனால், அந்த அறிக்கையை அவர் நேரடியாக வாசிக்கவில்லை; செய்தி வாசிப்பாளர் மூலமே வெளியிடப்பட்டது. 

இது உலக நாடுகளிடையே பெரும் சந்தேகத்தை ஏற்படுத்தியுள்ளது. மொஜ்தபா கமேனியின் உடல்நிலை குறித்து உறுதியான தகவல்கள் வெளியாகாத நிலையில், ஈரானில் இணையக் கட்டுப்பாடுகள் மற்றும் கடும் பாதுகாப்பு காரணமாக சரிபார்க்க முடியவில்லை என 'தி சன்' குறிப்பிட்டுள்ளது.

இந்தப் போரில் ஈரான் தீவிரமாக எதிர்த்து வரும் நிலையில், புதிய தலைவரின் உடல்நிலை குறித்த இந்தத் தகவல் உலக அரசியலில் பெரும் அதிர்வலைகளை ஏற்படுத்தியுள்ளது. யார் உண்மையில் ஈரானை வழிநடத்துகிறார்கள் என்பது தொடர்பான கேள்விகள் எழுந்துள்ளன.

இதையும் படிங்க: ஈரான் உள்நாட்டு விவகாரத்தில் தலையிட யாருக்கும் உரிமையில்லை!! இஸ்ரேலுக்கு சீனா கடும் எதிர்ப்பு!