சென்னை: தமிழக சட்டமன்றத் தேர்தல் பிரசாரம் சூடுபிடித்துள்ள நிலையில், லாட்டரி அதிபர் மார்ட்டின் மகனும் லட்சிய ஜனநாயகக் கட்சி (தேஜ) தலைவருமான ஜோஸ் சார்லஸ் மார்ட்டின், தேஜ கூட்டணி வேட்பாளர்களுக்கு ஆதரவாக தமிழகம் முழுவதும் தீவிர பிரசாரத்தில் ஈடுபட்டு வருகிறார்.

இந்நிலையில், தி.மு.க. தலைவர்கள் தேஜ கூட்டணி வெற்றி பெற்றால் தமிழகத்தில் மீண்டும் லாட்டரி விற்பனை தொடங்கிவிடும் என்று பிரசாரக் கூட்டங்களில் குற்றம் சாட்டி வருகின்றனர். இதற்கு ஜோஸ் சார்லஸ் மார்ட்டின் கடும் பதிலடி கொடுத்துள்ளார்.

லால்குடி தொகுதியில் தேஜ கூட்டணி சார்பில் போட்டியிடும் தன் தாய் லீமா ரோஸ் வெற்றி பெற்றால் லாட்டரி விற்பனை தொடங்கிவிடும் என்று துணை முதல்வர் உதயநிதி ஸ்டாலின் பேசியதை சுட்டிக்காட்டிய சார்லஸ் மார்ட்டின், “உதயநிதிக்கு லாட்டரி பற்றிய புரிதலே இல்லை. அரசியலை பொழுதுபோக்காக நினைத்து பேசி வருகிறார்” என்று விமர்சித்தார்.

இதையும் படிங்க: அம்மாடியோவ்! 29 கிலோ தங்கம்! 200 கிலோ வெள்ளி!! ரூ.600 கோடிக்கு சொத்து! மலைக்க வைக்கும் ஜோஸ் சார்லஸ் மார்ட்டின்!

மேலும், “லாட்டரி விற்பனையை எதிர்க்கும் தி.மு.க. அரசு, 2014ஆம் ஆண்டு எங்களிடம் 500 கோடி ரூபாய் நன்கொடை பெற்றது. இதற்கான ஆவணங்கள் எங்களிடம் உள்ளன. அந்த பணத்தை ஏன் பெற்றார்கள்? எதற்கு செலவழித்தார்கள்? முதல்வர் ஸ்டாலினும் உதயநிதியும் பதில் சொல்ல வேண்டும்” என்று கேள்வி எழுப்பினார்.

“கடந்த ஐந்தாண்டு தி.மு.க. ஆட்சியில் மாதம் 3,000 கோடி ரூபாய் வீதம் மொத்தம் 1.50 லட்சம் கோடி ரூபாய் சம்பாதித்துள்ளனர். ஆனால், ஸ்டாலினும் உதயநிதியும் தங்கள் வேட்பு மனுக்களில் ‘சொந்தமாக கார் கூட இல்லை’ என்று குறிப்பிட்டிருப்பது வேடிக்கையாக உள்ளது” என்றும் அவர் கூறினார்.

லாட்டரியை எதிர்க்கும் தி.மு.க. தலைமை, லாட்டரி அதிபரிடம் 500 கோடி ரூபாய் நன்கொடை பெற்றது ஏன் என்ற சார்லஸ் மார்ட்டினின் கேள்வி தற்போது தமிழக அரசியல் களத்தில் பெரும் பேசுபொருளாக மாறியுள்ளது.

தேர்தல் பிரசாரம் உச்சக்கட்டத்தில் உள்ள இந்த நேரத்தில், லாட்டரி விவகாரம் இரு தரப்புக்கும் இடையே புதிய விவாதத்தை தூண்டியுள்ளது. தி.மு.க. தரப்பு இதற்கு பதிலளிக்குமா என்பதை மக்கள் உன்னிப்பாக கவனித்து வருகின்றனர்.

இதையும் படிங்க: நோட்டீஸை காட்டினா கவனிப்பு பலமா இருக்கும்! உதயநிதி ஸ்டாலின் தொகுதியில் திமுக புது டெக்னிக்!!