சட்டமன்ற தேர்தலை முன்னிட்டு தமிழகம் முழுவதும் அரசியல் காய்ச்சல் அதிகரித்து வரும் நிலையில், கமல்ஹாசன் தலைமையிலான மக்கள் நீதி மய்யம் கட்சி தீவிர பிரசாரத்தில் ஈடுபட்டு வருகிறது. தி.மு.க. கூட்டணி வேட்பாளர்களுக்கு ஆதரவாக களமிறங்கியுள்ள அவர், திருப்பூர் மாவட்டம் அவினாசி தொகுதியில் நடைபெற்ற பிரசார கூட்டத்தில் கலந்து கொண்டு உற்சாக உரையாற்றினார்.

அவினாசி புதிய பேருந்து நிலையத்தில் நடைபெற்ற இந்த கூட்டத்தில், தி.மு.க. சார்பில் போட்டியிடும் டாக்டர் கோகி லாமணியை ஆதரித்து பேசிய கமல்ஹாசன், தனது உரையில் திராவிட அரசியல், தமிழர் அடையாளம் மற்றும் மத்திய-மாநில உறவுகள் குறித்து பல கருத்துகளை வெளிப்படுத்தினார். “திராவிடம் நாடு தழுவியது என்பதை தைரியமாக சொல்வேன்” என்று தொடங்கிய அவர், மகளிர் உரிமைத்தொகை குறித்து எழும் கேள்விகளுக்கும் பதிலளித்தார்.

மக்களின் உரிமைகள் மீண்டும் மக்களிடமே திரும்ப வேண்டும் என்பதே தனது அரசியல் நோக்கம் என அவர் வலியுறுத்தினார். மேலும், வட இந்திய அரசியல் அழுத்தங்கள் குறித்து விமர்சனம் செய்த அவர், “நம்மை தொடர்ந்து பாதித்த சக்திகள் இல்லாமல் இருந்திருந்தால் இன்னும் முன்னேறியிருப்போம்” என்று குறிப்பிட்டார். அதே நேரத்தில், தமிழ் இனத்தின் முன்னேற்றத்திற்கு தடையாக இருப்பவர்களை எதிர்க்க வேண்டியது அவசியம் என்றும் கூறினார்.

இதையும் படிங்க: விருப்ப மனுவுக்கு கட்டின காசை கட்சி வளர்சிக்கு வச்சிக்குங்க!! ரூ.12.50 லட்சத்தை வழங்கிய மநீம நிர்வாகிகள்!

“வந்தவர்களை வாழ வைப்போம், ஆனால் ஆதிக்கம் செலுத்த நினைத்தால் எதிர்த்து நிற்போம்” என்ற அவர், இந்த தேர்தலில் மக்கள் விழிப்புடன் இருக்க வேண்டியது முக்கியம் என வலியுறுத்தினார். தி.மு.க. கூட்டணியின் சின்னமான உதயசூரியனுக்கு வாக்களிக்குமாறு நேரடியாக கேட்டுக்கொண்டார். கடந்த தேர்தல் அனுபவங்களை நினைவுகூர்ந்த அவர், “மக்கள் என்னை ஏமாற்றவில்லை, சதி தான் ஏமாற்றியது” என்று கூறியதும் கூட்டத்தில் இருந்தவர்களின் கவனத்தை ஈர்த்தது.

இந்த பிரசாரம், அவினாசி தொகுதியில் தேர்தல் சூழலை மேலும் சூடுபிடிக்கச் செய்துள்ளது. முக்கிய அரசியல் தலைவர்களின் நேரடி பிரசாரம் வாக்காளர்களின் மனநிலையை மாற்றும் வாய்ப்பு இருப்பதால், கட்சிகள் கடைசி கட்டத்தில் தீவிர முயற்சிகளை மேற்கொண்டு வருகின்றன.

இதையும் படிங்க: தொகுதியும் கிடைக்கல! கொடுத்த தொகையும் கிடைக்கல!! விரக்தியில் புலம்பும் கமல் கட்சி நிர்வாகிகள்!