சட்டசபை தேர்தலில் காரைக்குடி தொகுதியில் காங்கிரஸ் வேட்பாளர் மாங்குடி சந்தித்த தோல்வி குறித்து கட்சிக்குள் புதிய சர்ச்சை உருவாகியுள்ளது. இந்த தோல்விக்கான காரணங்கள் குறித்து ஆய்வு செய்து வரும் உண்மை கண்டறியும் குழுவிடம், முன்னாள் மத்திய அமைச்சர் ப.சிதம்பரம் மற்றும் அவரது மகன் கார்த்தி சிதம்பரம் ஆகியோரின் செயல்பாடுகளே முக்கிய காரணம் என சில மாவட்ட நிர்வாகிகள் புகார் தெரிவித்துள்ளதாக தகவல்கள் வெளியாகியுள்ளன.

சிவகங்கை மாவட்ட காங்கிரஸ் வட்டாரங்களில் பேசப்படும் தகவல்களின்படி, தேர்தலுக்கு முன்பாக தி.மு.க. கூட்டணியில் காங்கிரஸ் தொடர வேண்டும் என்ற நிலைப்பாட்டில் சிதம்பரம் முக்கிய பங்கு வகித்ததாக கூறப்படுகிறது. ஆனால் இந்த முடிவை அடிமட்ட தொண்டர்களில் ஒரு பகுதியினர் விரும்பவில்லை என்றும் தெரிவிக்கப்படுகிறது.

காரைக்குடி தொகுதியில் தேர்தல் பிரசாரத்திற்காக சிதம்பரம் நேரடியாக களமிறங்கி பல பகுதிகளில் மக்களை சந்தித்து ஆதரவு திரட்டியதாக கூறப்படுகிறது. இருப்பினும், எதிர்பார்த்த அளவுக்கு கட்சி வாக்குகள் காங்கிரஸ் வேட்பாளருக்கு செல்லவில்லை என்ற கருத்து சில நிர்வாகிகளிடையே நிலவுகிறது.

இதையும் படிங்க: பெண் எம்.எல்.ஏ-வுக்கு முன்னுரிமை! சோனியா காந்தி கறார்! சட்டசபை காங்., தலைவராகிறார் தாரகை கத்பட்?

மேலும், கார்த்தி சிதம்பரம் தேர்தல் பிரசாரத்தின் போது மாவட்ட நிர்வாகிகளுடன் நடந்துகொண்ட விதம் அதிருப்தியை ஏற்படுத்தியதாகவும், அதன் காரணமாக சிலர் தேர்தல் பணிகளில் முழுமையாக ஈடுபடவில்லை என்றும் புகார்களில் கூறப்பட்டுள்ளதாக தகவல் வெளியாகியுள்ளது.

சில சமூகங்களை பாதிக்கும் வகையில் கருத்துகள் வெளியிடப்பட்டதாகவும், அதனால் குறிப்பிட்ட வாக்காளர் பிரிவுகளில் எதிர்மறை தாக்கம் ஏற்பட்டதாகவும் கட்சி வட்டாரங்களில் குற்றச்சாட்டுகள் முன்வைக்கப்படுகின்றன. அதேபோல், சிவகங்கை தொகுதியில் நீண்டகாலமாக ஒரே குடும்பத்தினருக்கு முக்கியத்துவம் வழங்கப்படுவதால், புதிய தலைமுறையினருக்கு வாய்ப்பு கிடைக்கவில்லை என்ற அதிருப்தியும் கட்சிக்குள் இருப்பதாக கூறப்படுகிறது.

இதற்கிடையில், காரைக்குடியில் தமிழக வெற்றிக் கழக வேட்பாளராக போட்டியிட்டு வெற்றி பெற்ற அமைச்சர் பிரபுவின் குடும்பத்துக்கும் காங்கிரஸ் அரசியல் பின்னணி இருப்பதாக சிலர் சுட்டிக்காட்டுகின்றனர். இதுவும் வாக்கு மாற்றத்திற்கு ஒரு காரணமாக இருந்திருக்கலாம் என்ற கருத்துகளும் முன்வைக்கப்படுகின்றன.

எனினும், இந்த குற்றச்சாட்டுகள் குறித்து சிதம்பரம் அல்லது கார்த்தி சிதம்பரம் தரப்பில் எந்த அதிகாரப்பூர்வ பதிலும் வெளியாகவில்லை. உண்மை கண்டறியும் குழுவின் இறுதி அறிக்கை வெளியான பிறகே தோல்விக்கான உண்மையான காரணங்கள் தெளிவாகும் என காங்கிரஸ் வட்டாரங்கள் தெரிவிக்கின்றன.

இதையும் படிங்க: வகுப்பறைக்குள் ரீல்ஸ் கலாச்சாரம்... தவெகவுக்கு மாணிக்கம் தாகூர் கட் அண்ட் கறார் அட்வைஸ்...!