கரூர் வேலுசாமிபுரத்தில் கடந்த ஆண்டு நடைபெற்ற தமிழக வெற்றிக் கழக பிரசாரக் கூட்டத்தில் ஏற்பட்ட கூட்ட நெரிசலில் 41 பேர் உயிரிழந்த சம்பவம் நடைபெற்று ஓராண்டு நிறைவடைந்துள்ளது. இதையொட்டி, உயிரிழந்தவர்களின் குடும்பத்தினர் மற்றும் தமிழக வெற்றிக் கழக நிர்வாகிகள் சார்பில் கரூரில் முதலாம் ஆண்டு நினைவு அஞ்சலி செலுத்தப்பட்டது.

கரூர் பழைய பேருந்து நிலையம் ரவுண்டானா அருகே நடைபெற்ற அஞ்சலி நிகழ்ச்சியில், உயிரிழந்த 41 பேரின் புகைப்படங்கள் வைக்கப்பட்டு, அவர்களின் நினைவாக மெழுகுவர்த்திகள் ஏற்றப்பட்டன. குடும்பத்தினர் மற்றும் கட்சி நிர்வாகிகள் மெழுகுவர்த்தி ஏந்தியும், புகைப்படங்களுக்கு மலர் தூவியும் அஞ்சலி செலுத்தினர்.

கடந்த 2025-ம் ஆண்டு செப்டம்பர் 27-ம் தேதி வேலுசாமிபுரத்தில் நடைபெற்ற பொதுக்கூட்டத்தில் ஏற்பட்ட கூட்ட நெரிசலில் பெண்கள், குழந்தைகள் உள்ளிட்ட 41 பேர் உயிரிழந்தனர். நூற்றுக்கும் மேற்பட்டோர் காயமடைந்தனர். இந்த சம்பவம் தமிழகம் மட்டுமின்றி நாடு முழுவதும் பெரும் அதிர்வை ஏற்படுத்தியது.

இதையும் படிங்க: கரூர் துயரம் ஆறாத வடு!! 41 உயிர்களை நினைவுகூர்ந்து கனிமொழி எம்.பி உருக்கமான பதிவு!

இந்த சம்பவம் தொடர்பாக பல்வேறு கட்ட விசாரணைகள் நடைபெற்ற நிலையில், உச்சநீதிமன்ற உத்தரவின்படி தற்போது சிபிஐ விசாரணை நடைபெற்று வருகிறது. உயிரிழந்தவர்களின் குடும்பத்தினர், காயமடைந்தவர்கள், சம்பவத்தை நேரில் பார்த்தவர்கள், ஆம்புலன்ஸ் ஓட்டுநர்கள், மருத்துவர்கள், காவல்துறையினர் உள்ளிட்ட பல்வேறு தரப்பினரிடம் விசாரணை நடத்தப்பட்டுள்ளதாக தகவல்கள் வெளியாகியுள்ளன.

இந்த வழக்கில் தவெக நிர்வாகிகள் உள்ளிட்ட பலரிடமும் சிபிஐ விசாரணை நடத்தியுள்ளது. விசாரணை தொடர்பான இறுதி நடவடிக்கைகள் இன்னும் தொடர்கின்றன.

இதனிடையே, உயிரிழந்தவர்களின் குடும்பத்தினருக்கு பல்வேறு தரப்பில் நிவாரண உதவிகள் வழங்கப்பட்டுள்ளன. கடந்த ஜூலை மாதம் கரூர் சென்ற முதல்வர் விஜய், உயிரிழந்தவர்களின் குடும்பங்களைச் சேர்ந்தவர்களுக்கு அரசு பணி நியமன ஆணைகளை வழங்கியதுடன், 41 பேரின் நினைவாக நினைவுச்சின்னம் அமைக்கப்படும் என்றும் தெரிவித்திருந்தார்.

ஓராண்டு கடந்த நிலையிலும் உறவுகளை இழந்த குடும்பங்களின் துயரம் தொடரும் நிலையில், நடைபெற்ற நினைவு அஞ்சலி நிகழ்வில் பலரும் உணர்ச்சிவசப்பட்டு கண்ணீர் மல்க அஞ்சலி செலுத்தினர். இதற்கிடையே, உயிரிழந்தவர்களின் நினைவாக அமைக்கப்பட உள்ள நினைவுச்சின்னத்திற்கான இடம் தொடர்பான பணிகளும் நடைபெற்று வருவதாக தெரிவிக்கப்பட்டுள்ளது.

இதையும் படிங்க: ஆறாத ரணம்! தீராத வலி! செப்டம்பர் 27-ஐ மறக்க முடியுமா? 41 உயிர்களை பறித்த கரூர் துயரம்! முதல்வர் விஜய் அஞ்சலி!