கரூர் கூட்ட நெரிசல் துயரச் சம்பவத்தில் தி.மு.க. முன்னாள் அமைச்சர் செந்தில் பாலாஜியிடம் சி.பி.ஐ. அதிகாரிகள் 6 மணி நேரம் தீவிர விசாரணை நடத்தியுள்ளனர். கடந்த 2025 செப்டம்பர் 27-ஆம் தேதி தமிழக வெற்றிக் கழகத் தலைவர் விஜய் பங்கேற்ற கூட்டத்தில் நெரிசலில் சிக்கி 41 பேர் உயிரிழந்தனர். இச்சம்பவம் தொடர்பாக உச்ச நீதிமன்ற உத்தரவின்பேரில் சி.பி.ஐ. விசாரணை மேற்கொண்டு வருகிறது.

விஜய் தரப்பில் செந்தில் பாலாஜி மீது கடும் குற்றச்சாட்டுகள் எழுப்பப்பட்டன. கூட்டத்திற்கு இடம் ஒதுக்குவது முதல் ஏற்பாடுகள் வரை அவரது தலையீடு இருந்ததாகவும், சதி நடந்ததாகவும் கூறப்பட்டது. இதையடுத்து சி.பி.ஐ. செந்தில் பாலாஜிக்கு சம்மன் அனுப்பியது. டெல்லி சி.பி.ஐ. அலுவலகத்தில் ஆஜரான அவரிடம் ஆறு மணி நேரத்திற்கு மேல் விசாரணை நடத்தப்பட்டது.

விசாரணையில் மிக முக்கிய கேள்வியாக, "விஜய் பங்கேற்ற கூட்டத்தை சீர்குலைக்க ஆயுதங்களுடன் ஆட்களை அனுப்பினீர்களா?" என்று அதிகாரிகள் கேட்டதாக தகவல்கள் தெரிவிக்கின்றன. இதைக் கேட்டதும் பதறிய செந்தில் பாலாஜி, "இது விஜய் தரப்பினர் சுமத்திய அபாண்டமான குற்றச்சாட்டு.

இதையும் படிங்க: எலெக்‌ஷன் வேலை எக்கச்சக்கமா இருக்கே!! சம்மன் அனுப்பிய சிபிஐ! விலக்கு கேட்கும் விஜய்!

த.வெ.க.வினர் என் மீது சுமத்தும் குற்றச்சாட்டுகளில் துளி அளவும் உண்மை இல்லை. கரூர் மாவட்டத்தைச் சேர்ந்தவன் என்பதாலும், முன்னாள் அமைச்சர் மற்றும் தற்போதைய கரூர் தொகுதி எம்எல்ஏ என்பதாலும் என் கடமையை மட்டுமே செய்தேன்" என்று வாக்குமூலம் அளித்தார்.

சி.பி.ஐ. அதிகாரிகள் தேவைப்பட்டால் மீண்டும் விசாரணைக்கு அழைப்போம் என்று தெரிவித்துள்ளனர். விஜய்யிடம் ஜனவரி 12, 19 மற்றும் மார்ச் 15 ஆகிய தேதிகளில் டெல்லியில் மூன்று கட்ட விசாரணை நடத்தப்பட்டது. இந்நிலையில் செந்தில் பாலாஜியின் விசாரணை அரசியல் களத்தில் பெரும் பரபரப்பை ஏற்படுத்தியுள்ளது. தேர்தல் நெருங்கும் சூழலில் இச்சம்பவம் தி.மு.க. மற்றும் த.வெ.க. இடையேயான மோதலை மேலும் தீவிரப்படுத்தியுள்ளது. சி.பி.ஐ. விசாரணை முடிவுகள் எப்படி இருக்கும் என்பதை தமிழக அரசியல் உன்னிப்பாக கவனித்து வருகிறது.

இதையும் படிங்க: அமித்ஷா கொடுத்த அசைன்மெண்ட்! பியூஸ்கோயல் தமிழகம் வருகை! அதிமுக - பாஜக தொகுதிப் பங்கீடுகள் இறுதி?!