2019ம் ஆண்டு ஆகஸ்ட் 5ம் தேதி அன்று, இந்திய அரசு ஜம்மு காஷ்மீருக்கு சிறப்பு அந்தஸ்து வழங்கிய அரசியலமைப்பின் 370வது பிரிவை ரத்து செய்தது. இந்த முடிவு, ஜம்மு காஷ்மீரை இந்தியாவின் ஒருங்கிணைந்த பகுதியாக்கியதுடன், 35ஏ பிரிவையும் நீக்கியது. இதன்மூலம், மாநிலத்திற்கு வழங்கப்பட்டிருந்த சுயாட்சி உரிமைகள், நில உரிமை மற்றும் சட்டமன்ற சிறப்பு அதிகாரங்கள் ரத்து செய்யப்பட்டன. ஜம்மு காஷ்மீர் மற்றும் லடாக் ஆகியவை இரண்டு யூனியன் பிரதேசங்களாக பிரிக்கப்பட்டன. இந்த நடவடிக்கை பல்வேறு எதிர்ப்புகளையும் ஆதரவுகளையும் பெற்றது.

சிறப்பு அந்தஸ்து ரத்து செய்யப்பட்டதை 2023 டிசம்பரில் உறுதி செய்த உச்சநீதிமன்றம், ஜம்மு - காஷ்மீருக்கு முடிந்தவரை விரைவில் மாநில அந்தஸ்து வழங்கும்படி வலியுறுத்தியது. இதைத் தொடர்ந்து, 2024ல் ஜம்மு - காஷ்மீரில் சட்டசபை தேர்தல் நடந்தது. இதில், முன்னாள் முதலமைச்சர் பரூக் அப்துல்லாவின் தேசிய மாநாட்டு கட்சி அபார வெற்றி பெற்றது. அவரது மகன் ஒமர் அப்துல்லா, முதலமைச்சர் பதவியேற்றார். அவரும், ஜம்மு - காஷ்மீருக்கு மாநில அந்தஸ்து வழங்கும்படி மத்திய அரசை வலியுறுத்தி வருகிறார்.

இதையும் படிங்க: 5வது நாளாக தூய்மை பணியாளர்கள் போராட்டம்... குவிந்து கிடக்கும் குப்பைகளால் மக்கள் அவதி!

அரசு இதனைப் பயங்கரவாதத்தைக் கட்டுப்படுத்தவும், பொருளாதார வளர்ச்சியை ஊக்குவிக்கவும் எடுக்கப்பட்ட நடவடிக்கையாகக் கூறுகிறது. ஆனால், முன்னாள் முதல்வர்கள் மெகபூபா முஃப்தி, உமர் அப்துல்லா, மற்றும் தேசிய மாநாட்டுக் கட்சியினர் இம்முடிவை "கறுப்பு நாள்" என விமர்சித்து, பாதுகாப்பு மற்றும் மக்கள் உரிமைகளில் முன்னேற்றம் இல்லை எனக் குற்றம்சாட்டுகின்றனர். மக்களின் விருப்பத்திற்கு மாறாக இந்த முடிவு எடுக்கப்பட்டதாகவும், மாநில அந்தஸ்து மீட்கப்பட வேண்டும் எனவும் அவர்கள் வலியுறுத்துகின்றனர்.

ரத்து செய்யப்பட்ட பின், காஷ்மீரில் ஊரடங்கு, தொலைத்தொடர்பு கட்டுப்பாடுகள் உள்ளிட்ட கடுமையான நடவடிக்கைகள் அமல்படுத்தப்பட்டன. 18 மாதங்களுக்குப் பின் 2021 பிப்ரவரியில் 4G சேவைகள் மீண்டும் தொடங்கின. இந்த முடிவு சர்வதேச அளவில் விவாதத்தை ஏற்படுத்தியது, குறிப்பாக பாகிஸ்தான் இதை எதிர்த்து ஐ.நா.வில் குரல் எழுப்பியது.

இந்நிலையில் ஜம்மு காஷ்மீர் மாநிலத்திற்கு சிறப்பு அந்தஸ்து வழங்கிய 370வது பிரிவு ரத்து செய்யப்பட்டு 6 ஆண்டுகள் நிறைவையொட்டி அசம்பாவிதங்கள் ஏதும் ஏற்படாமல் இருக்க முன்னெச்சரிக்கை நடவடிக்கையாக காஷ்மீர் முழுவதும் பாதுகாப்பு அதிகரிக்கப்பட்டுள்ளது.
மேலும் இதன் தாக்கம் குறித்து பல்வேறு கருத்துகள் நிலவுகின்றன. 

பாதுகாப்பு நிலைமை மேம்பட்டதாக அரசு கூறினாலும், லடாக்கில் சிறப்பு அந்தஸ்து கோரிக்கை எழுந்துள்ளது. இந்த முடிவு காஷ்மீர் மக்களின் அரசியல், சமூக, பொருளாதார வாழ்க்கையில் ஆழமான தாக்கத்தை ஏற்படுத்தியுள்ளது, இன்னும் முழுமையான மாநில அந்தஸ்து மீட்டெடுக்கப்படவில்லை.

இதையும் படிங்க: #BREAKING மீண்டும் அதிர்ச்சியில் ராமதாஸ்... பதறியடித்துக்கொண்டு போலீசிடம் ஓடிய உதவியாளர்... பிண்ணணியில் அன்புமணி ஆதரவாளரா?