தமிழ்நாடு அரசின் மூத்த அமைச்சர்களான நீர்வளத்துறை அமைச்சர் துரைமுருகன் மற்றும் வேளாண்மை மற்றும் விவசாயிகள் நலத்துறை அமைச்சர் எம்.ஆர்.கே. பன்னீர்செல்வம் ஆகியோரும் அவர்களது குடும்ப உறுப்பினர்களும் சம்பந்தப்பட்ட சொத்துக்குவிப்பு வழக்குகளின் விசாரணைக்கு சென்னை உயர்நீதிமன்றம் மேலும் ஆறு மாத கால அவகாசம் வழங்கியுள்ளது. இந்த உத்தரவு நீதியரசர் ஏ.டி. ஜெகதீஷ் சந்திரா தலைமையிலான அமர்வால் பிறப்பிக்கப்பட்டது.

இந்த வழக்குகள் கடந்த 20 ஆண்டுகளுக்கும் மேலாக நிலுவையில் உள்ளன. 1996 முதல் 2001 வரை திமுக ஆட்சியில் பொதுப்பணித்துறை அமைச்சராக பதவி வகித்த துரைமுருகன் மீதும், 1996-2001 மற்றும் 2006-2011 காலகட்டங்களில் அமைச்சராக இருந்த எம்.ஆர்.கே. பன்னீர்செல்வம் மீதும் அவர்களது குடும்பத்தினர் மீதும் வருமானத்துக்கு மீறிய சொத்து சேர்த்ததாக லஞ்ச ஒழிப்பு மற்றும் ஊழல் தடுப்பு இயக்குநரகம் (DVAC) வழக்கு பதிவு செய்தது.

துரைமுருகன் வழக்கில், 2002-இல் DVAC அவரது மனைவி டி. சாந்தகுமாரி, சகோதரர் துரை சிங்காரம், மகன் டி.எம். குமார் உள்ளிட்டோர் மீது வழக்கு தொடர்ந்தது. சிலர் கைதும் செய்யப்பட்டனர். 2007-இல் திமுக ஆட்சியில் விடுவிக்கப்பட்டனர். 2013-இல் DVAC உயர்நீதிமன்றத்தில் மறுஆய்வு மனு தாக்கல் செய்தது. 2025 ஏப்ரல் 23-இல் நீதிபதி வேல்முருகன் விடுவிப்பை ரத்து செய்து, ஆறு மாதங்களுக்குள் தினசரி விசாரணை நடத்தி முடிக்க உத்தரவிட்டார்.

இதையும் படிங்க: உதயநிதி ப்ரண்டுனா இப்பிடியா? துரைமுருகன் நாற்காலியில் மகேஷ்! திமுக-வில் மூத்த அமைச்சர்கள் அதிர்ச்சி!

அதேபோல், எம்.ஆர்.கே. பன்னீர்செல்வம் மீதும் அவரது மனைவி பி. செந்தமிழ்செல்வி, மகன் பி. கதிரவன் மீதும் இரு தனி வழக்குகள் பதிவாகின. கடலூர் சிறப்பு நீதிமன்றம் 2007 மற்றும் 2016-இல் விடுவித்தது. DVAC 2013 மற்றும் 2016-இல் உயர்நீதிமன்றத்தில் மேல்முறையீடு செய்தது. 2025 ஏப்ரல் 25-இல் நீதிபதி வேல்முருகன் விடுவிப்பை ரத்து செய்து, ஆறு மாதங்களுக்குள் விசாரணை முடிக்க உத்தரவிட்டார்.

ஆனால், விசாரணை காலதாமதமானதால், கூடுதல் அரசு வழக்கறிஞர் கே.எம்.டி. முகிலன் உயர்நீதிமன்றத்தில் தெரிவித்தார். சம்பந்தப்பட்ட சிறப்பு நீதிமன்றங்கள் கோரியதன் அடிப்படையில், நீதியரசர் ஜெகதீஷ் சந்திரா ஆறு மாத கால நீட்டிப்பை அனுமதித்துள்ளார். இதன்மூலம் வழக்குகளின் விசாரணை தொடரும்.

இந்த வழக்குகள் தமிழ்நாட்டின் அரசியல் வட்டாரத்தில் கவனத்தை ஈர்த்துள்ளன. DVAC-யின் குற்றச்சாட்டுகளின்படி, குறிப்பிட்ட காலங்களில் அமைச்சர்களின் அறியப்பட்ட வருமான ஆதாரங்களுக்கு அப்பால் கணிசமான சொத்துக்கள் சேர்க்கப்பட்டதாக கூறப்படுகிறது. விசாரணை முடிவடையும் வரை இந்த விவகாரம் தொடர்ந்து பரபரப்பை ஏற்படுத்தும் என எதிர்பார்க்கப்படுகிறது.

இதையும் படிங்க: அதிகாலையிலேயே பதற்றம்... அப்பல்லோ மருத்துவமனை விரைந்த முதல்வர் மு.க.ஸ்டாலின்....!