திருநெல்வேலியில் கடந்த ஆண்டு பாரதிய ஜனதா கட்சியில் இருந்து விலகி திமுகவில் இணைந்திருந்த முன்னாள் மாவட்டத் தலைவர் தயா சங்கர் மற்றும் மாவட்டப் பொதுச்செயலாளர் வேல் ஆறுமுகம் ஆகியோர் தற்பொழுது திமுகவில் இருந்து விலகி, தமிழக பாஜக மாநிலத் தலைவர் திரு. நயினார் நாகேந்திரன் முன்னிலையில் மீண்டும் தங்களை பாஜகவில் இணைத்துக் கொண்டனர். நெல்லையிலுள்ள நயினார் நாகேந்திரனின் இல்லத்தில் வைத்து இந்த இணைப்பு நிகழ்வு நடைபெற்றது. இதனைத் தொடர்ந்து செய்தியாளர்களைச் சந்தித்த நயினார் நாகேந்திரன், தமிழகத்தில் சட்டம்-ஒழுங்கு அடியோடு சீர்குலைந்துள்ளதாகத் தவெக அரசை மிகக் காரசாரமாகச் சாடினார்.

செய்தியாளர்களிடம் தவெக-வின் ஒரு மாத கால ஆட்சியை விமர்சித்துப் பேசிய நயினார் நாகேந்திரன், "தவெக அரசு பொறுப்பேற்று 35 நாட்கள் ஆகிறது. இந்த 35 நாட்களில் மட்டும் தமிழகத்தில் 207 கொடூரக் குற்றங்கள் நடந்துள்ளன. கடந்த இரண்டு நாட்களில் மட்டும் 17 பாலியல் வன்கொடுமைச் சம்பவங்கள் நிகழ்ந்துள்ளன. சூலூரில் 10 வயதுச் சிறுமி பாலியல் வன்கொடுமை செய்யப்பட்டு கொல்லப்பட்ட சம்பவம், நேற்று முன்தினம் 3 வயதுப் பெண் குழந்தை பாலியல் வன்கொடுமை செய்யப்பட்டு முள்வேலியில் வீசப்பட்ட சம்பவம் என அடுக்கடுக்கான குற்றங்கள் நடந்து வருகின்றன. கடந்த ஒரு வாரத்தில் மட்டும் தமிழகம் முழுவதும் 40 பாலியல் வன்கொடுமைகள் அரங்கேறியுள்ளன. முதலமைச்சர் காலை 10 மணிக்கு அலுவலகம் வருகிறார், மாலை 5 மணிக்குச் செல்கிறார். ஆனால், மக்களைச் சந்தித்துப் பேசுவதில்லை. அவர் சினிமா பிரபலங்களைச் சந்திப்பதிலும், அவர்களுடன் புகைப்படம் எடுப்பதிலுமே ஆர்வமாக இருக்கிறார். தேர்தலுக்கு முன் மக்களிடம் 'ப்ரோ', 'அங்கிள்' எனப் பாசமாகப் பேசியவர், இப்போது இத்தனை குற்றங்கள் நடக்கும்போது மௌனம் காப்பது ஏன்?" என்று கேள்வி எழுப்பினார்.

அடுத்த 6 மாதங்களில் அம்பாசமுத்திரம், விராலிமலை, மதுராந்தகம், ஈரோடு, பெருந்துறை, தாராபுரம் போன்ற இடங்களில் இடைத்தேர்தல் வரவுள்ளதைச் சுட்டிக்காட்டிய அவர், "ஆட்சிக்கு வந்த உடனே குதிரை பேரம் நடத்தி மாற்றுக்கட்சி சட்டமன்ற உறுப்பினர்களைத் தவெக அரசு இழுத்து வருகிறது. இது தொடர்பாக உடனடியாகச் சிபிஐ (CBI) விசாரணை நடத்தப்பட வேண்டும். இந்த அரசை ஆட்சியில் இருந்து அகற்ற வேண்டும். தேர்தலுக்கு முன் கொடுத்த வாக்குறுதிகளை நிறைவேற்றாமல், அரசுக்கு 10 லட்சம் கோடி கடன் இருப்பதாகக் கூறி வெள்ளை அறிக்கை விடுவது மக்களை ஏமாற்றும் வெற்றுச் செயலாகும். தமிழகத்தில் போதைப்பொருள் கலாச்சாரம் அசுர வேகத்தில் அதிகரித்துள்ளதே இத்தகைய பாலியல் குற்றங்களுக்குக் காரணம். சென்னை விமான நிலையத்தில் 5 கோடி மதிப்பிலான போதைப்பொருள் பிடிபட்டதே இதற்குச் சான்று. முதலமைச்சர் காவல்துறையைச் சரியாகச் செயல்படுத்தவில்லை; இங்குப் போலீசாருக்குச் சுதந்திரம் இல்லை" என்று குற்றம் சாட்டினார்.

இதையும் படிங்க: இன்றுடன் கெடு நிறைவு... பதவி விலகிய எம்எல்ஏக்கள் சபாநாயகருடன் சந்திப்பு..!

பெண்களுக்குப் பாதுகாப்பு அளிக்கத் தவெக அரசால் உருவாக்கப்பட்ட "சிங்கப் பெண்" காவலர் படை பெயரளவில் மட்டுமே இருக்கிறது என்று சாடிய நயினார் நாகேந்திரன், சிவகங்கையில் பெண் காவலர்களே (சிங்கப் பெண் படையினர்) பாலியல் ரீதியாகப் பாதிக்கப்பட்டதாக வரும் செய்திகள் அதிர்ச்சியளிப்பதாகவும், காவல்துறையினருக்கே பாதுகாப்பு இல்லாத சூழல் நிலவுவதாகவும் குறிப்பிட்டார். போதைப்பொருளைக் கட்டுப்படுத்தத் தவறிய தவெக அரசைக் கண்டித்துப் பாஜக சார்பில் சென்னையில் மாபெரும் ஆர்ப்பாட்டம் நடத்தப்படும் என்றும் அவர் அறிவித்தார். மேலும், டெல்லியில் அமித் ஷா, ஜே.பி. நட்டா உள்ளிட்ட தலைவர்களைச் சந்தித்தது கட்சியின் எதிர்கால வளர்ச்சி குறித்ததுதான் என்றும், அதிமுகவுடனான கூட்டணி குறித்துத் தேர்தல் நேரத்தில் முடிவு செய்யப்படும் என்றும் கூறிய அவர், ரஜினிகாந்தைச் சந்தித்தது மரியாதை நிமித்தமானது என்றும், உதயநிதி ஸ்டாலினின் செயல்பாடுகள் தற்பொழுதும் திருப்திகரமாக இல்லை என்றும் தனது பேட்டியில் சுறுசுறுப்பாகக் குறிப்பிட்டு முடித்தார்.

இதையும் படிங்க: நான் அதிமுகவிலேயே தான் இருக்கிறேன்.. முன்னாள் அமைச்சர் செல்லூர் ராஜூ விளக்கம்!