மதுரையில் இந்து முன்னணி சார்பாக முருகன் மாநாடு நடத்தப்பட உள்ளது. இன்னும் 2 நாட்களில் மாநாடு நடக்கவுள்ள நிலையில், அனைத்து பணிகளையும் முடித்து பக்தர்களின் வருகைக்காக திடல் திறந்து வைக்கப்பட்டுள்ளது. இந்த மாநாட்டு திடலில் அறுபடை முருகன் கோயில்களின் மாதிரி அமைக்கப்பட்டு, அந்தந்த கோயில்களில் பூஜை செய்யப்பட்ட வேல் வழிபாட்டிற்கு வைக்கப்பட்டுள்ளது.

இந்த நிலையில் மாநாட்டு திடலுக்கு வந்த பாஜக மாநிலத் தலைவர் நயினார் நாகேந்திரன் அங்குள்ள கோயில்களில் வழிபட்டார். பின்னர் செய்தியாளர்களை சந்தித்த அவர், பழனியில் தமிழக அரசு சார்பாக முருக பக்தர்கள் மாநாடு நடத்தப்பட்டது. அரசியல்வாதிகளுக்கு பக்தி இருக்கும். நான் சாமி கும்பிடக் கூடாது என்று யாராவது சொல்ல முடியுமா? மாநாட்டு திடலில் அரசியல் அதிகம் பேசக் கூடாது என்று நினைக்கிறோம். அதனால் பக்தி மற்றும் ஆன்மிகம் மட்டுமே பேசுவோம்.

இதையும் படிங்க: இப்போ முருகரை எடுப்போம்; அப்புறம் தமிழ்நாட்டையே எடுப்போம்... அடித்து சொன்ன நயினார் நாகேந்திரன்!!

உத்தரப் பிரதேச முதல்வர் யோகி ஆதித்யநாத் மற்றும் ஆந்திரா துணை முதல்வர் பவன் கல்யாண் ஆகியோருக்கும் தமிழ்நாட்டிற்கும் என்ன சம்பந்தம் என்று கேட்கிறார்கள். அவர்களும் இந்தியாவில் உள்ளவர்கள் தான். ஆந்திராவில் இருப்பவர் இங்கு வந்து சாமி தரிசனம் செய்யக் கூடாதா? அதேபோல் இப்போது ஒன்றும் தேர்தல் நடக்கவில்லை. நாங்கள் யாரும் முருக பக்தர்கள் மாநாட்டில் வாக்குகள் கேட்கவில்லை. திமுக ஆட்சியில் ஆன்மீகத்தை காப்பாற்ற வேண்டிய தேவை உள்ளது.

முதல்வர் ஸ்டாலினுக்கு பக்தி இல்லை. அதனால் முருகன் மாநாடு நடக்கிறது. தமிழக அரசு சார்பாக நடத்தப்பட்ட மாநாடு, அரசியலுக்காக நடந்த மாநாடு. தமிழ்நாட்டில் உள்ள கோயில்களில் குடமுழுக்கு நடத்துவது அரசின் கடமையாகும். அதற்காக தான் அறநிலையத்துறை தொடங்கப்பட்டது. அனைத்து கோயில்களிலும் தமிழில் அர்ச்சனை செய்யப்பட வேண்டும் என்று தீர்மானம் நிறைவேற்றி கோரிக்கை வைப்போம். மத்திய உள்துறை அமைச்சர் அமித்ஷா இனி அடிக்கடி தமிழ்நாடு வருவார் என்று தெரிவித்துள்ளார்.  

இதையும் படிங்க: மா விவசாயிகளோட வயித்துல அடிக்காதீங்க முதல்வரே.. ஆளும் அரசை தோலுரித்த நயினார் நாகேந்திரன்..!