தமிழ்நாடு சட்டமன்றத் தேர்தல் 2026-க்கு இன்னும் சில மாதங்களே உள்ள நிலையில், கூட்டணி பேச்சுவார்த்தைகள் இறுதிக்கட்டத்தை எட்டியுள்ளன. திமுக கூட்டணி, அதிமுக-பாஜக தலைமையிலான தேசிய ஜனநாயக கூட்டணி (என்டிஏ), தமிழக வெற்றிக் கழகம் (தவெக), நாம் தமிழர் கட்சி (நாதக்) ஆகியவை 4 முனை போட்டியாக தமிழக அரசியல் களம் உருவெடுத்து வருகிறது.
இந்நிலையில், முன்னாள் முதலமைச்சரும் அ.தி.மு.க. மூத்த தலைவருமான ஓ. பன்னீர்செல்வம் (ஓபிஎஸ்) கூட்டணி குறித்து முக்கிய அறிவிப்பை வெளியிட்டுள்ளார்.
செய்தியாளர்களிடம் பேசிய ஓ.பன்னீர்செல்வம், "தை மாதம் முடிவதற்குள் கூட்டணி குறித்த முடிவு அறிவிக்கப்படும்" என்று தெளிவாகத் தெரிவித்தார். தற்போது அ.தி.மு.க.வில் இருந்து பிரிந்து தனி அணியாக செயல்பட்டு வரும் ஓபிஎஸ், என்டிஏ கூட்டணியில் இணைவாரா அல்லது தனித்து போட்டியிடுவாரா என்பது தமிழக அரசியலில் பெரும் எதிர்பார்ப்பை ஏற்படுத்தியுள்ளது.
இதையும் படிங்க: 16 வயசுக்கு கம்மியா? சோஷியல் மீடியா யூஸ் பண்ண தடை!! ஆந்திர அரசு தீவிர ஆலோசனை!
சமீபத்தில் என்டிஏ கூட்டணியில் பாமக (அன்புமணி ராமதாஸ்), அமமுக (டிடிவி தினகரன்) ஆகிய கட்சிகள் இணைந்துள்ளன. டிடிவி தினகரன் ஏற்கனவே எடப்பாடி பழனிசாமியுடனான கருத்து மோதலை பொருட்படுத்தாமல் என்டிஏவில் இணைந்தது குறிப்பிடத்தக்கது. இதனால் ஓபிஎஸ் எந்த பக்கம் சாய்வார் என்ற கேள்வி எழுந்துள்ளது.
செய்தியாளர்கள் "என்டிஏவில் இருந்து அழைப்பு வந்ததா?" என்று கேட்டபோது, ஓபிஎஸ் பதிலளிக்க மறுத்துவிட்டார். ஆனால், "அடுத்தகட்ட நடவடிக்கை குறித்து ஜனவரி 25ஆம் தேதி நடைபெறும் மாவட்டச் செயலாளர்கள் கூட்டத்திற்குப் பின் முடிவு எடுக்கப்படும். தை மாதம் முடிவதற்குள் கூட்டணி குறித்த உரிய பதில் மக்களுக்கு கிடைக்கும்" என்று உறுதியாகக் கூறினார்.
தமிழகத்தில் அ.தி.மு.க. ஒற்றுமை என்பது தேர்தல் வெற்றிக்கு மிக முக்கியமான காரணியாக இருந்து வருகிறது. ஓபிஎஸ் - இபிஎஸ் இடையேயான பிரிவு காரணமாக 2021 தேர்தலில் அ.தி.மு.க. தோல்வியடைந்தது. தற்போது என்டிஏ கூட்டணி வலுப்பெற்று வரும் நிலையில், ஓபிஎஸ் இணைந்தால் கூட்டணி மேலும் பலமடையும். ஆனால் தனித்து போட்டியிட்டால் வாக்குகள் பிரியும் அபாயம் உள்ளது. தவெகவின் எழுச்சியும், நாதக் கட்சியின் தனி அணி உத்தியும் போட்டியை மேலும் கடுமையாக்கியுள்ளது.
தை மாத இறுதிக்குள் ஓபிஎஸ் எடுக்கும் முடிவு தமிழக அரசியலை பெரிதும் பாதிக்கும் என அரசியல் வட்டாரங்கள் கருதுகின்றன. ஜனவரி 25ஆம் தேதி மாவட்டச் செயலாளர்கள் கூட்டம் இதற்கான முக்கிய திருப்புமுனையாக அமையும் என எதிர்பார்க்கப்படுகிறது.
இதையும் படிங்க: உண்மையான களநிலவரம் என்ன? சொதப்பும் உளவுத்துறை!! முதல்வர் மு.க.ஸ்டாலின் கடுகடுப்பு!