தமிழக சட்டமன்றத் தேர்தலில் 106 தொகுதிகளில் வெற்றி பெற்ற தமிழக வெற்றிக் கழகம் (தவெக) தனிப்பெரும்பான்மை இல்லாத நிலையில் ஆட்சி அமைக்க கூட்டணி பேரம் தீவிரமடைந்துள்ளது. 118 உறுப்பினர்கள் தேவைப்படும் சூழலில், பா.ம.க.வுடன் நடைபெற்ற பேச்சுவார்த்தையில் துணை முதல்வர் பதவி கோரிக்கை எழுந்துள்ளது பரபரப்பை ஏற்படுத்தியுள்ளது.

தவெக வட்டாரங்கள் தெரிவிக்கும் தகவலின்படி, பெரும்பான்மையை நிரூபிக்க இன்னும் 12 இடங்கள் தேவை. காங்கிரஸ் ஏற்கெனவே ஆதரவு அளிக்க சம்மதம் தெரிவித்துள்ள நிலையில், அதிமுக கூட்டணியில் 5 தொகுதிகளில் வெற்றி பெற்ற பா.ம.க.வுடன் தவெக தீவிர பேச்சு நடத்தி வருகிறது. ஆனால், பா.ம.க. தலைவர் அன்புமணி ராமதாஸ் தனது மனைவி சௌமியாவுக்கு துணை முதல்வர் பதவியும், விஜய் ராஜினாமா செய்ய உள்ள ஒரு தொகுதியும் கேட்டுள்ளதாக தகவல்கள் வெளியாகியுள்ளன.

வெறும் ஐந்து தொகுதிகளில் வெற்றி பெற்ற ஒரு கட்சி இவ்வளவு பெரிய கோரிக்கைகளை முன்வைப்பது தவெக தலைவர் விஜய்க்கு பிடிக்கவில்லை எனக் கூறப்படுகிறது.

இதையும் படிங்க: தவெக விஜய்க்கு கூட்டணி கதவு திறந்தாச்சு! யூடர்ன் போட்டது காங்., விசிக, கம்யூனிஸ்ட் கட்சிகள்!!

எனவே, காங்கிரஸ், கம்யூனிஸ்ட் கட்சிகள் மற்றும் விடுதலை சிறுத்தைகள் கட்சியுடன் மாற்று பேச்சுவார்த்தைகள் தீவிரமாக நடைபெற்று வருகின்றன.

இந்நிலையில், இன்று சென்னையில் தவெக எம்.எல்.ஏ.க்களைச் சந்தித்த பின்னர், கவர்னரைச் சந்தித்து ஆட்சி அமைக்க உரிமை கோர விஜய் திட்டமிட்டுள்ளார். கவர்னர் எவ்வளவு கால அவகாசம் வழங்குவார் என்பது இன்னும் தெளிவாகவில்லை. அந்த காலக்கெடுவுக்குள் தேவையான ஆதரவைத் திரட்டி பெரும்பான்மையை நிரூபிக்க விஜய் தயாராகி வருகிறார்.

தவெக-வுக்கு தனிப்பெரும்பான்மை கிடைக்காதது அரசியல் வட்டாரத்தில் பெரும் விவாதத்தை ஏற்படுத்தியுள்ளது. பா.ம.க.வின் உயர் கோரிக்கை மற்றும் மாற்று கூட்டணி முயற்சிகள் ஆகியவை அடுத்த சில நாட்களில் தமிழக அரசியலை எப்படி பாதிக்கும் என எதிர்பார்ப்பு எழுந்துள்ளது. விஜய் தலைமையிலான தவெக ஆட்சி அமையுமா அல்லது புதிய கூட்டணி சமன்பாடுகள் உருவாகுமா என்பதை அனைவரும் உன்னிப்பாகக் கவனித்து வருகின்றனர்.

இதையும் படிங்க: இரு முதலமைச்சர்களுக்கு பதவி பிரமாணம்! பயங்கர பிசி மூடில் கவர்னர் அர்லேக்கர்!!