புதுக்கோட்டையில் செய்தியாளர்களை சந்தித்த திமுக முன்னாள் அமைச்சர் ரகுபதி, தற்போது தமிழக அரசியலில் நடைபெறும் குதிரை பேர அரசியல் குறித்து கடுமையாக விமர்சித்தார்.
“ஒவ்வொரு எம்எல்ஏவும் தவெகவுக்கு தாவுவதுதான் குதிரை பேர அரசியலுக்கு சிறந்த எடுத்துக்காட்டு” என்று கூறிய ரகுபதி, திமுக எப்போதும் குதிரை பேரத்துக்கு எதிரான கட்சி என்று வலியுறுத்தினார். ஜனநாயகத்தை நம்பும் திமுக, குதிரை பேரத்தில் ஈடுபடாது என்றும் அவர் தெரிவித்தார்.
“குதிரை பேரத்தில் ஈடுபட்டிருந்தால் கூட்டணி கட்சிகளை தவெகவுக்கு ஆதரவு அளிக்கச் சொல்லியிருக்க மாட்டோம்” என்று சுட்டிக்காட்டிய அவர், முதலமைச்சர் கரூர் செல்லும் முன் செந்தில் பாலாஜியை கைது செய்ய வேண்டும் என்பதே தவெக அரசின் நோக்கம் என்றும் விமர்சித்தார். எம்எல்ஏக்களை ராஜினாமா செய்ய வைத்து குதிரை பேரம் நடப்பது குறித்து மத்திய அரசு விசாரிக்க வேண்டும் என்றும் அவர் வலியுறுத்தினார்.
இதையும் படிங்க: குதிரை பேரம் குறித்து வாய் விட்ட வைகோ! ஏன் வழக்கு பதியவில்லை?! திமுக நெருக்கடி?!
ஆட்சியை கவிழ்க்க மாட்டோம் என உறுதியளித்த ரகுபதி, “குளம் வற்றிப்போனால் பறவைகள் அடுத்த குளத்தை தேடிச் செல்வது வழக்கம். ஆனால் தவெக ஆட்சியை கவிழ்க்க நாங்கள் முயற்சி செய்யவில்லை” என்றார். மக்களை சந்தித்து, அவர்களின் ஆதரவுடன் தான் ஆட்சிக்கு வருவோம் என்றும் தெளிவுபடுத்தினார்.
“திமுக குதிரை பேரம் செய்திருந்தால் 2017-ம் ஆண்டிலேயே ஆட்சிக்கு வந்திருக்க முடியும். சின்ன பிள்ளைகளுக்கு மிட்டாய் காட்டி ஏமாற்றி ஆட்சிக்கு வருவது எங்கள் வழக்கமல்ல” என்று ரகுபதி கூறினார்.
திமுகவின் இந்த உறுதியான நிலைப்பாடு தமிழக அரசியல் களத்தில் புதிய விவாதங்களை ஏற்படுத்தியுள்ளது. குதிரை பேர அரசியல் குற்றச்சாட்டுகள் தொடரும் நிலையில், ரகுபதியின் பேட்டி திமுக தரப்பின் நிலைப்பாட்டை தெளிவாக வெளிப்படுத்தியுள்ளது. மக்கள் ஜனநாயக முறையில் தீர்ப்பளிப்பார்கள் என எதிர்பார்ப்பு நிலவுகிறது.
இதையும் படிங்க: குதிரை பேரம் குறித்து வாய் விட்ட வைகோ! ஏன் வழக்கு பதியவில்லை?! திமுக நெருக்கடி?!