நாடு முழுவதும் 10 மாநிலங்களில் காலியாக இருந்த 37 ராஜ்யசபா இடங்களுக்கான தேர்தல் நிறைவடைந்தது. இதில் 26 இடங்கள் போட்டியின்றி தேர்வான நிலையில், எஞ்சிய 11 இடங்களுக்கு நேற்று (மார்ச் 16) தீவிரமான ஓட்டெடுப்பு நடைபெற்றது. பீஹாரில் 5, ஒடிஷாவில் 4, ஹரியானாவில் 2 இடங்களுக்கான தேர்தல் கவனத்தை ஈர்த்தது.
பீஹாரில் முதல்வர் நிதிஷ் குமார் (ஜேடியு), பாஜக தேசியத் தலைவர் நிதின் நபின், ஜேடியு வேட்பாளர்கள் ராம்நாத் தாக்கூர், உபேந்திர குஷ்வாஹா, பாஜகவின் ஷிவேஷ் ராம் ஆகியோர் வெற்றி பெற்றனர். அனைத்து இடங்களிலும் என்டிஏ கூட்டணி வேட்பாளர்கள் எதிர்ப்பின்றி தேர்வாகினர்.
ஒடிஷாவில் நான்கு இடங்களுக்கான போட்டி தீவிரமாக இருந்தது. பாஜக வேட்பாளர்கள் மன்மோகன் சமல், சுஜீத் குமார் ஆகியோரும், பிஜு ஜனதா தளத்தின் சந்த்ருப்த் மிஸ்ராவும் வெற்றி பெற்றனர். நான்காவது இடத்துக்கு பாஜக ஆதரவு சுயேச்சை திலீப் ராய் – பிஜுவின் தத்தேஸ்வர் ஹோட்டா இடையே கடும் போட்டி நிலவியது.
இதையும் படிங்க: ராஜ்யசபா எம்.பிக்கள் தேர்தல்! தமிழக வேட்பாளர்கள் 6 பேரும் போட்டியின்றி தேர்வு!!
காங்கிரஸ் எம்எல்ஏக்கள் 14 பேரும் தத்தேஸ்வருக்கு ஆதரவு தெரிவித்ததால் அவர் வெற்றி பெறுவார் என எதிர்பார்க்கப்பட்டது. ஆனால், பிஜு ஜனதா தளத்தின் 8 எம்எல்ஏக்கள் திலீப் ராய்க்கு ஓட்டு போட்டதால் அவர் அதிரடியாக வெற்றி பெற்றார். இது ஒடிஷா அரசியலில் பெரும் பரபரப்பை ஏற்படுத்தியுள்ளது.
ஹரியானாவில் இரு இடங்களுக்கான ஓட்டெண்ணிக்கையின்போது ஓட்டு ரகசியம் மீறப்பட்டதாக புகார் எழுந்ததால் முடிவுகள் தாமதமாகி வருகின்றன. பாஜக – காங்கிரஸ் வேட்பாளர்களுக்கு இடையே கடும் போட்டி நிலவுவதாக தகவல்கள் தெரிவிக்கின்றன.
முன்னதாக, தமிழகத்தில் காலியாக இருந்த 6 ராஜ்யசபா இடங்களுக்கும் திமுக, அதிமுக, காங்கிரஸ் வேட்பாளர்கள் போட்டியின்றி தேர்வாகினர். மகாராஷ்டிராவில் சரத் பவார், வினோத் தாவ்டே, ராம்தாஸ் அத்வாலே உள்ளிட்டோர் போட்டியின்றி தேர்வாகினர். மேற்கு வங்கத்தில் திரிணமூல் காங்கிரஸ் வேட்பாளர்கள் பாபுல் சுப்ரியோ, நடிகை கோயல் மல்லிக் வெற்றி பெற்றனர்.
இந்த தேர்தல் முடிவுகள் 2026 சட்டமன்றத் தேர்தலுக்கு முன்பு கூட்டணி அரசியலில் பெரிய தாக்கத்தை ஏற்படுத்தும் என எதிர்பார்க்கப்படுகிறது. குறிப்பாக ஒடிஷாவில் பிஜு ஜனதா தள எம்எல்ஏக்களின் கட்சி மாற்ற ஓட்டு பெரும் சர்ச்சையாக மாறியுள்ளது.
இதையும் படிங்க: காங்கிரஸில் ராஜ்யசபா சீட் யாருக்கு? ராகுல்காந்திக்கு தலைவலி! டெல்லிக்கு டிக்கெட் போடும் முக்கிய நிர்வாகிகள்!