நாம் தமிழர் கட்சி ஒருங்கிணைப்பாளர் சீமான், வரும் இடைத்தேர்தலில் அம்பாசமுத்திரம் தொகுதியில் போட்டியிடப் போவதாக அறிவித்துள்ளார். “இடைத்தேர்தலில் ஒரு தொகுதியில் நான் போட்டியிட வேண்டும் என கட்சியினர் விரும்புகின்றனர். அம்பாசமுத்திரம் உகந்ததாக இருக்கும்” என அவர் தெரிவித்தார். மற்ற தொகுதிகளில் நாம் தமிழர் கட்சி தனது சொந்த வேட்பாளர்களை நிறுத்தும் என்றும் அவர் கூறினார்.

முதல்வர் ஜோசப் விஜய் திருச்சி கிழக்கு தொகுதி எம்எல்ஏ பதவியை ராஜினாமா செய்ததால், திருச்சி கிழக்கு, பெருந்துறை, தாராபுரம், மதுராந்தகம், அம்பாசமுத்திரம், விராலிமலை உள்ளிட்ட ஆறு தொகுதிகளுக்கு இடைத்தேர்தல் வரும் சூழல் உருவாகியுள்ளது. இந்த இடைத்தேர்தல்களில் தவெகவை எதிர்கொள்ளும் வகையில் எதிர்க்கட்சிகளை ஒன்றிணைக்க தி.மு.க. தீவிரம் காட்டி வருகிறது.

குறிப்பாக அம்பாசமுத்திரம் தொகுதியில் சீமானை பொது வேட்பாளராக நிறுத்த தி.மு.க. திட்டமிட்டுள்ளதாக தகவல்கள் வெளியாகின்றன. நாடார் சமூக வாக்குகள் அதிகம் உள்ள இந்தத் தொகுதியில் அதே சமூகத்தைச் சேர்ந்த சீமானை நிறுத்தினால் வெற்றி வாய்ப்பு அதிகம் இருக்கும் என தி.மு.க. கணக்கு போடுவதாகக் கூறப்படுகிறது.

இதையும் படிங்க: தவெக விஜயை எதிர்க்க சீமான்தான் சரி! திமுக - அதிமுக கைகோர்ப்பு! ஸ்டாலின் - இபிஎஸ் பக்கா ப்ளான்!

முன்னாள் அமைச்சர் அனிதா ராதாகிருஷ்ணன் இதற்கான பேச்சுவார்த்தையை முன்னெடுத்து வருவதாகவும், அதிமுக பொதுச் செயலாளர் பழனிசாமியுடனும் திரைமறைவு பேச்சுகள் நடைபெறுவதாகவும் தெரிகிறது.

கடந்த சட்டப்பேரவைத் தேர்தலில் தனித்து களம் கண்ட நாம் தமிழர் கட்சி அனைத்து இடங்களிலும் தோல்வியைத் தழுவியது. காரைக்குடியில் போட்டியிட்ட சீமான் டெபாசிட் இழந்தார். கட்சியின் வாக்கு சதவீதமும் 8 சதவீதத்திலிருந்து 4 சதவீதமாகக் குறைந்தது. இந்த நிலையில், இடைத்தேர்தலில் சீமான் அம்பாசமுத்திரத்தில் போட்டியிடுவது கட்சிக்கு புதிய உத்வேகத்தை அளிக்கும் என எதிர்பார்க்கப்படுகிறது.

தி.மு.க.வின் இந்த நகர்வு தவெகவுக்கு சட்டப்பேரவையில் கடுமையான எதிர்ப்பை ஏற்படுத்தும் என அரசியல் விவரம் அறிந்தவர்கள் கருதுகின்றனர். சீமான் வெற்றி பெற்றால் எதிர்க்கட்சிகளின் குரல் சட்டப்பேரவையில் வலுப்பெறும். நாம் தமிழர் கட்சி நிர்வாகிகள் இது குறித்து இன்னும் சில நாட்களில் ஆலோசனை கூட்டம் நடத்த உள்ளனர்.

இந்த இடைத்தேர்தல் தமிழ்நாடு அரசியலில் புதிய சமன்பாடுகளை உருவாக்கும் என எதிர்பார்க்கப்படுகிறது. சீமானின் முடிவு மற்றும் தி.மு.க.வின் உத்தி அடுத்த சில நாட்களில் தெளிவாகும்.

இதையும் படிங்க: தனித்துப்போட்டி இனி வேலைக்கு ஆகாது!! கூட்டணி கதவை திறக்க சீமான் ஆலோசனை! தம்பிகள் அதிர்ச்சி!