காஞ்சிபுரம் மாவட்டம் வல்லக்கோட்டை பகுதியில் அமைந்துள்ள முருகன் கோயில், சுமார் 2000 ஆண்டுகள் பழமையானது. இந்த கோயிலுக்கு நாள்தோறும் நூற்றுக்கணக்கான பக்தர்கள் வந்து தரிசனம் செய்து செல்கின்றனர். இந்நிலையில் வல்லக்கோட்டை முருகன் கோயில் குடமுழுக்கு சுமார் 17 ஆண்டுகளுக்குப் பின்னர் இன்று நடைபெற்றது. குடமுழக்கை முன்னிட்டு 60 குண்டங்கள் அமைக்கப்பட்டு 108 சிவாச்சாரியார்கள், 9 ஓதுவார்கள் யாக சாலை பூஜைகளில் ஈடுபட்டனர். இந்த விழாவில் ஏராளமான பக்தர்கள் கலந்துகொண்டு அரோகரா முழக்கத்துடன் சாமி தரிசனம் செய்தனர்.

இந்த கோவில் ஸ்ரீபெரும்புதூர் சட்டமன்ற தொகுதியில் வருவதால் இந்த விழாவில் அத்தொகுதி எம்.எல்.ஏவும் காங்கிரஸ் கமிட்டி தலைவருமான செல்வப்பெருந்தகை கலந்து கொண்டார். அப்போது அவருக்கு அங்குள்ள அறநிலையத் துறை அதிகாரிகள் அனுமதி மறுத்ததாகக் கூறப்படுகிறது.

இதையும் படிங்க: மீனவர்கள் நலனில் கொஞ்சமாவது அக்கறை இருக்கா..? பாஜகவை வறுத்தெடுத்த செல்வப்பெருந்தகை..!

ஆனால் குடமுழுக்கு முடிந்த பிறகு மூலவர் விமானத்தில் நன்னீராட்டு செய்ய ஏற்பாடு செய்யப்பட்டிருந்த பகுதிக்கு தெலங்கானா முன்னாள் ஆளுநரும், பாஜக மூத்தத் தலைவருமான தமிழிசை சவுந்தரராஜனை அறநிலையத் துறை அதிகாரிகள் அனுமதித்தனர். பின்னர் வந்த செல்வப்பெருந்தகையை மேலே இடமில்லை என்று கூறி அனுமதிக்காமல் சிறிது நேரம் கழித்து, மூலவர் விமானத்தில் ஏற அனுமதிக்கப்பட்டார். மேலும், புனித நீரை ஊற்றுவதற்கு முன்பாக கொடியைக் கூட சட்டமன்ற உறுப்பினரிடம் தராமல் அறநிலையத் துறை அதிகாரிகளே அதனை அசைத்தனர்.

இதனைத்தொடர்ந்து செய்தியாளர்களிடம் பேசிய செல்வப்பெருந்தகை, “குடமுழக்கு விழா சிறப்பாக நடைபெற்றது. அதற்கு எனது வாழ்த்துக்கள். திருச்செந்தூரில் குடமுழக்கு விழா சிறப்பாக நடைபெற்றதோடு, அமைச்சர் சேகர்பாபு சிறப்பாக செயலாற்றினார். ஆனால், இங்கு அறநிலையத் துறை அதிகாரிகள் மிகவும் மெத்தனப்போக்குடன் செயல்பட்டனர். யார் யாரைக் கட்டுப்படுத்துவது என்று தெரியவில்லை. தமிழிசை சவுந்தரராஜனை அனுமதித்துவிட்டு என்னை ஏன் அனுமதிக்காமல் தடுத்து நிறுத்தினார்கள் என்று தெரியவில்லை.

2000 ஆண்டுகளாக இந்தப் பிரச்னை இருந்து வருகிறது. ஒரே இரவில் அதனை தீர்த்துவிட முடியாது. அதிகாரிகள் தாங்களே கொடி அசைக்க வேண்டும் என்று நினைத்தார்கள். நாங்கள் மக்களோடு மக்களாக நின்று பார்த்து வந்தோம். ஏனெனில் நாம் ஏதாவது சொல்லப்போக ஒரு நல்லாட்சிக்கு எந்த பாதிப்பும் வந்துவிடக்கூடாது.

24 மணி நேரமும் உழைத்துக்கொண்டிருக்கும் முதல்வரின் நற்பெயருக்கோ அல்லது பக்தி இயக்கத்தை விட சிறப்பாக செயல்படுத்திக் கொண்டிருக்கும் அமைச்சர் சேகர்பாபுவுக்கோ களங்கம் வந்துவிடக்கூடாது என்பதற்காக மக்களோடு மக்களாக நின்றேன். இறைவனை என்னால் பார்க்க முடியவில்லை, இருந்தாலும் எல்லோரும் பார்த்துவிட்டு வாருங்கள் என்று கூறி செல்கிறேன். அதிகாரிகள் தங்களை அதிகாரிகளாக உணர்ந்துகொள்ள வேண்டும். அதுதான் இங்கு பிரச்னையாக உள்ளது. என்ன இருந்தாலும் பக்தர்கள் மகிழ்ச்சியாக இருந்தால் எனக்கும் மகிழ்ச்சிதான்” என்று தெரிவித்தார்.

இதையும் படிங்க: மோடி ஆட்சியில் இதெல்லாம் சட்டவிரோதமாக பறிக்கப்படுகிறது.. லிஸ்ட் போட்ட செல்வப்பெருந்தகை..!